Европа
Италијанците мора да останат дома за Велигден, ќе бидат контролирани со дронови
Велигденските празници во Италија годинава ќе бидат одбележани со општи карантински мерки, во изолација, под строга контрола на копно и на море, со набљудување со беспилотни летала и хеликоптери за да се избегне собирање луѓе за празникот среде пандемијата на вирусот Ковид-19, кој однесе повеќе од 18.000 животи.
Жителите на Италија го пречекаа Велики петок со блокади, а Велигден ќе го одбележуваат без јавни собири како што е прославата на тој христијански празник во Ватикан, додека поглаварот на Римокатоличката црква, Франциско, ќе им се обрати на верниците преку телевизија и интернет.
Италијанскиот тенор Андреа Бочели ќе настапи в недела во празната миланска катедрала, што ќе го следат луѓето од целиот свет на интернет, а според Бочели, тоа нема да биде концерт, туку можност за заедничка молитва.
Во Италија, во текот на изминатите неколку дена има бројни случаи на кршење на мерките што ги воведе италијанската влада – според податоците повеќе од 10.000 прекршители за еден ден, поради што Министерството за внатрешни работи на земјата планира засилени контроли на сите патишта преку кои се излегува од градовите, како и викенд-населби, одморалишта, на сите подолги патишта и на автопатиштата.
Најавени се широко распространети контролни пунктови, контрола од воздух со дронови и хеликоптери, а на море со патролни бродови за да се избегнат излети со чамци и бродови.
Според мерките воведени во Италија за да се спречи ширењето на вирусот, сите граѓани мора да бидат во своите домови освен во случај да одат да купат намирници, во аптека, на лекар или да работат.
Сепак, италијанската влада го оневозможи и последниот „изговор“ за граѓаните да ги напуштат своите домови за Велигден и Велики понеделник, бидејќи сопствениците на супермаркетите и другите прехранбени продукти ќе бидат обврзани да ги затворат своите продавници в недела и в понеделник.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.