Скопје
Зимската служба подготвена за расчистување на скопските улици
Градот Скопје е подготвен за одржување на магистралните и на собирните улици на подрачјето на Скопје, во зимски услови, информираат градските власти.
За чистење на снежните наноси од коловозите Градот Скопје оваа сезона располага со 30 возила и со доволно количество сол.
Градоначалникот на Град Скопје, Коце Трајановски и директорот на ЈП „Улици и патишта“, Синиша Ивановски, во петок го посетија пунктот на ова јавно претпријатие во Кисела Вода каде што се стационирани возилата за расчистување на снегот.
„Од утре, 15 ноември, Градот Скопје почнува со зимско одржување на градските сообраќајници. Зимската служба 2014/2015 година ќе трае до 15 март 2015 година, со можност за продолжување доколку се неповолни временските услови. Градот Скопје и годинава е подготвен за расчистување на снежните наноси од коловозите. Наша задача ќе биде брзо и ефикасно да го расчистиме снегот од градските улици и да овозможиме непречено и безбедно одвивање на сообраќајот и движење на пешаците. Кризниот штаб на зимската служба веќе почна со работа. Во него членуваат претставници од Градот Скопје, од јавните градски претпријатија, од десетте скопски општини, од Министерството за внатрешни работи и од Државниот инспекторат за патишта. Градот Скопје за претстојната зима има на располагање 2.300 тони индустриска сол како залиха од лани, како и дополнителни 1.500 тони набавени од компанијата „КИЕМ“. Што се однесува до потребните возила за расчистување на снегот зимската служба ќе ги користи возилата на ЈП „Улици и патишта“, како и возилата што дополнително се ангажирани од приватна фирма. Екипите на зимската служба дежураат во текот на 24 часа, на две локации, во пунктот на ЈП „Улици и патишта“ во Кисела Вода и во пунктот во Бутел“, рече градоначалникот Трајановски.
Трајановски додаде дека од оваа зима, новина во одржувањето на градските улици ќе биде апликацијата на средството Калциуммагнезиумацетат (KMA), за да се намали загадувањето на амбиентниот воздух од ПМ10 честичките.
„Досега се пристигнати 7.000 литри од ова средство. Испораката на средството ќе се врши во согласност со потребите. Средството е набавено од најповолниот понудувач на јавниот повик што го објавивме, „Алкалоид” АД Скопје. За набавка на средството Градот Скопје ќе вложи околу 3 милиони денари (со ДДВ). Сакам да нагласам дека во активностите за зимско одржување на градските улици се вклучени и другите јавни претпријатија и тоа: ЈП „Комунална хигиена“ ќе го расчистува снегот на пристапите до контејнерите, ќе ги расчистува пешачките зони, улиците во Старата скопска чаршија и пешачките пристапи до објектите од витално значење; ЈП „Водовод и канализација“ ќе ја оспособува атмосферската канализација и сливниците за прием на поголемо количество вода; ЈП „Паркови и зеленило“ ќе го отстранува снегот од пристапните патеки во парковите, ќе ги заштитува дрвјата од кршење под тежината на снежните наноси и ќе отстранува паднати дрвја и гранки од коловозите, а ЈСП „Скопје“ ќе го расчистува снегот и мразот од автобуските постојки“, објасни градоначалникот Коце Трајановски.
Градот Скопје апелира до сите стопански субјекти во градот и до сите граѓани, кога ќе падне снег, да ги почитуваат законските обврски и да го расчистуваат снегот и мразот од пристапите до нивните деловни, односно станбени објекти. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Ѓорѓиевски на средба со Стојкоски: Ќе ги посетиме општините, ќе ги детектираме проблемите и заеднички ќе ги решиме
Претседателот на ЗЕЛС, Орце Ѓорѓиевски оствари уште една од низата средби и разговори за поубави општини и град Скопје.
Денес тој беше во посета на Ѓорче Петров, каде со својот колега, градоначалникот Александар Стојкоски, продискутираа за постигнатото во овие две години кое во огромна мера го смени ликот на оваа општина и покрај опструкциите од страна на Градот Скопје. Заеднички бараа и решенија за проблемите со кои се соочуваат жителите на Ѓорче Петров. Ѓорѓиевски потенцираше дека новата централна власт предводена од Премиерот Христијан Мицкоски ќе биде вистински партнер во унапредувањето на единиците на локалната самоуправа. Истакна дека градските проблеми ќе ги решаваат заедно, бидејќи Скопје и скопјани заслужуваат метропола која ќе се носи рамо до рамо со европските.
-Денеска ја посетив општина Ѓорче Петров каде што заедно со првиот човек и мој драг пријател Александар Стојкоски разговаравме за досегашната успешна работа во изминатите две години, но и за проблемите со кои се соочуваат жителите на Скопје. На самиот почеток, морам да му честитам на Александар и неговиот прекрасен тим за големите промени кои ги направија во општината за поквалитетен живот на сите кои живеат во неа. И покрај опструкциите од страна на градот Скопје, градоначалникот успеа да постигне многу висок степен на реализација на проекти споредбено со претходниците, што се гледа и од терен.
Како претседател на ЗЕЛС поразговаравме и за она што треба дополнително да се реализира, а е во планот за наредниот период за да дојдеме до заеднички решенија. Ова е уште една од средбите кои ги започнав сѐ со цел да се изнајдат решенија за жителите на градот Скопје.
Ќе ги посетиме општините, ќе ги детектираме проблемите и заеднички ќе ги решиме.
Со новата централна власт предводена од премиерот Христијан Мицкоски доаѓа ново време и оној игнорантски однос од изминатите години заминува во минатото.
Сега, градот Скопје и општините ќе имаат вистински партнер во унапредувањето на единиците на локалната самоуправа. Градските проблеми ќе ги решаваме заедно, бидејќи Скопје и скопјани заслужуваат метропола која ќе се носи рамо до рамо со европските. Скопје заслужува да биде повторно горд град-изјави претседателот на ЗЕЛС, Орце Ѓорѓиевски.
Скопје
Mеѓуопштински натпревар во прва помош за учениците од училиштата во Ѓорче Петров
Во реонскиот парк во Ѓорче Петров денеска првпат се одржа натпревар во прва помош за екипи од основните училишта. Учество зедоа училишта од општините Ѓорче Петров, Сарај и Карпош, односно вкупно 23 екипи.
„Ова е еден од начините организиран од Општина Ѓорче Петров во соработка со Црвениот крст – Карпош преку натпревар да ги едуцира учениците со придобивките од познавањето на првата помош.
Натпреварите се организираат на општинско, градско, регионално и на државно ниво и имаат цел да ја зголемат јавната свест за улогата и значењето на првата помош како животоспасувачка вештина. Целта е, пред сè, најмладите да се стекнат со основни познавања и вештини за правилно и навремено укажување прва помош“, велат од Општината.
Општина Ѓорче Петров и во иднина ќе поддржи настани со цел едукација на нашите млади жители во насока на хуманоста и солидарноста, додаваат од Општината.
Скопје
Гази Баба поставува унифицирани корпи за отпадоци од домашни миленици
Градоначалникот на општина Гази Баба, Бобан Стефковски, во објава на својата официјална страница на „Фејсбук“ информира дека од денес општината ќе постави нова урбана опрема.
„Гази Баба е првата општина во Република Македонија, која на јавните површини ќе постави унифицирани корпи за собирање на сметот што го оставаат домашните миленици.
По поставувањето куќарки, ова е втор чекор што го презедовме и со кој на дело ја покажуваме нашата грижа кон домашните миленици.
Во оваа пригода сакам да апелирам до сопствениците на миленици да ги користат поставените корпи за заеднички да се грижиме за заштитата на животната средина.
Дополнително, насекаде во општина Гази Баба ќе поставиме и нови корпи за отпадоци. Набавката на оваа урбана опрема ја направи ЈКП ‘Гази Баба’ за што јавно им благодарам за посветеноста и креативноста во работата“, напиша Стефковски.