Скопје
Јакимовски одржа предавање пре студентите на УТМС
Градоначалникот на скопската општина Карпош, Стевчо Јакимовски, пред студентите од Универзитетот за туризам и менаџмент од Скопје, одржа во понеделникот презентација на тема „Oсврт на менаџирањето на локалната самоуправа“.
Преку едукативно предавање, тој ги запозна студентите кои студираат на насоката за туризам и економија, за функционирањето на една Општина. Во прв ред, Јакимовски истакна дека функцијата градоначалник подразбира не само политички, туку и менаџерски вештини и ова е работата во која се пронаоѓа најмногу и која од се срце ја работи.
„Квалитетот на услугите кои ги дава локалната самоуправа се од витално значење за функционирањето на целокупниот државен апарат, затоа што најчесто граѓаните велат дека и оние ингеренции кои што ги нема локалната самоуправа, сепак се обврска на локалната самоуправа. Ако локалната самоуправа не дава соодветни резултати, тогаш јасно е дека се рефлектира и врз останатите државни институции“, рече градоначалникот на општина Карпош.
Во рамките на презентацијата, градоначалникот пред студентите Јакимовски образложи какви приходи се слеваат во локалната самоуправа, за што се трошат и каде се употребуваат, секако во прилог на жителите на Карпош. Политиката на локалната власт ја решава Советот на општина Карпош, предводен од претседателот на Советот и секретарот кои донесуваат одлуки во договор со советниците, рече.
Јакимовски истакна дека притоа анкетите кои се спроведуваат меѓу жителите преку целата година за тоа колку тие се задоволни од образованието на своите деца и внуци, здравствената заштита и хигиена во основните училишта и градинки, кои се во надлежност на локалната самоуправа не се изоставаат, туку се главен ориентир во планирање на идните активности.
Посебна акцент градоначалникот Јакимовски стави на делот на имотно-правните односи, како и на урбанизација. Општина Карпош е единствена општина која има развиено 14 урбани заедници, каде во секоја заедница има претседател и одлична комуникација со граѓаните. „Сево ова, се должи на работа и труд, бидејќи локалната самоуправа треба да биде најдобар сервис на информации и услуги за граѓаните“, порача Јакимовски кој по предавањето одговараше на прашања поставени од студентите на кои даде соодветни и опширни одговори./крај/мф/сд
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Посебен режим на сообраќај во Скопје в сабота
Министерството за внатрешни работи ги известува граѓаните на Скопје дека на 04.05.2024 (сабота), поради одржување на манифестација по повод годишнината од смртта на македонскиот револуционер Гоце Делчев во црквата „Св. Спас“ во Скопје, Единицата за безбедност на патниот сообраќај при СВР Скопје по потреба ќе преземе мерки за посебен режим на сообраќајот, односно по потреба за сообраќај ќе биде затворена улицата „Самоилова“ на потегот од улицата „Иљо Војвода“ (виадукт Самоилова) до крстосница со улицата „Прохор Пчински“.
Министерството за внатрешни работи, исто така, ги известува граѓаните на Скопје дека на 04.05.2024 (сабота), Единицата за безбедност на патниот сообраќај при СВР Скопје ќе воведе посебен режим на сообраќај за одредени сообраќајници во централното градско подрачје на Град Скопје, како и во општините Ѓорче Петров и Аеродром.
На 04.05.2024 во периодот од 18.00 часот до завршување на манифестацијата по повод верскиот празник Воскресение Христово Велигден, во центарот на градот по потреба за сообраќај ќе бидат затворени: 1. Бул.„Партизански одреди” од крстосницата со ул.„Франклин Рузвелт” до крстосницата со бул.„ВМРО”. 2. Бул.„Св.Климент Охридски” од крстосницата со бул.„Илинден” до крстосницата со ул.„Димитрие Чуповски”. 3. На возилата од јавниот градски превоз, кои поминуваат преку мостот „Гоце Делчев”, по потреба ќе им се менува трасата на движење, при што ќе се движат по бул.„Илинден” и преку ул.„Франклин Рузвелт” ќе се вклучуваат на бул.„Партизански Одреди”, додека автобусите кои што поминуваат преку Центар ќе се движат по ул.„Митрополит Теодосиј Гологанов”, по што преку ул.„Франклин Рузвелт” ќе се вклучуваат на бул.„Партизански Одреди”.
Во спротивна насока автобусите ќе ги користат истите сообраќајници. Во општина Ѓорче Петров, по потреба, за сообраќај ќе се затвора ул.„Македонска војска“ пред црквата „Свети Петар и Павле“ на потегот од крстосница со бул.„Партизански Одреди“ до ул.„Ѓорче Петров“.
Во општина Аеродром, по потреба, за сообраќај ќе биде затворен локалниот пат кон село Лисиче. Исто така, по потреба за сообраќај ќе бидат затворани и други сообраќајници кои гравитираат околу верските објекти. Секторот за внатрешни работи Скопје апелира до граѓаните да ги почитуваат наредбите кои ќе ги даваат полициските службеници по сообраќајниците каде што ќе се одвиваат настаните.
Скопје
100 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територија на град Скопје изречени се вкупно 100 мерки, меѓу кои за возење без возачка дозвола 14 санкции, 12 мерки за користење мобилен телефон при возење, пет санкции за некористење сигурносен појас…“, велат од МВР.
Од таму додаваат дека сообраќајните контроли продолжуваат и во наредните денови.
Скопје
Нема да се наплаќа паркирањето во Центар за време на Велигденските празници, извести ПОЦ
Паркирањето во oпштина Центар за време на Велигденските празници ќе биде без наплата за сите граѓани. На 03.05.(петок), 05.05. (недела) и 06.05.2024 година (понеделник) граѓаните ќе можат да паркираат без надомест на сите паркиралишта со кои стопанисува ЈП Паркинзи на Општина Центар, извести ПОЦ.
Согласно програмата за неработни денови за 2024 година на Министерството за труд и социјална политика, 04.05.2024 година (сабота) е работен ден и следствено на тоа паркиралиштата со кои стопанисува ЈП ПОЦ ќе работат со вообичаено работно време.
Депото на „Пајак“ службата на ЈП ПОЦ ќе работи 24/7 за време на празниците.
Редовната наплата за паркирање на паркиралиштата и издавање на договори во Дирекцијата на ЈП ПОЦ ќе продолжи на 07.05.2024 година (вторник) со вообичаено работно време, се додава во соопштението на ПОЦ.