Македонија
Заев: Добро е што сите сме заедно кога е во прашање заштита на здравјето на граѓаните

По средбата меѓу сите лидери на политичките партии, претседателот на СДСМ, Зоран Заев, рече дека неговата партија наместо митинзи, кампањата ќе ја води преку социјалните мрежи, медиумите, преку вклучувања во живо. Тој кажа дека најважно е здравјето на граѓаните, а мерките мора сите да ги почитуваат. На средбата не се разговарало за одложување на изборите, рече Заев, потенцирајќи дека е несериозно да се разговара за тоа прашање 30 дена пред одржувањето.
„СДСМ веќе се обидува да има други начини за компензација на големите митинзи и јавни настани. Преку интернет-порталите, ‘Фејсбук’, лајв-стриминзи и вас, медиумите,ќе биде кампањата. Сè друго е од секундарно значење, најважно е здравјето на граѓаните. Не се зборуваше за изборите. Она што можам да го кажам е дека несериозно и неодговорно уште сега да разговараме дали по 30 дена ќе се одложат изборите. Мерките се до 24 март, два дена до кампањата. Несериозно е од сега да се зборува за тоа, ќе видиме какви ќе бидат информациите тогаш“, рече Заев.
Средбата со лидерите на другите партии ја оцени како конструктивна на која се разговарало за решенија на институциите за справување со коронавирусот.
„Добро е што сите сме заедно кога во прашање е заштита на здравјето на граѓантие. Тоа е највисок приоритет на сите институции и сите политички субјекти. На сила се сите мерки. Утврдивме дека начинот на водење на предизборната кампања ќе биде согласно препораките на Министерството за здравство и владините институции. Овие мерки се за справуавње со ситуацијата. Имаме должност сите да ги почитуваме. Апелирам до сите политички партии да не мрднеме ни милиметар од препораките. Уверен сум дека заедно оваа состојба ќе биде набрзо надмината“, додаде Заев.
Прашан дали ќе понесе оставка ако СДСМ изгуби на претстојните избори, Заев кажа дека сите релевантни анкети и впечатоци кажуваат дека тие ќе ја понесат победата и ќе ја добијат довербата од граѓаните.
„Јас немам ништо ново да кажам, СДСМ ќе победи. Коалицијата е најбројна, најразнолика. Напротив, сите релевантни анкети покажуваат дека ние водиме. Да ги оставиме граѓаните да ја донесат одлуката. Изборите се најрелеванта анкета. Не помислуваме на други алтернативи, убедени сме согласно сите впечатоци и аналити дека граѓаните ќе ни дадат повторно да ја водиме власта“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.