Палестинските милитанти продолжија во петокот од енклавата Појасот Газа да го ракетираат јужен Израел, откако во петокот наутро истече 72-часовното „хуманитарно примирје“, објави израелската армија која возврати со воздушни напади од бомбардери-ловци „F-16“. 

Според агенциските извештаи, цел на израелскиот воздушен напад во југозападниот дел од централниот град на енклавата Газа бил објект со сала кој бил целосно уништен. Не е познато дали во големиот објект имало сокриено цивили.

Палестинските ракетирања биле обновени во 7 часот по локално време веднаш по истекот на тридневниот прекин на огнот. Според соопштението на израелската армија, палестинските милитанти истрелале околу 20 ракети, од кои две биле пресретнати над градот Ашкелон со 120 илјади жители и една над Сдерот со 25 илјади жители.

Засега нема извештаи за настрадани и разурнување на двете страни.

Палестинските ракетирања биле ограничени на граничните области на енклавата и не достигнале до густо населените региони на Израел. Сепак, сирените за предупредување од ракетен напад се огласиле а биле отворени и засолништата во израелските градови во радиус од 80 километри од границата со Појасот Газа, вклучително и во Ерусалим кој има 800 илјади жители, и во Тел Авив со 400 илјади жители. Во областите коишто се потенцијални цели на ракетирањата живеат 5 милион Израелци, од вкупно осум милиони жители на еврејската држава.

Во Газа, пак, каде што такви засолништа не постојат, илјадници Палестинци одвај имаа време да се вратат во своите домови враќајќи се од пограничните периферни области каде што се привремено засолнати во училиштата под закрила на Обединетите нации.

Армијата на Израел во соопштението истакнува дека израелските сили повеќе од два часа се воздржувале од одговор на нападите од палестинските фракции. Таа додаде дека за време на конфликтот кој започна пред еден месец палестинските милитанти истрелале повеќе од три илјади проектили. Израелските власти сметаат и дека барем уште толку палестинското исламистичко движење Хамас има во резерва.

Израел претходно објави дека е подготвен да се согласи на продолжување на прекинот на огнот, меѓутоа портпаролот на Хамас изјави дека Палестинците не се согласуваат со тоа, но дека ќе ги продолжат преговорите во Каиро со египетско посредување. Палестинските фракции во заедничките предлози бараа од Израел начелно да ги прифати нивните барања меѓу кои е и целосното укинување на сите поморски, воздушни и копнени блокади на Појасот Газа, ослободување на сите палестински затвореници од израелските затвори и почеток на обновување на енклавата.

Военото крило Хамас ги предупреди во четврток палестинските преговарачи да не се согласуваат на продолжување на прекинот на огнот доколку Израел не понуди отстапки, што Израел не го стори. Израел јасно порача дека ќе одговори со сила доколку биде нападната, и дека дури е подготвен да ја окупира Газа за да ги исфрли Хамас од власта. Инаку израелската армија во вторникот ги повлече копнените сили од Појасот Газа и ги распореди на рабовите на енклавата.

Во израелската офанзива започната на 8-ми јули „Линија на одбраната“ чија цел е уништување на инфраструктурата од подземни тунели на Хамас и спречување на неговото ракетирање на израелската територија, според палестински извори загинале 1.875 цивили, од кои најголемиот дел се цивили и над 400 деца. Хамас, исто така, во четвртокот објави дека погубил Палестинци кои шпионирале за Израел, но не го наведе нивниот број.

Израел објави дека досега во борбите загубил 64 војници и офицери, како и тројца цивили, жртви на палестинските ракетирања на израелскиот области./крај/мф./сн

Извор: Макфакс