Американскиот државен секретар Џон Кери во вторникот во Виена предупреди на големата опасност од ескалација на насилствата во Израел и палестинската енклава Појасот Газа, откако исламистичкото движење Хамас го отфрли египетскиот предлог за прекин на огнот, а истовремено израелското воено воздухопловство попладнето и вечерта продолжи со бомбардирањата по шестчасовното примирје.

„Постои голема опасност од ескалација на насилствата“, изјави американскиот државен секретар Џон Кери во австриската престолнина Виена во текот на конференцијата за медиумите по два дена преговори за иранската нуклеарна програма пред да отпатува во Вашингтон на консултации за продолжување на преговорите со Техеран.Кери одлучил да не патува во Египет, како што беше предвидено, туку да се врати во САД каде со американскиот претседател Барак Обама ќе разговара и за на египетската иницијатива да ѝ се даде време да започне да дејствува. „Подготвени сме да сториме сѐ што е во наша моќ за да им помогнеме на двете страни да се сретнат. Подготвен сум, доколку е потребно, во регионот да заминам утре (среда), Меѓутоа на Египќаните треба да им се даде време и простор да се обидат таа иницијатива да ја претворат во дело“, додал Кери.Египет, кој е традиционалниот посредник во претходните кризи меѓу Израел и палестинското исламистичко движење Хамас коешто го контролира Појасот Газа, предложи целосен прекин на воздушните, поморските и копнените непријателства од вторникот во 6 часот наутро и започнување преговори за влегување на стоки и луѓе во палестинската енклава, којашто е под израелска блокада уште од 2006 година.Меѓутоа, доцна попладнето и вечерта во вторникот, израелската воена авијација извршила низа напади врз палестинската енклава, особено врз градот Кан Јунес на југ и квартовите Зејтун во источниот дел од Газа. Неколку минути пред тие напади, израелскиот воен портпарол Петер Лернер на социјалната мрежа Twitter објави дека ќе продолжат бомбардирањата. „По шест часови ракетирање на Израел, одбранбените сили ги продолжија нападите врз Хамас“, напишал портпарол.„Откако Хамас и Исламски џихад ја отфрлија египетската иницијатива за прекин на огнот и истрелаа ракети врз Израел, премиерот и министерот за одбрана одлучија остро да реагираат врз терористичките цели во Газа“, изјавил за AFP неименуван функционер на израелската влада.Двајца Палестинци се убиени во вторникот попладнето во Појасот Газа, со што бројот на убиените во осумдневната офанзива на израелската армија под називот „Линија на одбраната“ се искачи на 194 палестински жртви.Агенцијата на Обединетите нации за помош на палестинските бегалци – UNRWA во вторникот изрази жалење поради масовните уништувања на станбени и цивилни објекти во Појасот Газа. „Големо е нивото на човечки загуби и уништувања во Газа“, изјавил портпаролот на агенцијата Сами Мшаша на прес-конференција во Женева./крај/мф/сн

Извор: AFP