Црна хроника
Алити: Најверојатна причина за пожарот во Пошта е старата инсталација, нема жртви
Нема жртви во големиот пожар што во вторникот попладне ја зафати главната зграда на Македонски пошти, а директорот Рафиз Алити се сомнева дека причина за пожарот е старата инсталација
Директорот на Македонски пошти, Рафиз Алити, бил во просториите на поштата кога избувнал пожарот, малку по 16.30 часот во вторникот. Соработниците го известиле дека избувнал пожар на третиот кат, а според првичните претпоставки причина за инцидентот е стара инсталација
Во моментов, како што јавува репортерот на Макфакс, од зградата на Македонски пошти не се гледаат пламени јазици, но и натаму од објектот се издигаат столбови чад.
„Додека бев во мојот кабинет дојдоа вработените и ме известија дека избувнал пожар на третиот кат. Заедно со соработниците почнавме да гаснеме тоа што можевме и им реков на луѓето да излезат надвор. Покритична беше состојбата на една жена. Поточно немавме пристап до неа, таа беше извлечена со противпожарни скалила од третиот кат. Човечки жртви нема“, рече директорот Алити во изјавата за новинарите.
Алити пред зградата беше во придружба на министерот за транспорт и врски Миле Јанакиески и градоначалникот на Град Скопје Коце Трајановски.
„Засега не можеме да кажеме што е причината за пожарот. Најверојатно пожарот избувналво ткн сервер салата, но потенцирам најверојатно. Истрагата тоа треба да го покаже. Ние претпоставуваме засега дека причината за огнот е од старата инсталација. Велам, претпоставуваме затоа што засега не можеме со сигурност да кажеме од што избувнал пожарот“, додаде Алити.
Претходно според неофицијални информации од очевидци беше кажано дека попладнево се слушнала експлозија, и тоа најверојатно станува збор за експлозија на плинска боца, меѓутоа подоцна оваа информација беше демантирана од директорот Алити./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Скопјанец измамен во менувачница од двајца странски државјани
Скопјанец пријавил дека во менувачница во Старата скопска чаршија бил измамен од страна на двајца странски државјани за сума од 25.000 евра, информираат попладнево од Министерството за внатрешни работи.
Синоќа во 19.15 часот во СВР – Скопје, Х.М., на возраст од 34 години од главниот град на државава, пријавил дека околу 15 часот во менувачница во Старата скопска чаршија бил измамен од двајца странски државјани.
Според пријавеното, откако се договориле во менувачницата да сменат пари за 25.000 евра, лицата дошле со чанта со договорената сума на пари во денари, при што еден од нив ја заменил чантата со денари со друга иста чанта, која во долниот дел била полна со хартиени ливчиња.
Како што пријавил Х.М., тој им ги дал еврата без да ја провери чантата, а откако заминале, сфатил дека е измамен, појаснуваат од МВР.
Се преземаат мерки за расчистување на случајот.
Црна хроника
Пожар во Дом за стари лица во струмичко Банско, нема повредени
Пожар синоќа избил во Дом за стари лица во село Банско, Струмичко. Нема повредени лица, предизвикана е само материјална штета, соопшти Центарот за управување со кризи (ЦУК).
Според Регионалниот центар за управување со кризи – Струмица, пожарот бил пријавен околу 23.30 часот. Во гаснењето на пожарот интервенирале седум пожарникари со две противпожарни возила. Пожарот целосно е изгаснат во 50 минути по полноќ.
– Прво биле евакуирани лица од катот каде што бил пожарот, потоа од долните катови. По целосното гаснење на пожарот, евакуираните лица полека се вратени на местата, собите од каде што биле евакуирани. Причината за пожарот и материјалната штета дополнително ќе бидат утврдени, појаснуваат од ЦУК.
Во денешното соопштение се наведува и дека изминатото деноноќие имало вкупно 1.759 повици на единствениот повикувачки број за итни случаи – 112 во ЦУК.
Црна хроника
Притвор за осомничен за спречување на полициски службеници да фатат побегнат затвореник
Основното јавно обвинителство Кавадарци поведе постапка против 18-годишник за кого постои основано сомнение дека сторил кривично дело – Спречување службено лице во вршење службено дејствие од член 382 став 3 во врска со став 2 и став 1 од Кривичниот законик.
На 2 мај, во куќа на улицата “Димката А. Габерот” во Кавадарци, двајца инспектори од МВР преземале службено дејствие – фаќање побегнат затвореник од КПУ Гевгелија, кој бил роднина на сега осомничениот.
Затвореникот давал отпор при обидот да биде лишен од слобода за доизвршување на затворската казна, во што сега осомничениот го поддржал, се нафрлил врз еден од полициските службеници, го влечел и го гребел, нанесувајќи му телесни повреди.
Затвореникот успеал да се ослободи и да побегне, но подоцна бил фатен и вратен во затворот. Осомничениот исто така избегал во прв момент, но бил лишен од слобода, а по предлог на јавниот обвинител, Основниот суд во Кавадарци му определи притвор во траење од осум дена.