Македонија
Со чартер-лет од Лондон се вратија 130 македонски граѓани
По девет чартер-лета за враќање македонски државјани од Малта, Хрватска, Словенија, Германија, Австрија и од Швајцарија, денеска, во соработка со македонската амбасада во Лондон, Генералниот секретаријат на Владата, МВР и Министерството за здравство, МНР организира чартер-лет за враќање на затекнатите граѓани во Обединетото Кралство.
Од аеродромот „Лутон“, во близина на Лондон, со лет на „Визер“ вратени се 130 македонски граѓани, а на летот кон Скопје, во соработка со британската амбасада во земјата, беа превезени 60 странски државјани од Обединетото Кралство, САД и од Австралија.
„Денеска, се организира четвртиот по ред хуманитарен конвој, овој пат од Босна и Херцеговина и Црна Гора, со што во земјата ќе се вратат вкупно 64 македонски граѓани со 19 возила“, соопшти МНР.
Во изминатите неколку дена, во соработка со министерствата за надворешни работи на повеќе држави и во координација со нашите дипломатско-конзуларни претставништва, на 30 наши граѓани од САД и Австралија им беше обезбедено непречено да транзитираат низ неколку држави со цел да дојдат до финалната дестинација, аеродромите во Софија и Солун.
Со ова, вкупниот број репатрирани граѓани во нашата земја, заклучно со денес, е 2.431.
Министерството за надворешни работи упатува благодарност кон надлежните власти во Бугарија, Грција, Албанија, Црна Гора, Босна и Херцеговина, Косово, Швајцарија, САД, Австралија, Холандија и во Велика Британија за соработката и обезбедување непречен транзит, како и за и целокупната поддршка во овие отежнати околности.
МНР продолжува со напорите за враќање во земјата на затекнатите македонски граѓани во странство; во следните денови предвиден е и чартер-лет за репатријација од Белгија и Франција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Гаши на средба со Ердоган: разменети мислења за унапредување на соработката и за актуелните случувања во регионот и пошироко
Претседателот на Собранието на Република Северна Македонија, Африм Гаши, во придружба на пратениците: Бејџан Иљас, претседател на пратеничката група за соработка со Парламентот на Република Туркије, Никола Мицевски, Оливер Спасовски, Мерита Колчи Коџаџуку и Беким Сали, од 2 до 5 октомври 2024 година претстојува во официјалната посета на Република Туркије, на покана од Нуман Куртулмуш, претседател на Големото национално собрание на Туркије, известуваат од кабинетот на Гаши.
Во рамките на посетата, претседателот на Собранието на Република Северна Македонија, Африм Гаши, оствари средба со претседателот на Република Туркије,Реџеп Тајип Ердоган, на која присуствуваше и претседателот на големото национално собрание на Туркије, Нуман Куртулшуш, како и претседателите на парламентарните групи за соработка и пријателство од двете собранија, пратениците Бејџан Илјаз и Ахмет Килич.
На средбата беа разменети мислења за унапредување на одличната соработка меѓу Република Северна Македонија и Република Туркије, за состојбите во двете држави и за актуелните случувања во регионот и пошироко.
Гаши оствари средба и со министерот за надворешни работи Хакан Фидан, по што се одржа и заедничка средба со пратениците членови на Делегацијата.
Гаши истакната дека средбата претставува можност Република Северна Македонија и Република Туркије да ја зајакнат долгогодишнатаактивна и успешна соработка. Тој оцени дека неодамнешната посета на министерот Фидан на Република Северна Македонија, како и неговата посета на Туркије, се потврда за високото ниво на билатерални односи меѓу двете традиционално пријателски земји и НАТО-сојузници.
Гаши нагласи дека високо ја вреднуваме успешната соработка со Република Туркије во сите полиња и изрази голема благодарност до Туркије, која од самиот почеток беше принципиелен подржувач на нашето членство во НАТО.
Министерот Хакан Фидан ја потврди безрезервната поддршка на Туркије за Северна Македонија на сите полиња и се осврна на потребата за интензивирање на соработката во полето на економијата, реафирмирајќи ја заложбата за зголемување на трговската размена меѓу двете земји.
На средбата беше нагласено значењето на меѓупарламентарната соработка и парламентарната дипломатија за билатералните и мултилатералните односи, во однос на унапредувањето на политичкиот дијалог и зголемувањето на динамиката на севкупната соработка меѓу земјите.
Гаши и пратениците остварија средба и со Ерол Озвар, претседател на Советот за високо образование на Туркије и членови на Советот. На средбата, високата собраниска делегација беше информирана за активностите на ова тело во насока на стратешко планирање на високото образование, координација меѓу универзитетите и воспоставување и одржување механизми за обезбедување квалитетно високо образование. Стана збор и за можностите за унапредување на соработката меѓу Република Северна Македонија и Република Туркије на полето на високото образование, соопшти кабинетот на Гаши.
Македонија
(Видео) ЦУК: Гасењето на пожарот во скопски Чаир се одвива отежнато, се вклучува и специјално противпожарно возило на Армијата
Гасењето на пожарот во скопски Чаир се одвива отежнато поради големата количина на чад и високата температура во подрумите во кои била складирана поголема количина на запаливи материјали, информираат од Центарот за управување со кризи.
Дополнително како помош на скопските пожарникари ќе пристигне специјално противпожарно возило на Армијата, појаснуваат од центарот.
„БППЗ на Град Скопје од 01.50 часот гасне запален магацин на неутврдена површина на ул. „Прохор Пчински“ во Скопје. Интервенцијата ја извршува со 7 возила и 20 пожарникари. На лице место освен единици од БППЗ кои го гасат пожарот се и полиција и Итна медицинска помош. Според утринскиот службен извештај од БППЗ, еден пожарникар бил однесен на токсикологија поради големо количество вдишан чад (Општина Чаир)“, соопшти ЦУК.
Македонија
Ахмети не сака да влезе во Влада: Не сме резервна гума
Првиот човек на ДУИ, Али Ахмети, денеска на конференцијата „100 дена скандали, понижувања и неуспеси“, изјави дека Европскиот фронт не е заинтересиран да стане дел од Владата, бидејќи, како што додаде, тие не се резервна гума.
Ахмети рече дека Европскиот фронт е легитимен претставник на Албанците и помалите етнички заедници, додавајќи дека ВЛЕН не победи на изборите.
„Ние сме легитимните претставници на Албанците, тие не победија на изборите“, рече првиот човек на ДУИ, Али Ахмети.