По час и половина доцнење почна судењето, во кое е обвинет и поранешниот министар за внатрешни работи, Љубе Бошкоски, за убиството на Марјан Тушевски и Киро Јанев во 2001 година.

Во судницата не се присутни четворица од обвинетите, меѓу кои тројца се обвинети како извршители на убиството, а еден како организатор, инаку државјани на Србија и Босна и Херцеговина, јави репортерот на Макфакс од судот.

Обвинителството побара да им се суди во отсуство, на што приговараа адвокатите на другите обвинети, бидејќи, според нив, тие не биле барани на адресите во Србија и БиХ, адреси кои на судот му се познати.

Судот ги одби приговорите на адокатите, а обвинителката го прочита обвинението.

Сега се очекува исказ да дадат обвинетите. Бидејќи првите четворица се во бегство, Љубе Бошкоски којшто е седмообвинет траба да биде третиот што ќе го даде својот исказ пред судот.

Според обвинението, тројца српски државјани кои се во бегство ги убиле Јанев и Тушевски по нарачка, а Бошкоски се товари дека како тогашен министер за внатрешни работи му дозволил на сега веќе починатиот Орце Коруновски да го убие Тушевски.

Бошкоски, како што пишува во обвинението, бил во добри односи со Коруновски, а тој, пак, имал недоразбирања со Тушевски во врска со стриптиз барови и дискотеки.

Поранешниот министер за внатрешни работи, ослободен од обвиненијата во Хашкиот трибунал за воени злосторства за конфликтот од 2001 година во Македонија, и подоцна лидер опозициската вонпарламентарна партија Обединети за Македонија, се товари дека заедно со свои блиски луѓе, меѓу кои и шефот на обезбедувањето Зоран Трајковски, помогнале да не се откријат сторителите на двојното убиство.

Марјан Тушевски и Кире Јанев беа убиени на 10-ти јули 2001 година. кога излегувале од кафулето „ЗУ“ во скопската населба Капиштец. Прво со 11 куршуми беше убиен Тушевски, а потоа напаѓачите пукале и кон Киро Јанев кој се обидувал да избега./крај/фф//сн