Германската канцеларка Ангела Меркел изјави во понеделникот вечерта дека договорот за примирјето во источна Украина не се почитува и дека мора да се стори сé за целосно да биде спроведен поширокиот мировен договор постигнат во февруари во белоруската престолнина Минск.

„Договорот за примирјето не е целосно спроведен и тоа значи дека има сé повеќе и повеќе жртви“, изјави германската канцеларка Ангела Меркел на заедничката прес-конференција со францускиот претседател Франсоа Оланд и украинскиот Петро Порошенко, пренесува Reuters.

Разговорите меѓу Меркел, Оланд и Порошенко биле концентрирани на одржувањето на кревкото примирје од Минска со кој е предвидено повлекувањето на тешкото вооружување и слободен пристап на набљудувачите на Организацијата за безбедност и соработка во Европа (ОБСЕ) во надгледувањето на прекинот на огнот, како и доделување на специјалниот статус на побунетите рускојазични региони Донецк и Луганск.

„Првиот и основен услов да се стори сé за договорот за примирјето да стане стварност. Таа задача значи дека она што го договоривме во Минск мора да се почитува. Тука сме да го спроведеме договорот од Минск, а не да го доведуваме во прашање“, истакна Меркел.

Повеќе од 6.800 луѓе, меѓу кои многу цивили и стотици деца, се убиени во судирите на истокот од Украина од април 2014 година. Двете страни повлекоа голем дел од тешкото вооружување од зоната на судирот во согласност со договорот од Минск, но повремено двете страни се обвинуваат за кршење на прекинот на огнот со жртви на двете страни. Во последно време, исто така, пристигнуваат загрижувачки обвинувања за трупање на нови сили во зоната на раздвојувањето.

Агенцијата DPA од изјавата на Меркел ја издвојува нејзината загриженост дека на набљудувачите на ОБСЕ не им се дозволува вршење на нивната мисија. „ОБСЕ мора да може да го надгледува судирот, но имаше напади а движењето на неговите набљудувачи се ограничува. Неговите беспилотни летала не можат да летаат поради постојаните пречки“, смета Меркел истакнувајќи дека е клучно набљудувачите да ја вршат својата мисија.

Германската канцеларка ги истакна и демократските избори во Украина, трговијата меѓу Украина и Русија, ослободувањето на заробениците и испораките на хуманитарна помош, како проблеми кои треба да бидат решени со натамошните разговори.

Рускиот претседател Владимир Путин не учествуваше на средбата во Берлин, за да се исполни ткн „нормандскиот формат“ од Минск, но Меркел рече дека бил консултиран телефонски. Германија овие берлински разговори ги гледа како настојување договорот од Минска да добие нов полет шест месеци откако беше потпишан во присуство на Путин. Според DPA, средба на четворицата челници е можна пред или на маргините од 70-та сесија на Генералното собрание на ОН кон крајот на септември,

Пред да отпатува за Берлин, Порошенко пред илјадници луѓе на прославата на Денот на независноста на Украина во Киев, изјави дека Русија распоредила 50.000 војници на границата предупредувајќи на „заканата од руска инвазија“. Тврди дека 9.000 руски војници во моментов се на украинска територија, како и дека рускојазичните бунтовници имаат 40.000 вооружени војници.

Порошенко на прес-конференцијата по средбата во Берлин им се заблагодари на Германија и Франција на поддршката и рече дека сака да продолжат разговорите со Москва.

„Не ни се потребни нови формати. Нормандискиот формат (Украина, Русија, Франција и Германија) е основниот формат и се покажа ефикасен“, рече Порошенко. Истакна и дека Украина ги почитувала своите обврски, а дека проруските бунтовници и Русија се „единствената закана за воспоставување мир во Украина“./крај/мф/сн

Извор: Макфакс