Црна хроника
Нова кривична против Петрески, незаконски вработувал пред избори
СВР Охрид во петокот поднесе кривична пријава против А.П.(50) од Охрид поради постоење основи на сомнение дека во својство на градоначалник противправно вработил 165 лица пред локалните извори во 2013 година.
Поранешниот градоначалник на Охрид од претходно се наоѓа во притвор, откако МВР против него и негови соработници поднесе кривични пријави поради сомневање за сторени неколку кривични дела.
Најновата кривична пријава се однесува на периодот декември 2012 до март 2013 година. Пријавениот, според СВР Охрид, во својство на градоначалник на Охрид, делувајќи по претходна умисла, веројатно со намера да се стекне со што поголемо општествено влијание како кандидат за Градоначалник во пресрет на Локалните избори 2013, спротивно на Законот за работни односи противправно склучил сто шеесет и пет договори за времени вработувања и вработувања со договори на дело без за тоа да постои било каква оправдана или издржана потреба.
Тоа го направил без претходно да има соодветни писмени барања од страна на раководителите на сектори и другите организациони единици во рамките на општинската адмистрација, без да постои соодветна систематизација донесена во законска пропишана постапка и без да биле обезбедени доволно средства во буџетот на општината Охрид. Со оваа постапка се надминале предвидените буџетски средства за 1.146.542 денари во 2012 година и за 2.297.574 денари во 2013 година. Со тоа пријавениот ги пречекорил границите на неговите службени овластувања и ги прекршил одредбите од Законот за работни односи, со што и нанесол вкупна материјална штета на општина Охрид во износ од 5.650.496 денари.
Од вкупниот број на изготвени и потпишани договори за времени вработувања и договори на дело од негова страна, на работни места со работни задачи и задолженија согласно потпишаното се јавувале само дваесет и три лица, додека останатите сто четириесет и пет лица воопшто не оделе на „работните места“, се вели во соопштението.
Во периодот од 2008 до 2012 година, во период кога сметката на општина била блокирана со судски решенија, пријавениот А.П. вршел фиктивни вработувања на лица во туристичкото биро “Лихнидос“ ДООЕЛ од Охрид. Тој, со цел исплата на плати за таквите противзаконски вработувања во ТБ „Лихнидос“, од управителите кој тој лично ги избирал и назначувал во претходен меѓусебен договор, побарал истите врз основа на фиктивни т.н. „договори за деловна соработка“ да изготват вкупно 44 фиктивни фактури за извршени услуги во вкупна вредност од 5.819.300 денари. Таквите фиктивни фактури тие ги доставувале до пријавениот Петрески, кој во својство на градоначалник на општината, „приоритетно“, односно веднаш давал налог за нивна исплата. На тој начин, пријавениот Петрески го сторил кривичното дело за кое се товари, а по основ исплата на фиктивните 44 фактури, предизивикал материјална штета на буџетот на општината од 5.819.300 денари, велат од охридската полиција. /крај/.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.