Портпаролот на Белата куќа, Џош Ернест одби во вторникот да ги коментира информациите дека САД го засилуваат притисокот врз Европската унија со барање за заострување на санкциите против Русија, во врска со украинската криза.

Претходно агенцијата Bloomberg пишуваше дека во понеделникот во Белата куќа се одржала затворена средба на претставниците на администрацијата на американскиот претседател Барак Обама со амбасадорите на земјите членки на Европската унија на којашто било барано Брисел да воведен нови санкции против Русија, при што била упатена закана дека во спротивно ќе биде дејствувано еднострано и ќе бидат воведени санкции против финансискиот и одбранбениот сектор на руската економија, од што штети би можеле да претрпат и некои европски сојузници на САД.„Не можам да кажам за конкретни средба… Но за вас не би претставувало изненадување сознанието дека тоа е редовна комуникација меѓу високи претставници тука, во Белата куќа, и дипломати и други странски челници, кои ја посетуваат нашата земја. Работиме во тесна координација со нашите сојузници, за да ја принудиме Русија да плати за дестабилизирачките активности по должината на границата со Украина“, изјави Ернест на брифингот со новинарите во Белата куќа, пренесува РИА Новости. „Ние јасно ставивме до знаење дека можат да бидат преземени дополнителни чекори (во контекст на санкциите), доколку руската страна не преземе чекори коишто ние ги очекуваме од нив“, додал. Според портпаролот на претседателот на САД, од Русија се очекува да ја зајакне контролата на границата со Украина, за да се исклучи доставувањето на оружје за бунтовниците во источните региони, како и координација со Организацијата за безбедност и соработка во Европа (ОБСЕ), што всушност Москва го предложи пред повеќе од две седмици понудувајќи од руската страна на границата во набљудувањето да бидат вклучени и припадници на украинската погранична служба. САД, исто така, сметаат дека Русија има влијание врз бунтовниците во источните региони на Украина, коешто може да помогне да се убедат да го положат оружјето и да го почитуваат прекинот на огнот, додал Ернест. Според него, Вашингтон се надева дека потоа Контакт групата ќе може да направи план за деескалација на ситуацијата во регионот и решавање на конфликтот. САД и ЕУ ја обвинуваат Русија за мешање во состојбите во Украина и се заканија дека се подготвени за наметнување нови санкции по оние коишто беа воведени во март откако црноморскиот полуостров Крим, каде што 58 отсто од населението е руско, преку референдум си ја поврати автономијата и изгласа присоединување на Руската Федерација, што Западот го смета за руска анексија на украинска територија. САД, кои инаку имаат и мал обем на трговска размена со Русија, многу поактивно се залагаат за заострување на санкциите отколку што за тоа се расположени европските земји кои имаат далеку поголема економска поврзаност па дури и енергетска зависност од Москва.Русија од своја страна ги отфрла обвинувањата за инволвираност во украинскиот конфликт, и истакнува дека станува збор за внатрешно прашање коешто треба да се реши со сеопфатни преговори меѓу властите во Киев со сите политички субјекти во земјата, како и со претставниците на рускојазичното население во југоисточните региони, а санкциите ги оценува како „несоодветни и контрапродуктивни“./крај/мф/сн

Извор: Макфакс