Економија
Сугарески: Министерството за транспорт и врски со 15 отсто реализација на капитални инвестиции
Од почетокот на годината досега реализацијата на капиталните инвестиции во Министерството за транспорт и врски изнесува 15 отсто. Со силно темпо се работи на сите капитални проекти во државата како во делот на комуналната мрежа, гасификацијата, изградбата на социјални станови и железничкото поврзување на земјата, така и во делот на патната инфраструктура, изјави министерот за транспорт и врски, Горан Сугарески, при денешната работна посета на општина Велес.
Сугарески, заедно со директорот на ЈП за државни патишта, Зоран Китанов, и градоначалникот Аце Коцевски, изврши увид во градежните работи за санација на свлечиштето на патниот правец Велес – Градско.
Проектот е со вредност од речиси 1 милион евра и според интензитетот на градежните работи се очекува да биде завршен во август.
„Безбедноста на граѓаните и непреченото одвивање на сообраќајот е пред сè, па затоа ги интензивиравме работите на терен и со силно темпо работиме на санација на свлечишта и подобрување на состојбата на целокупната патна мрежа во државата. Велес е град кој максимално ги користи државните средства наменети за капитални проекти и му честитам на градоначалникот за тоа. Во овој момент, во соработка со Општината, Министерството работи на санација на водоводната и канализациската мрежа на 12 улици во градот, проект вреден над 600 илјади евра. Исто така, во текот на јуни ќе почне изградбата на систем за снабдување со вода за населените места Раштани и Бузалково, а во фаза на подготовка е и основен проект за изградба на 29 социјални стана во Велес. Во делот на патната инфраструктура, ЈП за државни патишта реализира неколку проекти за подобрување на патната мрежа во Велес и околината, а преку Министерството за траснпорт и врски обезбедивме 1 милион евра за санација на улици и локални патишта во општината. Посветено работиме на унапредување на овој регион и планираме нови проекти во Чашка, Богомила, Градско, Велес и другите населени места инвестирајќи над 70 милиони евра. На крајот, сакам да истакнам дека ги почнавме постапките за изградба на магистрален гасовод од Велес до Свети Николе. Проектот ќе биде финасиран со кредит од ЕБОР, па затоа многу ни е важно да имаме избори и да се формира парламентот за да може преку закон да се обезбедат средства како за овој капитален проект така и за други проекти од огромно значење за граѓаните и за економијата во целост“, изјави министерот за транспорт и врски, Горан Сугарески.
Директорот на ЈП за државни патишта, Зоран Китанов, истакна дека предвидениот рок за завршување на санацијата на свлечиштето е октомври 2020 година, но според интензитетот на работите, се очекува санацијата да биде комплетно завршена до август.
„Првите одрони се појавија во 2018 година, при што веднаш направивме интервентна санација, но бевме свесни дека тоа не е трајно решение на проблемот со кој се соочувавме со години. Ова е навистина стар проблем на општина Велес и овој патен правец. Во 2019 година беше изработен проектот на Градежниот факултет по што, по објавувањето на тендерот и изборот на изведувач, почна вистинското трајно решавање на проблемот, односно оваа санација и рехабилитација која се одвива сега. Најпрвин беше направен потпорниот ѕид со нова греда, со широк обем и голема должина, со цел да се сопре целиот одлив кон железницата зашто често беше загрозен и железничкиот сообраќај. Исто така, беа санирани сите постојни вдлабнатини, односно пропаднатиот дел од патот, каде што, покрај асфалтот, беше уништен и тампонот, а сега е целосно тампониран, и во моментот во тек е фазата на кавење, при што рачно се соборуваат сите карпи кои се во нестабилна состојба. Веднаш по ова, ќе се почне со ставање шипови и заштитни мрежи и бетонирање за да се запре како одронот така и продорот на вода во самите карпи. На крајот следува асфалтирање на патот по што ќе биде безбеден и функционален. Она што особено сакам да истакнам е дека во јуни ќе биде објавен тендерот за рехабилитација на регионалниот пат Велес – Градско – Неготино – Демир Капија“, изјави директорот на ЈП за државни патишта, Зоран Китанов.
Директорот Китанов додаде дека во текот на овој и следниот месец ќе почнат градежни работи за рехабилитација на патните правци Голозници – Врановци, Стари Град – Богомила, Богомила – Црнилиште и Оморани – Теово, а пред речиси еден месец на излезот Велес југ кон автопатот е поставено осветление со најсовремени ЛЕД-канделабри во должина од 4 километри.
Градоначалникот на општина Велес, Аце Коцевски, изјави дека со санација на свлечиштето се решава проблем со кој граѓаните се соочувале со години и во голема мера се придонесува за зголемување на безбедноста и подобрување на условите во сообраќајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Економија
Битиќи: Осигурителните компании да го повлечат зголемувањето на цените, а на граѓаните да им се компензираат средствата
Вицепремиерот задолжен за европски прашања, Фатмир Битиќи, на својата официјална Фејсбук страница имаше реакција на едностраната одлука на осигурителните компании за менување на тарифата и зголемувањето на цените на задолжителната осигурителна полиса за регистрација на возила.
„Згрозен сум од зголемувањето на сумата за задолжителна осигурителна полиса од страна на осигурителните компании. Ова може да се толкува и како директен атак, или политичко мешање на компаниите за осигурување, бидејќи тарифникот со тие зголемувања два пати е доставен до Владата и два пати не е одобрен на Владина седница.
Ова е манипулативен начин со кој надвор од предвидената процедура осигурителните компании изнаоѓаат начин да ја зголемат цената на авто осигурувањето на грбот на граѓаните.
Ова е пример за длабоката држава која мора да се искорени.
Го повикувам ресорното министерство за финансии и комисијата за заштита на конкуренција да постапат и да покренат постапка за олигополско здружување и осигурителните компании да го повлечат зголемувањето на цените, а на граѓаните кои веќе платиле повисоки цени очекувам да им се компензираат средствата“, реагира вицепремиерот.
Економија
ЕУ одвои 13,79 милиони евра за прекуграничен одржлив развој во Македонија и Албанија
Македонија и Албанија заедно ја започнаа Програмата за прекугранична соработка ИПА 3 во Корча.
Финансирана од ЕУ со буџет од 13,79 милиони евра, оваа Програма ја потенцира ангажираноста на двете земји да се усогласат со стандардите на ЕУ за одржлив развој и регионална интеграција до 2027 година.
Дополнително на промоцијата, беше најавен и предстојниот повик за предлози во рамките на програмата ИПА 3, поканувајќи заинтересирани страни да учествуваат во оваа Програма.
„Оваа иницијатива не само што се фокусира на клучни области како што се еколошката одржливост и социо-економскиот развој, туку исто така претставува клучен чекор кон нашата конечна цел за интеграција во ЕУ. Токму денеска најавуваме дека новиот повик за предлози ќе биде отворен многу наскоро, обезбедувајќи можности за конкретни и клучни проекти“, изјави Алтин Зечо, директор за конвергенција и кохезија со ЕУ, Државна агенција за стратешко планирање и координација на помош (САСПАК).
Зечо дополнително истакна дека членство во ЕУ бара зголемена соработка помеѓу нашите две земји, каде координирањето на заеднички политики и меѓусебната поддршка за постигнување на нашите цели и приоритети кон интеграција во ЕУ останува важен процес.
Вулнет Арифи, шеф на одделот за ЕУ и координатор за СБС, при Министерство за локална самоуправа на Република Северна Македонија, ја истакна улогата на Програмата во забрзувањето на аспирациите за членство во ЕУ.
„Со изградба на основите поставени од ИПА 2, оваа Програма не само што ја проширува соработката меѓу земјите, туку и повеќе ги усогласува нашите регионални политики со стандардите на ЕУ, отворајќи го патот за нашето очекувано пристапување. Претстојниот повик за предлози дополнително ќе ги активира нашите заедници да се ангажираат длабоко со нашиот процес на интеграција во ЕУ“, изјави Арифи.
Брисеида Ѓоза од Антена канцеларијата Северна Македонија – Албанија го истакна целосниот пристап на програмата: „ИПА 3 е детално креирана за да ги зголеми нашите регионални капацитети за исполнување на критериумите на ЕУ, фокусирајќи се на климатска отпорност, одржлив туризам и зачувување на културното наследство. Ги охрабруваме заинтересираните страни да се подготват за претстојниот повик, кој ветува дека ќе ги зајакне нашите заеднички напори.“
Ова стратешко вложување од ЕУ преку Програмата ИПА 3 е доказ за постојаните напори на Северна Македонија и Албанија за влез во ЕУ, испраќајќи директна порака за нивното патување кон европската интеграција.
Економија
Потпишан договор за реализација на новата инвестиција на турската компанија Шахтерм во ТИРЗ
Директорот на ТИРЗ, Јован Деспотовски и генералниот менаџер на компанијата „Шахтерм“, Фарук Шахин, потпишаа договор за реализација на новата турска инвестиција во Македонија. Со договорот кој го потпишаа во Бурса, се предвидува закуп на земјиште во ТИРЗ Скопје 2 со површина од над 20.000 м2 и изградба на објект со површина од над 13.000 м2. Ова е прва од двете фази на реализација на инвестицијата.
Потпишувањето на договорот следи само 4 месеци по најавата за новата турска инвестиција во земјава. Турската компанија ја зголеми и првично планираната инвестиција од 70 милиони евра на 100 милиони евра. Според деловниот план компанијата во наредните 10 години предвидува отворање на 1000 нови работни места. Новата инвестиција ќе опфати и центар за истражување и развој, а ќе преставува прв производствен капацитет на „Шахтерм“ надвор од Република Турција.
Потпишувањето на договорот е во рамки на посетата на Турција на делегација на ТИРЗ предводена од Деспотовски во рамки на која е предвидена и презентација на инвестициските можности пред турски компании. На потпишувањето присуствуваше и македонскиот амбасадор во Турција, Јован Манасиевски и Џунејт Шенер, потпретседател на бордот на директори на Стопанската комора на Бурса.
Инаку компанијата “Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Во моментот, „Шахтерм“ е дел од водечките пет компании во оваа дејност на глобално ниво, со повеќе од половина од годишното производство наменето за пазарите надвор од Турција.
Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.