Владата на Венецуела ќе побара од Советот за безбедност на ООН да понуди проценка за обидот за вооружена инвазија во Боливиската Република на почетокот на мај, рече во средата претседателот Николас Мадуро, пренесува ТАСС.

„Ќе се обратиме до Советот за безбедност на ОН. Го задолжив министерот за надворешни работи и нашиот претставник во Њујорк да поднесат тужба до СБ на ОН со цел да се обезбеди легитимна меѓународна заштита за Венецуела“, рече тој за време на прес-конференцијата емитувана на Твитер.

Мадуро исто така рече дека венецуелското Министерство за надворешни работи подготвува тужба до Меѓународниот кривичен суд (МКС).

„Му наложив на министерот за надворешни работи веднаш да подготви жалба до Хаг која ќе  содржи видео материјали и други документи во врска со агресијата на владата на САД и Доналд Трамп“, рече тој.

Владата на Венецуела ќе побара екстрадиција на Џордан Гудро, шеф на американската приватна компанија за обезбдување „Силверкорп“, кого Каракас го обвинува за организирање на неодамнешниот обид за пуч.

„Верувам дека во согласност со американско-венецуелскиот договор за екстрадиција, треба да побараме екстрадиција на Џордан Гудро, кој призна дека извршил злосторства против јавниот ред, мир и безбедност на Венецуела“, рече Мадуро.

Поранешниот припадник на „зелените беретки“, Џордан Гудро, претходно во понеделникот изјави дека соработувал со двајцата уапсени Американци на мисија чија цел била да го приведат Мадуро и да ја ослободат Венецуела. Гудро ја презеде одговорноста за операцијата.

И двајцата служеле во Ирак и Авганистан заедно со него во американската војска, вели  Гудро, потврдувајќи дека биле дел од оваа наводна мисија во Венецуела наречена „Операција Гидеон“. Целта на мисијата била да се зароби Мадуро.

Гудро вели дека потпишал договор со лидерот на опозицијата поддржан од САД, Хуан Гваидо, за соборување на Мадуро, што Гваидо го негираше и рече дека нема никаква врска со нападот во неделата. Гудро тврди дека Гваидо никогаш не го исполнил договорот, но тој сепак ја продолжил недоволно финансираната операција со само 60 борци, меѓу кои и двајцата уапсени американски ветерани.

Мадуро исто така рече дека одлуката за апсење на лидерот на опозицијата, Хуан Гваидо, кого венецуелскиот државен ајвен обвинител Тарек Вилијам Сааб претходно го посочи како инспиратор на пропаднатиот пуч, треба да ја донесе судија, а не извршните тела.

„Што се однесува до Гваидо, не треба јас да одлучам за неговото можно апсење. Одлуката треба да ја донесатсудските тела на Венецуела. Обвинителите заедно со судот треба да одлучат дали тој треба да биде ставен во притвор или не “, рече тој.