Економија
(Видео) Заев: Трет пакет економски мерки од 355 милиони евра
„Да се помогне секому кому му е потребна помош, динамичен раст и градење нова развојна македонска економија базирана на иновативни решенија. Тоа беа принципите од кои се водевме заедно со економскиот совет на СДСМ кога го креиравме третиот предлог пакет економски мерки. Денес, ја поздравувам одлуката на Владата да усвои голем дел од предложените мерки“, изјави претседателот на СДСМ, Зоран Заев.
Според него, со третиот сет економски мерки треба да се помогне секому кому му е потребна помош, да се овозможи заживување на македонската економија преку директна поддршка на граѓаните и стопанството. Да се стимулира динамичен раст и градење нова развојна македонска економија базирана на иновативни решенија.
„Оваа здравствена криза нè стави на тест, нас и целиот свет, ја тестира нашата одговорност, солидарност, способност за брз одговор и адаптирање кон новонастанатата ситуација. Се гордеам што нашата држава се исправи пред предизвикот и стоички одговара на него. На ист начин се справуваме и со економско-финансиските последици, кои оваа криза ги донесе со себе. Да ја претвориме оваа криза во нова можност – за структурни, системски промени и раст. За модернизирање на македонската економија и зголемување на нашата конкурентност во регионот, а и пошироко.
Новиот трет сет економски мерки ќе опфаќа 730.000 корисници во вредност од 355 милиони евра. Заедно со првите два пакета мерки, станува збор за вкупен влог од 550 милиони евра или 5,5 отсто од БДП. Се работи за директна финансиска поддршка на граѓаните за зголемување на потрошувачката, директна поддршка на стопанството, земјоделството и туризмот, но и награда за најизложените здравствени работници во знак на благодарност за нивната работа.
Реализацијата на овој пакет мерки ќе придонесе за поттикнување на приватната потрошувачка; зголемена конкурентност на нашите компании на домашно и регионално ниво; трансформација на дел од економијата со воведување ИТ и друга технологија во нивното работење; формализација на дел од неформалната економија; и зголемена употреба на безготовински плаќања како инструмент за сузбивање на сивата економија. Преку издавање платежни картички на граѓаните, ќе се поттикне поголема потрошувачка, а со тоа и развој на домашните економски дејности. Со воведување домашни платежни картички вредни 9.000 денари за речиси 100 илјади граѓани, ја стимулираме потрошувачката на домашни производи и услуги со директна парична поддршка од државата преку потрошувачката на граѓаните. Сериозна поддршка даваме и за домашниот туризам преку ваучер вреден 6.000 денари за користење во домашните хотели и други сместувачки капацитети, а дополнително, граѓаните ќе добијат и платежна картичка од 3.000 денари за купување домашни производи и услуги“, истакна тој.
Обезбедена е и парична поддршка за млади дo 6.000 денари за покривање на партиципацијата на универзитет или за сместување во студентски и ученички домови и регистрирани сместувачки капацитети за студенти и средношколци кои доаѓаат од семејства со ниски приходи. Мерката за млади вклучува и платежна картичка вредна 50 евра за домашни производи и услуги, како и ваучери до 30.000 денари за кофинансирање обуки, тренинзи и курсеви за ИТ и дигитални вештини, кои ќе им овозможат на младите брзо вработување во новата развојна економија.
„Во целиот овој период искажуваме благодарност кон здравствените работници, оние најизложените ќе добијат награда за својата посветеност и пожртвуваност. Уште еднаш, би благодарам за целиот ваш труд. Сите други граѓани може да ја користат мерката викенд без ДДВ, односно да купат одредени производи по што платеното ДДВ ќе им биде вратено во целост.
Вториот столб од овој сет мерки нуди директна поддршка на македонското стопанство за иновативност и развој, како и за зачувување на постојните и креирање нови работни места.
Обезбедени се нови кредитни линии за микро и мали компании и неповратни средства за компании водени или основани од жени, кои вработуваат млади лица, кои се извозно ориентирани или воведуваат иновација и дигитализација во своето работење. Директно ги поддржуваме компаниите за освојување нови пазари, зголемување на нивната конкурентност, како и модернизација на процесите. Ќе биде обезбедена поддршка за многу компании преку обезбедување државна гаранција за комерцијални кредити, како и обезбедување на царинскиот долг. Финансиска помош и услови за развој ќе добијат стартап, извозните, текстилните, компаниите што огранизираат настани, микро мали и средни претпријатија. Помош ќе добијат сите оние на кои им е потребна.
Да ја искористиме компаративната предност на нашата економија, да ги искористиме нашите потенцијали, како сонцето, чистата вода, плодната почва, и тоа да го споиме со новите технологии и новите знаења. Затоа, третиот столб нуди поддршка за земјоделците, да создадеме нови приходи од плодната македонска земја. Во земјоделството го поддржуваме аграрниот сектор со 5 милиони евра преку Развојната банка. Субвенционирањето на потрошувачката на зелена нафта ја зголемивме на 50 отсто. Стимулираме производство на нови продукти, го модернизираме производствениот и преработувачкиот капацитет на земјоделски гранки, кои сè повеќе и повеќе извозуваат со цел зголемување на конкурентноста и профитабилноста.
Ќе овозможиме укрупнување на земјоделското земјиште и долгорочен закуп на пасишта. Уште сега презедовме активности за следната берба и пласман на винското грозје преку гарантиран откуп на вишокот винско грозје и правење алкохолен дестилат преку домашните капацитети.
Убедени сме дека преку реализација на овој пакет-мерки ќе одржиме вистинска лекција за брза, ефикасна и, пред сè, суштинска трансформација на нашата економија. Покажавме дека од економија во минус, каква што нè дочека пред 3 години, можеме да изградиме економија во развој, покажавме дека можеме да се избориме со досега невидена здравствена криза. Ќе покажеме, и тоа многу бргу, дека можеме да се справиме и со економските последици, дека ќе ја вратиме економијата на сигурен и стабилен пат. Остануваме посветени на помош и поддршка на нашите граѓани, на помош и поддршка на нашата економија. Заедно ќе се справиме со овие предизвици, заедно ќе изградиме нова развојна македонска економија“, додаде Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
АСО: Владата преку измени на тарифникот да ги намали цените на полисите за задолжително осигурување од автомобилска одговорност
Агенцијата за супервизија на осигурување (АСО) ја охрабрува Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.
АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност.
Клучните аргументи против зголемување на цената се наведени во анализата што е доставена до надлежната комисија при Министерството за финансии.
Зголемувањето на цената на осигурувањето не е во функција на јакнење на заштитата на осигурениците. Напротив, како што се додава, ова зголемување на цените е само и исклучиво во функција на покривање на трошоците за оперативно работење на компаниите за осигурување.
Економија
МФ: Јавниот долг на крајот на првиот квартал 58,6% од БДП
Министерството за финансии денеска ги објави податоците за состојбата на јавниот долг заклучно со 31 март 2024 година. Согласно објавените податоци јавниот долг изнесува 8.769 милиони евра што претставува 58,6% од БДП.
„Во првиот квартал се издадени државни хартии од вредност во износ од 219,2 милиони евра, повлечени се средства во износ од 175,5 милион евра по основ на склучени кредитни аранжмани со странски кредитори, како што е повлекувањето на втората транша од ММФ од кредитната линија за претпазливост и ликвидност и 57,6 милиони евра по основ заеми за јавни претпријатија и АД основани од државата и општините, општините во градот Скопје и Градот Скопје. При тоа извршена е и исплата на обврски по основ на главнина за надворешен долг во износ од 82,7 милиони евра“, соопшти МФ.
„Министерството за финансии ја објавува состојбата на јавниот долг на квартално ниво, а при пресметката на јавениот долг во однос на БДП се користени податоци за вредноста на БДП за период 2005 – 2024 година, за 2022 година користен е податок за вредност на БДП објавен на веб страната на Државниот завод за статистика, додека податоците за 2023 се прелиминарни податоци на Државниот завод за статистика, а 2024 година е проектирана вредност на БДП на Министерство за финансии.
Исто така, денеска согласно утврдената динамика, Министерството за финансии ги објави податоците за состојбата на државниот долг кој заклучно со 31 март 2024 година изнесува 7.544 милиони евра што претставува 50,4% од БДП. Состојбата на државниот долг се објавува на месечно ниво.
Министерството за финансии транспарентно ги објавува овие податоци на својата веб-страница. Последниот податок укажува дека јавниот долг е во дефинираните граници со новиот Закон за буџети. Со новиот Закон за буџети е воспоставено правило со кое јавниот долг не треба да надминува 60% од БДП, што е согласно и со Мастришките критериуми. Министерството за финансии останува на определбата за одржување на јавниот долг на стабилно ниво и во рамки на утврдените критериуми“, се додава во соопштението на МФ.
Економија
Забележителен раст на приходите, инвестициите и добивката на Реплек во првиот квартал од 2024 година
Со раст на оперативните приходи од 25%, на обемот на инвестиции и на добивката во првото тримесечје споредено со истиот период минатата година, „Реплек АД“ продолжи со успех да го реализира бизнис планот за 2024 година и својата долгорочна развојна стратегија која се темели на зголемување на продажбата на странските и на домашниот пазар, на иновациите во портфолиото на производи, како и на значителни вложувања во технолошкиот напредок и во развојот и добросостојбата на своите вработени.
Неревидираниот консолидиран финансиски извештај за работењето на Реплек АД во првиот квартал од 2024 година покажува дека во секторот фармација компанијата остварила раст на приходите од 26,9% во однос на истиот период минатата година. Во најголем дел ваквиот раст се должи на растот на приходите од продажба на странските пазари, каде се генерираат дури 80 % од вкупните приходи и кои во овој временски период се зголемени за 23 %, надминувајќи вредност од над пет (5) милиони евра. Позитивно влијание на ваквиот раст на приходите од извоз има отворањето на новиот пазар за производите на „Реплек АД“ во Туркменистан, што се очекува да придонесе за натамошно зголемување на извозните перформанси и резултати на компанијата.
Истовремено со растот на извозот, „Реплек АД“ продолжи да ја јакне и својата позиција на домашниот пазар, каде во Q1 2024 е остварен раст на приходите од продажба од 50 %, во споредба со истиот период лани.
Значителен раст во овој период од годината е забележан и кај инвестициите кои се зголемени приближно за пет и пол пати во однос на првите три месеци од 2023 година.
„Позитивните резултати на стартот на оваа година ни влеваат дополнителна енергија и мотив да продолжиме уште посилно во остварување на целите дефинирани во деловниот план за оваа година и во нашата стратегија за долгорочен одржлив развој. Остануваме посветени на инвестирањето во натамошна технолошка модернизација, како и на иновациите кои треба дополнително да збогатат нашето портфолио на производи, коишто веруваме дека ќе ни овозможат натамошно зајакнување на нашите позиции на домашниот пазар и ќе ни отворат нови можности и перспективи на странските пазари. Паралелно продолжуваме и со вложувањата кои треба да ја гарантираат натамошната добросостојба на нашите вработени. Веруваме дека ваквите напори ќе вродат со плод, ќе придонесат за натамошен раст на компанијата и ќе донесат дополнителна вредност за сите“, изјави главниот извршен директор на „Реплек АД“, Душан Пецовски.
Инаку, растот на приходите од продажба се одрази и на растот на консолидираната добивка пред оданочување на „Реплек АД“, која за првите три месеци од оваа година бележи зголемување за 24 % во однос на истиот период од минатата година.
(ПР текст)