Македонската асоцијација на новинарите – МАН бара од државата, во случајот од Владата, да донесе најбргу што може одлука со која медиумите се ослободуваат од плаќање даноци и придонеси за своите вработени во време на заштитните мерки прогласени од почетокот на март, па сè до завршување на вонредната состојба.

„Исто така, Владата да донесе одлука со која ќе врши субвенција, надомест на нето-платите на новинарите, фоторепортерите, снимателите и нивната логистика во износ од 50 отсто откако медиумите ќе бидат привремено ослободени од обврската за плаќање на даноците и придонесите.

Оваа мерка не е голем финансиски товар за државата, а ќе спречи откази за новинари, сниматели, фоторепортери и нивната логистика, па и гаснење медиуми, кои во овој период се без приходи. Со рестрикција на новинарската работа, ќе ги снема и информациите и ќе доминираат лажните вести, паниката меѓу населението и дезинформациите, што е закана за јавниот живот и за последиците од епидемијата.

Одлуката да се однесува за сите медиуми што се регистрирани како правни лица во Агенцијата за медиуми, ММА, „ИАБ Македонија“, а со листата располага и ДИК.

Новинарите, уредниците, снимателите и фоторепортерите и во вие времиња на вонредна состојба и епидемија на заразен коронавирус си ја вршат својата работа, која е од јавен интерес и од која јавноста ги добива сите релевантни информации, а од кои зависи општата состојба во државата, како и личната судбина на граѓаните.

Новинарите се на работни задачи кои не може ниту да ги одложат ниту да ги работат од безбедна дистанца, исто како и лекарите, медицинскиот персонал, полицијата или војската. Без нивната работа, не би постоеле информациите и спроведувањето на одлуките од витален интерес за оваа кризна, вонредна состојба“, се наведува во барањата на МАН.