„Владеењето на Зоран Заев, како на локално, така и на централно ниво беше проследено со криминални и корупциски скандали. Во слободното време, кога не ги распродаваше националните и државни интереси, Заев тераше разработени криминални и рекет шеми“, велат од ВМРО-ДПМНЕ.

„Потрагично од криминалот на Заев е што неговиот наследник во СДС, Венко Филипче се воодушевува од него, вели дека нема друг како него и смета дека народот треба да учи од него и од неговото работење.

Една од криминалните афери на претходникот на Филипче, Зоран Заев, беше криминалната аферата Глобал, тешка осум милиони евра.

Заев требаше да заврши зад решетки затоа што жив беше фатен во криминал од 8 милиони евра, но од затвор се спаси затоа што беше амнестиран од Бранко Црвенковски.

Кога Филипче се воодушевува од Заев и вели дека народот треба да учи од него, дали мисли и на ова, како да се направи криминал тежок осум милиони евра и за тоа да не се одговара?

Венко Филипче треба да каже дали се воодушевува на криминалот на Заев, кој му донесе милиони евра, а благодарение на СДС остана неказнет.

Дали Филипче е воодушевен и од тоа и дали и на тоа мислеше кога го фалеше Заев? Или, пак, тој криминал и неказнивост можеби ќе го осуди?

Но, како вика народот, во секое зло, добро. Па така, во се ова, добро е што Венко Филипче призна и кажа се. Сега народот нема простор за двоумење и знае што Венко Филипче сака. Тој сака да ги следи криминалните стапки на Зоран Заев, кој е и негов водич и учител.

Со ова признание, Филипче уште еднаш се покажа СДС беше и останува симбол на криминал, корупција и предавства“, соопшти ВМРО-ДПМНЕ.

„Економската криза сè повеќе го погодува џебот на граѓаните, а Владата предводена од ВМРО-ДПМНЕ не само што не успеа да ја стабилизира ситуацијата, туку ја влоши со низа неефикасни и задоцнети мерки. Наместо системско решение за спречување на ценовните шокови, добивме маркетиншки трикови и привремени потези кои немаат реален ефект“, велат од СДСМ.

„Најдобар пример за тоа е таканаречената „новогодишна кошничка“, која се претстави како мерка за намалување на трошоците, но заврши како обична медиумска манипулација. Во реалноста, потрошувачката кошничка секој месец расте. Во април порасна за 836 денари – алармантен податок што покажува колку се неефикасни владините интервенции. Цените на основните прехранбени производи остануваат високи, а платите – особено во јавниот сектор – со месеци не мrdнаа од место.

Граѓаните денес живеат полошо од било кога во последната деценија. Северна Македонија има најниски плати во регионот, а истовремено плаќа едни од највисоките цени. Владата нема стратегија, нема визија, нема план. Наместо суштински политики, се сведоци сме на декларативни изјави и обвинувања кон опозицијата.

СДСМ уште пред месеци предложи пакет од седум закони кои директно ќе влијаеја на стабилизација на пазарот и на раст на платите. Да беа прифатени, денес ќе зборувавме за реални подобрувања во животниот стандард. Ќе се зголемеа платите, ќе се стабилизираа цените, а семејствата ќе имаа повеќе пари на крајот од месецот. Но владејачката партија ги игнорираше сите предлози, избирајќи да продолжи со популизам и политичко калкулирање наместо со конкретна акција.

Ако не се преземе ништо суштинско, животниот стандард ќе продолжи да паѓа. Граѓаните заслужуваат стабилност, достоинствени примања и достапни основни производи – нешто што оваа влада очигледно не е способна да го обезбеди“, соопшти СДСМ.

„Кичево, градот кој беше заборавен од минатите влади повеќе од две децении, денес се враќа на мапата на сериозни инвестиции благодарение на посветеноста на коалицијата ВЛЕН. Големиот проект за изградба на колекторски систем и модерна пречистителна станица за отпадни води, вреден над 1 милијарда денари од државниот буџет, веќе почна да се реализира“, велат од ВЛЕН.

„Овој проект претставува голем чекор напред во подобрувањето на квалитетот на живот на граѓаните на Кичево, а воедно и заштита на јавното здравје и животната средина. Но, не само тоа, по 22 години ветувања и политичка манипулација од страна на ДУИ, Зајаз на Али Ахмети конечно ќе има канализација. Неверојатно, но вистинито: ВЛЕН мораше да дојде на власт за да реши основен проблем во родното место на оној што владееше две децении без да ги реши проблемите на сопствената земја.

Овој проект беше на работ на неуспех кога ВЛЕН ја презеде владата: само 17% имплементација за 21 месец, изгубени ИПА фондови, нефункционален изведувач и целосен недостаток на институционален одговор од претходната влада, уште еден одраз на некомпетентноста и систематскиот неуспех што им се сервира на граѓаните со години.

Благодарение на директната интервенција на првиот вицепремиер, Изет Меџити, како и неуморната работа на колегите во Министерството за животна средина и просторно планирање, проектот беше спасен од целосен неуспех. Претходниот договор беше раскинат, побарана беше компензација, а преку нова, транспарентна и долгорочна набавка беше обезбедено целосно финансирање од државниот буџет за реализација на оваа стратешка инвестиција.

Кога другите се откажуваат, ние дејствуваме. Кога тие молчат, ние го носиме гласот на граѓаните во институциите. Кога тие прават пропаганда, ние донесуваме конкретна работа. Ова е филозофијата на ВЛЕН. Бидејќи за нас, иднината на граѓаните не е предмет на преговори, таа е обврска!“, соопшти ВЛЕН.