Европа
Министрите за финансии на ЕУ постигнаа договор за мерките за ублажување на последиците од пандемијата
Министрите за финансии на ЕУ успеаја доцна синоќа во втор обид да постигнат договор за економските мерки кои ќе ги преземат како одговор на кризата предизвикана од пандемијата на коронавирус.
Министрите за финансии од сите земји членки на ЕУ, а не само 19 членки на еврозоната, постигнаа договор за документот којшто ќе им биде испратен до шефовите на држави или влади за усвојување. Договорот вклучува краткорочни и долгорочни мерки.
Сите земји членки се согласуваат за краткорочните мерки: Кредитна линија на Европскиот стабилизациски механизам, фондот за гаранција на Европската инвестициска банка и програмата за поддршка на скратено работно време SURE.
Во однос на кредитната линија ЕСМ, најголема пречка биле целосно спротивставените позиции на Италија и Холандија – првата побарала заеми да се даваат без услови, а втората инсистирала на нив. Притоа е договорено дека ЕСМ може да се користи без услов за финансирање на трошоците за здравствена заштита, како резултат на пандемијата.
За да продолжат да ја користат оваа кредитна линија, земјите членки ќе треба да обезбедат почитување на економските и фискалните основи дефинирани во фискалната рамка на ЕУ.
Што се однесува до долгорочните мерки, односно за Фондот за закрепнување, договорено е дека тој е неопходен, но без да се наведат детали.
„Таквиот фонд би бил привремен, насочен, сразмерен со вонредните трошоци на тековната криза“, се вели во усвоениот извештај.
Во текстот не се спомнува прашањето за колективизација на долг, еврообврзници или коронаобврзници, но се користи терминот „иновативни финансиски инструменти“. Во врска со ова, претседателот на Еврогрупата, Марио Центено, ќе испрати писмо до претседателот на Европскиот совет, Шарл Мишел, во кое ќе се каже дека некои земји сметаат дека е неопходно да имаат заеднички инструменти за долгови и дека другите земји сметаат дека треба да се најдат „алтернативни начини“.
ЕСМ има кредитен капацитет од 410 милијарди евра, а заемите што можат да ги добијат членовите можат да бидат најмногу до два проценти од нивниот БДП. Ова значи дека кредитната линија може да достигне 240 милијарди евра, што одговара на двојно зголемување на БДП на еврозоната.
Министрите за финансии ја поддржаа иницијативата на Европската инвестициска банка (ЕИБ) за формирање гарантен фонд од 25 милијарди евра, загарантиран од земјите членки, кој ќе обезбеди заеми до 200 милијарди евра. Овие средства главно ќе бидат наменети за мали и средни претпријатија.
Исто така, поддржан е предлогот на Комисијата за поддршка на скратено работно време, која ќе биде загарантирана од сите земји членки и која ќе им помогне на компаниите во најтешко погодените земји да ги задржат работниците и да им исплаќаат плата.
Новиот инструмент, наречен SURE, треба да им овозможи на компаниите со потешкотии да го скратат работното време, а државата им плаќа на вработените плата за тие часови коишто не ги работат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Напаѓачот на Фицо доби мерка притвор за да не побегне и да не го повтори делото
Специјалниот кривичен суд во словачкиот град Пезинок, со силно полициско обезбедување денеска му одреди притвор на 71-годишниот Словак Јурај Цинтула, кој на 15 мај годинава во градот Хандлова со пет истрели го застрела премиерот Роберт Фицо и тешко го рани во стомакот.
Притворот за осомничениот е побаран поради опасност да не избега или да го повтори делото.
Осомничениот за нападот врз словенечкиот премиер Јурај Цинтула денеска призна вина.
Адвокатите предупредија дека признавањето на вината е спорно, бидејќи Цинтула веднаш по атентатот и апсењето бил сослушан во шок, без присуство на адвокат.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.
Европа
Професорка во Британија осудена за сексуална експлоатација на ученици, забременила со еден од нив
Професорка е прогласена за виновна за сексуално искористување на двајца тинејџери на кои им предавала во нивното средно училиште во Велика Британија. 30-годишната Ребека Џојнс ја дочека пресудата на слобода, но беше суспендирана од работа во училиштето.
Британските медиуми јавуваат дека Џојнс веќе била суспендирана и пуштена со кауција поради секс со 15-годишен ученик, идентификуван во пресудата како Момче А, кога почнала да има секс со друг ученик, момче Б, со кој подоцна останала бремена, пишува „Independent“.
На судот му било кажано дека и двете момчиња и праќале флертувачки пораки на „Snapchat“ пред таа да ги покани во нејзиниот стан.
Во случајот со првото момче, таа му го дала телефонскиот број, а како вежба за решавање проблеми, тој морал да ја погоди последната цифра. После тоа се поврзале на Снепчет и тој и праќал пораки во кои парот се договарал да се сретнат тајно.
Таа потоа го однела на шопинг и му купила скап појас. Полицијата подоцна ја пронашла неговата сперма во нејзината постелнина. Второто момчпе кажало дека врската со професорката започнала со бакнежи кога имал 15 години и со сексуални односи кога наполнил 16 години.
Џојнс пред судот се бранеше дека доживеала „нервно растројство“ кога била суспендирана од работа, по полициската истрага, и се вратила кај нејзините родители.
Џојнс на суд тврдеше дека никогаш немало сексуална активност со првото момче и дека врската со второто момче се развила додека таа била суспендирана од работа.
Таа плачела додека им кажувала на поротниците дека бебето што го родила и е одземено неколку часа по раѓањето и сега ѝ е дозволено да го гледа детето само три пати неделно. Таа беше прогласена за виновна по шест точки од обвинението за сексуална експлоатација на малолетници.