Македонија
Димитров: Не смееме да бидеме рамнодушни, нè чека многу до заокружување на членството во ЕУ

Министерот за надворешни работи, Никола Димитров, рече дека до добивањето на датумот за преговори со ЕУ биле донесени храбри политички одлуки, дека патот не бил едноставен, но и порача дека земјата треба напорно да работи на реформите до заокружување на целиот процес.
„Советот за општи работи на нивно на министри на ЕУ денес даде политичка согласност за заклучоците, кои се многу позитивни и охрабрувачки за нас. И покрај вонредните околности предизвикани од ситуацијата со коронавирусот, цениме што ЕУ најде волја и време да оддаде признание за досега сработеното. РСМ по 15 години во чекалницата на ЕУ и по разочарувањата во јуни 2018 и јуни 2019 и во октомври истата година, конечно, го поминува прагот и ќе може да ја почне следната фаза на својот европски пат. Од сега и ние ќе имаме почетна точка од кога почнуваме да го мериме времето. Ќе имаме позитивен натпревар во спроведувањето на реформите и достигнувањето на европските стандарди. И доега, но и отсега па натаму уште повеќе зависи од нас самите. Конечно, земјата безусловно ги почнува преговорите за членство во ЕУ. Советот недвосмислено ќе потврди дека Северна Македонија остварила опипливи и одржливи реформски резултати. Советот ја поканува Комисијата веднаш да поднесе предлог-рамка за преговорите, како и да ја почне неопходната подготвителна работа. Првата меѓувладина конференција ќе биде свикана што е можно побргу по завршување на преговарачката рамка. Советот ја повикува Комисијата да го дозаврши скрининг-процесот почнувајќи со кластерот за фундаменталните вредности“, рече Димитров.
Тој им се заблагодари на граѓаните што не ја изгубиле вербата во европските вредности и порача дека сега државата ја чека многу работа за да го изоди преостанатиот дел од патот, односно до затворањето на поглавјата и, конечно, членство во ЕУ.
„Ја одработивме и ја заслуживме шансата. Изодивме тежок пат, во вонредни околности, кои моравме да ги поминеме и да направиме сè да излеземе од заробената држава. Го склучивме преспанскиот договор, ги усвоивме уставните амандмани. Не беше едноставно, но покажавме визија, разумност и политичка храброст. Сега е важно да ви се заблагодариме вам, на граѓаните, за непоколебливата верба. Исполнивме дел од заветот на нашите баби и дедовци и отвориме перспектива за нашите деца. Патот натаму нема да биде лесен ако ѝ се препуштиме на рамнодушноста. Повторно од нас ќе зависи како ќе го минуваме тој пат“, рече Димитров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јавен увид во Избирачкиот список од сабота до 11 септември

Од сабота, 23 август, до 11 септември граѓаните можат да го проверат Избирачкиот список и да поднесат барања за запишување, дополнување или бришење на податоци. Барањата се поднесуваат писмено до ДИК, по електронска пошта или преку месните канцеларии, а решенијата се носат во рок од 24 часа.
Заклучениот Избирачки список ќе биде готов најдоцна на 3 октомври, додека политичките партии ќе можат да го проверат списокот и да поднесат свои барања до 19 септември. Податоците за граѓаните кои поднеле барање за лична карта, ќе се впишат по службена должност, како и податоците за лицата во затвор или установи за вонсемејно згрижување.
Македонија
УЈП: Истече рокот за плаќање на месечните обврски за јули – повик за подмирување на долговите

По истекот на законскиот рок за плаќање на месечните аконтации за данок на добивка и исплатата на јулските плати со придонеси, Управата за јавни приходи утврди значителен број на неплатени обврски.
„Од 2.129 даночни обврзници не е извршено плаќањето на месечната аконтација за данок на добивка за јули 2025 година, а кај 11.555 обврзници не е евидентирана исплата на бруто плати и социјални придонеси за истиот месец. Дел од неплатените аконтации може да бидат подмирени преку пребивање со даночни побарувања, но тоа не ги исклучува законските обврски и потребата тие да се сервисираат во рок“, се наведува во соопштението.
Управата за јавни приходи во текот на вчерашниот ден достави персонализирани известувања до сите обврзници со неплатени обврски и апелира веднаш да го извршат плаќањето.
Овие средства се дел од јавните приходи кои припаѓаат на граѓаните и обезбедуваат редовно финансирање на буџетските потреби, здравството, образованието и социјалната сигурност.
УЈП остро потсетува дека во следните денови ќе се преземат законските мерки за присилна наплата.
Македонија
Судир за српскиот капитал: ВЛЕН и ДУИ меѓусебно се обвинуваат

ВЛЕН и ДУИ, двете водечки политички субјекти од албанскиот блок во Македонија, се препукуваат поради наводно продирање на српски капитал и влијание во земјата.
Според соопштението на ВЛЕН, ДУИ одамна престанала да ги штити интересите на Албанците, откако, како што тврдат, дозволила влез на српски и црногорски компании во клучни економски сектори, вклучително и мобилната индустрија и казината.
„ДУИ го донесе ‘српскиот свет’ во срцето на земјата, го воведоа МТЕЛ, дозволија пенетрација на српските подземни структури и преку Бујар Османи работеа за Белград и против Косово“, се наведува во соопштението. ВЛЕН најавува дека ќе продолжи да ги брани евроатлантските вредности и националните интереси на Албанците.
ДУИ, пак, одговара дека ВЛЕН во изборната програма за 2024 година ветила основање на Албанска банка со доминантен албански капитал, како гаранција за економско зајакнување на Албанците и рамномерен регионален развој. ДУИ повторно нагласува дека државата не смее и не треба да дозволи банкарскиот сектор и стратешките институции да бидат преземени од дестабилизирачките интереси на Белград.
И двете партии со денови се обвинуваат една со друга за предавство на интересите на Албанците и за поддршка на т.н. „Српскиот свет“ во Македонија. Со оглед на предизборието, се очекува дека оваа тема ќе се најде во политичката дебата.