Заврши распитот на заштитениот сведок кој во присуство на обвинетите и нивните бранители даваше исказ до доцна навечер во петокот во скопскиот Основниот суд 1.

„Откако сведокот доби статус на загрозен со него се преземаат мерки од септември, а тоа е идентификација на лица по фотографии“, изјави истражниот судија, Владимир Туфегџиќ.

Не е познато дали сведокот е директен очевидец на петкратното убиство на Смилковското езеро, а неговиот исказ не смее да биде пренесен во јавноста.

Адвокатот на обвинетите, Насер Рауфи, не даде изјава за медиумите, бидејќи од судот тоа не му било дозволено.

Сведокот бил сослушуван во друга просторија, неговиот глас бил мутиран, а ликот заматен, бидејќи ова сведочење може да го изложи на опасност.

Претходниот заштитен сведок во истрагат за случајот „Монструм“, Хаки Хазири, побара да му го одземат статусот на сведок и сега е осомничен за помагање во тероризам.

Исрагата за овој случај во кој беа убиени четири млади момчиња и еден повозрасен маж на 12-ти април годинава, треба да заврши до крајот на октомври и на 27-ми октомври треба да биде покренато обвинение.

Алил Демири, Африм Исмаиловиќ и неговиот брат Агим, се товарат дека се директни извршители на петкратното убиство, а Фејзи Азири и Рами Сејди се осомничени за помагање.

Тројца од осомничените се во притвор, додека Африм Исмаиловиќ и Алил Демири, се во бегство. /крај/фф/сн