По блескавите настапи на Арда Ѓулер (19) за Турција на Европското првенство во Германија, се очекуваше дека младиот играч за врска ќе блесне оваа сезона во дресот на Реал Мадрид. Прогнозите се едно, а реалноста друго. Гулер не е во плановите на тренерот Карло Анчелоти.

Гулер оваа сезона забележа 30 настапи за Реал, но најчесто влегуваше на теренот од клупата за резерви.

Изминатите недели, медиумите се почесто пишуваат дека Гулер по завршвањето на сезоната ќе го напушти Реал. Нејасно е само дали Реал ќе го продаде фудбалерот за кого во 2023 година на Фенербахче му плати 20.000.000 евра или ќе биде испратен на позајмица.

Германски „Билд“ пишувашедека Лајпциг и Баер Леверкузен сакаат да го позајмат Гулер од Реал.

Шпанскиот весник „Релево“ во приказната ги додаде и италијанските гиганти Интер и Милан, кои наводно ќе се обидат да го купат, додека „Мундо Депортиво“ пренесува дека има и клубови од Премиер лигата кои покажале интерес за Гулер.

Според „Трансфермаркт“, Ѓулер моментално вреди 45.000.000 евра.

Рафаел Надал, прв пат по пензионирањето проговори за ривалства што ги имаше во текот на кариерата со Роџер Федерер и Новак Ѓоковиќ. Надал има позитивен скор во дуелите со Федерер, негативен во дуелите со Ѓоковиќ.

„Натпреварите против нив двајца беа сосема тактички различни“, објасни Надал во подкастот на Енди Родик.

„Со Роџер тактиката беше едноставна. Затоа моето ривалство со Федерер беше попривлечно за навивачите отколку со Новак, иако повеќе пати во кариерата играв против Ѓоковиќ“.

Надал вели дека тој и Федерер секогаш имале различни тактитки.

„Тој пробуваше едно, јас друго“, продолжува Надал, кој се пензионираше во ноември, на завршниот турнир во Дејвис купот во Малага.

„Целта ми беше да му го скршам бекхендот. Цело време бев фокусиран на тоа. Тој се обидуваше да игра паралели од две причини. Без разлика дали ќе постигне директен поен, тој создаваше создаваше повеќе простор за себе. Целта на Роџер беше да биде поагресивен, секој пат кога ќе погодеше форхенд, јас се враќав чекор назад. Објаснувањето е едноставно, за мене неговиот форхенд беше најдобриот против кој сум играл. Тоа беше шаховса партија во која немаше тајни. Цел свет знаеше која е стратегијата“.

Против Ѓоковиќ се било поразлично.

„Немаше толку јасна стратегија против Новак како што имаше против Федерер. Можевме да направиме план, но секогаш се сведуваше на тоа дека треба да играм одлично на долг период. Знаев и дека морам постојано да се прилагодувам. Не сакав да нападнам неговиот бекхенд бидејќи рано ја удираше топката и ме ставаше во комплицирана позиција. Почнав да користам бекхенд дроп шут, што понекогаш функционираше добро“, рече Надал и дополни.

„Исто така, се обидов да играм повеќе низ средината, за да не му ги оставам аглите отворени. Ако го отворите теренот против Ѓоковиќ и не стекнете предност, му давате шанса да игра како што сака. Кога станува збор за контрола на топката, тој е најдобриот тенисер против кого сум играл и сум го гледал“.

Надал кариерата против Ѓоковиќ ја заврши со 29 победи и 31 пораз, прптив Федерер има 24 победи и 16 порази.

Денеска во Буенос Аирес се одржа првата седница од судењето на лекарскиот тим за смртта на легендарниот Диего Марадона. На почетокот обвинителот Патрисио Ферари ги шокира присутните. Обвинителот покажа фотографија од Марадона во моментот на неговата смрт, која предизвика силни емоции кај семејството и кај присутните.

„Вака умре Марадона“, рече Ферари додека ја држеше фотографијата, нагласувајќи дека тешката здравствена состојба на Марадона е очигледна и дека никој од обвинетите не може да тврди дека не знаел за состојбата на Марадона.

Неговите ќерки Далма и Џанина се расплакаа, а подоцна ги утеши нивната сестра Јана. Драматичната сцена беше емитувана во живо на Јутјуб каналот на Врховениот суд на провинцијата Буенос Аирес и брзо се рашири низ социјалните мрежи.

"Así murió Diego Maradona"
durante el juicio la querella mostró una foto del 10, que recorre el mundo, estaba hinchado pic.twitter.com/TBIL9y1hBH

— 𝗔𝗡𝗚𝗘𝗟 fan (@AngeldeBrit_ok) March 11, 2025

Осум лица се на обвинителна клупа, вклучувајќи лекари и медицински сестри кои се грижеа за Марадона во неговите последни денови. Меѓу нив е и неврохирургот Леополдо Луке, кој му бил доктор на Марадона.

Пристигнувањето на медицинскиот персонал во судската зграда во Сан Исидро, предградие на Буенос Аирес, наиде на негодување од луѓето кои се собраа пред зградата и извикуваа „убијци“.

Тензиите беа уште поголеми поради реакцијата на поранешната сопруга на Марадона, Вероника Оједа, која се судри со еден од обвинетите, психијатарот Агустин Косачов. Неколку часа пред судењето, ќерката Далма во телевизиско интервју изјавила дека бара правда и ја повторила теоријата за заговор на моќници кои сакале Марадона да умре.

„Сакаме овие луѓе да кажат кој ги вработил, кој ги плаќал, кој управувал со куќата“, рече Далма.

Обвинителот Ферари во воведниот збор истакна дека по една година истрага е изготвено цврсто обвинение без противречности, врз основа на докази. Според Ферари, постојат силни докази дека обвинетите се одговорни за смртта на Марадона за време на неговото домашно лекување од 11 до 25 ноември 2020 година, во она што се нарекува „куќа на ужасите“.

Обвинителот заклучи дека „семејството и аргентинскиот народ заслужуваат правда“.

Марадона почина на 25 ноември 2020 година, на 60-годишна возраст, поради кардиореспираторна криза во неговата резиденција во Тигре, ексклузивно предградие северно од Буенос Аирес, каде што се опоравуваше од операцијата за отстранување на хематом на главата.