Болниците во Сент Луис, во американската сојузна држава Мисури, соопштија дека откако избувнаа безредијата во предградието Фергусон откако големата порота одлучи судски да не го гони белиот полицаец кој во август годинава уби афроамерикански тинејџер, настрадале 14 луѓе а 29 се приведени, пренесуваат американските медиуми.

До 1,25 часот наутро, во округот соопштија за 14 рането, од кои двајца се со прострелни рани нанесени од огнострелно оружје, пишува интернет изданието на локалниот дневен весник St. Louis Post-Dispatch.

Во меѓувреме, репортерката на локалната телевизиска станица KMOV, Емили Рау, на својот Twitter профил објави дека во „моментов (шест часот наутро во вторникот наутро) сé е мирно“. Додава дека многу од улиците на Фергусон на коишто се одвиваа безредијата изминатата ноќ се пусти.

Според изјавата шефот на локалната полиција, Џон Белмар, силите на редот „беа подготвени за таквиот развој на случувањата“. Основната цел на полициските сили, според него, била да се заштитат човечките животи и додаде дека, сепак, ситуацијата е многу посложен отколку што беше во август, веднаш откако 28-годишниот бел полицаец Дарен Вилсон го застрела 18-годишниот црномурест тинејџер Мајкл Браун. „Она со што се соочуваме изминатава ноќ, е многу пострашно од најстрашните ноќи во август кога беше првиот бран на расните немири во Фегусон)“, изјави Белмар за американската телевизиска мрежа ABC.

Полицаецот Дарен Вилсон кој го споредил тинејџерот кого го застрела со „демон“, пренесува весникот The Independent повикувајќи се на сведочењето на офицерот, што беше објавено од властите на државата Мисури.

„Се чувствував како петгодишно дете во рацете на Хулк Хоган“, така ја опишал судирот 28-годишниот Вилсон со десет години помладиот Браун во своето сведочење пред големата порота, којашто на крајот одлучи да го ослободи од судски прогон што предизвика гнев и протести на улиците на Фергусон.

Изминатата ноќ поради судирите со припадниците на силите на редот, кршење излози на продавници, потпалувања дуќани и автомобили и грабежи биле приведени 29 лица, соопшти полицијата.

Претходно во вторникот гувернерот на американската сојузна држава Мисури, Џеј Никсон, нареди во вторникот распоредување на дополнителни сили на Националната гарда на САД во градот Фергусон, каде што продолжуваат безредијата и грабежите кои започнаа во понеделникот навечер по објавувањето на одлуката на големата порота дека нема судски да го гони белиот полицаец.

Големата порота во гратчето Фегусон, којашто ја сочинуваат деветмина белци и тројца црнци, иако во ова предградие на Сент Луис мнозинството до 20-те илјади жители се афроамериканци, донесе одлука да не го гони полицаецот кој во август го застрела црното момче за кое се тврди дека било невооружено. Веднаш по објавувањето на одлуката, започнаа протести коишто набрзо прераснаа во насилни безредија. Полицијата била принудена да употреби чадни бомби, но очевидци тврдат дека бил употребен солзавец.

Случајот кој ја истакна расната сегрегација во САД, предизвика големо внимание на американската и светската јавност. Американскиот претседател Барак Обама повика учесниците на протестите низ повеќето градови во земјата, како Њујорк и Вашингтон, да ја почитуваат одлуката на поротата и своите ставови да ги искажат мирно Паралелно со тримесечната истрага на големата порота во Фергусон, од август се води и сојузна истрага за истиот случај којашто според министерството за правосудство на САД е сосема независна од истрагата на поротата. /крај/мф/сн

Извор: Макфакс