Европа
Украинците се повлекуваат од Дебалцево, бунтовниците го повлекуваат оружјето од југот
Припадниците на украинската војска коишто беа речиси цел месец опколени од рускојазичните бунтовници во стратешки важниот град Дебалцево на побунетиот исток од Украина, во средата започнаа да се повлекуваат низ коридорот кон внатрешноста на земјата, изјавил Семен Семенченко, украински пратеник и командант на доброволната бригада составена претежно од припадници на националистичките движења.
Претходно во вторникот навечер во Будимпешта рускиот претседател Владимир Путин повторувајќи ги предупредувањата дека обидот на неколкуте илјади украински војници опкружени во Дебалцево да го пробијат обрачот или да бидат деблокирани од надвор може да го разгори судирот, ги повика властите во Киев да не вршат притисок врз војниците кои во вторникот почнаа да се предаваат откако бунтовниците заземаа по уличните борби повеќе од две третини од градот, а командантите на проруските сили ги повика да остават коридор за безбедно повлекување на украинските единици.
„Извлекувањето на војниците од Дебалцево се одвива планирано и организирано“, изјави Семенченко, пренесува руската агенција РИА Новости.
Подоцна тој на Facebook напиша „Непријателот се обидува да ги пресече приодните патишта и да го спречи излегувањето (од градот) на војниците“.
Истовремено рускојазичните бунтовници објавија дека украинските војници од Дебалцево и во средата почнале да се предаваат и да го положуваат оружјето.
„Во Дебацлево во тек е масовно предавање на оружјето од украинските вооружени сили. Станува збор за стотици луѓе“, изјави еден од челниците на бунтовниците Максим Лишченко, кого го пренесува Донецката агенција за новости (ДАН), официјален медиум на самопрогласената ткн „народна република“ во Донецк.
Истовремено репортерот на агенцијата РИА Новости од Дебалцево изјави дека бунтовниците продолжиле со повлекувањето на тешкото вооружување на воената опрема од разни сектори, односно дека артилериските оружја со голем калибар се повлекуваат само од оние позиции на кои се почитува прекинот на огнот.
Според бунтовниците во моментов артилеријата со најголем калибар се повлекува од јужните периферни области на „републиката“.
„Во моментов ја повлекуваме артилеријата, хаубици. Доколку разузнавањето ни потврди дека украинската страна не го повлекла оружјето, ние нашето ќе го вратиме на претходните позиции. Во моментов имаме информации за групирање на украинската воена опрема на спротивните позиции“, изјавиле за РИА Новости извори од одбраната на Донецк./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.