На ова место СДСМ ветуваше чист алпски воздух, а добивме чад и сулфур. Македонија тоне во отровен смог. Неколку фабрики на олигарсите блиски до Зоран Заев ја загадуваат државата со отровен сулфурен диоксид. Граѓаните се трујат, а олигарсите на Заев заработуваат, обвини портпаролот на ВМРО-ДПМНЕ, Наум Стоилковски.

„Концентрацијата на сулфурен диоксид во воздухот во државата е 3,4 пати над националниот плафон, а плафонот на прашина повеќе од два пати, ова не се мерења на мерните станици, кои, според власта, не мерат точно, ова е извештај на Европската енергетска заедница во Виена. Годишно во атмосферата се емитуваат 53.855 тони сулфурен диоксид, тоа е 3,4 пати повеќе од дозволеното, кое изнесува 15.855 тони.

Според извештајот на Европската енергетска заедница, количината емитувани загадувачки супстанции од година на година се зголемува. Нивото на емитуван сулфурен диоксид во атмосферта во 2014 година изнесувало 44.267 тони за сега, 5 години потоа, да имаме 10.000 тони повеќе сулфурен диоксид во атмосферата. Доказ за тоа е густиот облак од смог над Скопје, што се гледа зад мене.

Скопје и Македонија континуирано се задушуваат. Сулфурниот диоксид е отровен за луѓето, за животинскиот и за растителниот свет.
Зголеменото ниво сулфурен диоксид во атмосферата влијае иритирачки на кожата, очната мембрана и дишните патишта. Високата концентрација на сулфурен диоксид како овој во Македонија предизвикува иритирање и болести на респираторниот и кардиоваскуларниот систем.

Под ризик од огромното присуство на сулфурен диоксид во атмосферата се луѓето со белодробни заболувања, децата, возрасните над 65 години и луѓето што работат на отворено. Токму затоа, ВМРО-ДПМНЕ предложи три мерки, кои итно мора да бидат преземени. Очекуваме од Заев и Шилегов минимум одговорност и да го преземат неопходното веднаш“, порача Стоилковски.