Свет
Иран ги обвини САД за официјално промовирање државен тероризам

Портпаролот на иранското Министерство за надворешни работи, Абас Мусави, жестоко ги критикува заканите на САД за убиство на новоназначениот шеф на елитните сили „Ал Кудс “ на Исламската револуционерна гарда, Есмаил Гајани, како официјална и бесрамна најава на таргетиран и државен тероризам, пренесува „Спутник“.
„Сега, по ционистичкиот режим на Израел, САД е вториот режим кој официјално објави дека ги користел ресурсите на својата влада и вооружените сили за терористички акти и дека ќе ги продолжи и во иднина“, објасни Мусави додавајќи дека прибегнувањето на Вашингтон кон терористички акти е јасен знак за слабоста, очајот и конфузијата на американскиот естаблишмент.
Мусави ги осуди безобразните коментари и терористичките акти на американските лидери повикувајќи ја и меѓународната заедница да ги осуди затоа што продолжувањето на овој тренд, порано или подоцна, ќе биде лошо за сите.
Коментарите доаѓаат како реакција на изјавата во четвртокот на американскиот специјален претставник за Иран, Брајан Хук, дека генералот Есмаил Гајани би можел да заврши како својот претходник, генералот Касем Солејмани, кој беше убиен во напад на беспилотни летала на САД во близина на аеродромот во Багдад на 3 јануари.
Хук ја изрази заканата во интервју за весникот „Ашарк ал-Авсат“ на маргините на Светскиот економски форум во Давос, Швајцарија.
Атентатот на Сулејмани доведе до нова поинтензивна рунда тензии меѓу Иран и САД, при што Техеран изврши ракетен напад врз бази на САД и повреди 11 војници. Двете страни, пак, посочија дека нема воена конфронтација во план.
Во обраќањето до иранскиот врховен лидер, ајатолахот Каменеи, на 9 јануари, генералот Гајани, кој беше најавен како наследник на Сулејмани, вети дека ќе го продолжи патот на поранешниот командант со моќ. Тој сигнализира дека крајната цел е целосно да ги исфрлат американските трупи од Блискиот Исток.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Лазарини: Газа станува гробишта на меѓународното хуманитарно право

Директорот на Агенцијата на Обединетите нации за палестински бегалци (UNRWA), Филип Лазарини, денес предупреди дека Појасот Газа се претвора во „гробишта на меѓународното хуманитарно право“, поради продлабочувањето на хуманитарната катастрофа и целосниот колапс на меѓународниот одговор на повеќемесечната блокада и уништување на палестинската територија.
Во интервју за шпанскиот весник „Ел Паис“, Лазарини изјави дека гладот во Газа сега е официјално прогласен, со повеќе од 313 смртни случаи од глад и речиси 63.000 убиени од почетокот на војната во октомври 2023 година. „Гладот во Газа не е резултат на природна катастрофа или случајни околности. Ова е глад предизвикан од човекот. Вратите се намерно затворени, а предупредувањата што ги дававме со месеци едноставно се игнорирани“, рече тој.
Според него, израелските власти ѝ забранија на UNRWA да внесува помош во Газа од 2 март, и покрај фактот дека на границите со Египет и Јордан има повеќе од 6.000 камиони со храна, што, како што изјави тој, „е доволно за да се нахрани целиот појас два месеци“. Иако, додаде тој, во последните недели влегле помал број конвои, тие не биле под контрола на UNRWA и голем дел од нив биле ограбени од очајни, гладни цивили.
„Луѓето не умираат само од бомби или болести. Сега тие почнуваат да умираат во тишина – од глад. И тоа во време кога помошта е достапна, но систематски е спречена да влезе“, нагласи Лазарини, пренесува Танјуг.
Тој го обвини Израел дека води кампања за дезинформации насочена кон целосно делегитимизирање и расклопување на UNRWA. По обвинувањата дека некои од вработените во агенцијата наводно биле поврзани со Хамас, повеќе од 16 земји го прекинаа финансирањето на UNRWA, вклучувајќи ги САД и Шведска, што сочинуваше една третина од вкупниот буџет на агенцијата.
„Израел сака да ја уништи UNRWA затоа што ја гледа како симбол на правото на Палестинците да се вратат. Целта е да се укине статусот на бегалец и со тоа да се ослабне палестинското право на самоопределување и решение за две држави“, рече Лазарини.
Фото: принтскрин
Свет
Бројот на невработени во Германија надмина три милиони лица

Бројот на невработени лица во Германија надмина три милиони во август, достигнувајќи го највисокото ниво од февруари 2015 година, објави денес Федералната агенција за вработување (BA).
Во споредба со јули, бројот на невработени лица се зголеми за 46.000 и сега изнесува 3,025 милиони, што е за 153.000 повеќе отколку во август минатата година.
Стапката на невработеност се зголеми за 0,1 процентен поен и сега изнесува 6,4 проценти, објавува Tageschau.
Како што објаснува BA, зголемувањето на невработеноста е делумно сезонски условено од летниот застој во вработувањето и истекот на голем број договори за обука, но и од слабата економска динамика во германската економија.
„Пазарот на трудот продолжува да ги трпи последиците од економската слабост во последните години, но првите знаци на стабилизација се видливи“, изјави Андреа Налес, претседател на Управниот одбор на BA.
Најголем број невработени се регистрирани во северните федерални држави и урбаните области на Германија – во Бремен стапката е 11,8 проценти, а во Берлин 10,5 проценти.
Најниската стапка е во јужните покраини Баварија, 4,2 проценти и Баден-Виртемберг, 4,7 проценти.
Претседателот на Институтот Минхен Ифо, Клеменс Фуст, изјави дека високата невработеност во Германија дополнително ќе ја ослабне веќе кревката приватна потрошувачка.
„Многу домаќинства веќе штедат повеќе затоа што се загрижени за иднината, а лошите вести од пазарот на трудот само го зајакнуваат тој тренд“, рече Фуст.
Фото: принтскрин
Европа
Принцот Хари оди во Велика Британија на третата годишнина од смртта на неговата баба, кралицата Елизабета

Британскиот принц Хари ќе пристигне во Обединетото Кралство на 8 септември, на третата годишнина од смртта на неговата баба, кралицата Елизабета Втора, за да присуствува на церемонијата на доделување награди за добротворната организација. Хари живее во Калифорнија откако се повлече од кралското семејство во 2020 година. Тој ќе се врати во својата татковина за да присуствува на 20-годишнината од наградите „Велчајлд“, се вели на веб-страницата на добротворната организација.
Хари е покровител на добротворната организација веќе 17 години, а за време на настанот на 8 септември ќе се сретне со тешко болни деца и нивните семејства и ќе додели награда на „инспиративно дете“.
„Се чувствувам привилегиран што можам да присуствувам на наградите „Велчајлд“, рече Хари.
Неговото враќање во Обединетото Кралство сигурно ќе ги разгори шпекулациите за помирување со кралското семејство, пишува агенцијата Франс Прес. Хари во интервју за Би-би-си во мај изјави дека сака да се смири со својот татко, кралот Чарлс III. Истиот месец, 40-годишниот принц последен пат беше виден во својата татковина, каде што пристигна на судско рочиште.
„Мејл он Сандеј“ објави фотографии во јули од состанокот меѓу кралот и советниците на Хари, што беше протолкувано како прв чекор кон помирување. Кралицата Елизабета II почина на 8 септември 2022 година, во нејзината шкотска резиденција Балморал. Принцовите Вилијам и Хари последен пат беа видени заедно неколку дена подоцна во замокот Виндзор.
Расколот меѓу Хари и кралското семејство дополнително се влоши на почетокот на 2023 година, кога принцот ги објави своите мемоари, во кои беше особено критичен кон својот брат и принцезата Кејт.
фото: принтскрин