Европа
Грабната девојка во Германија најдена мртва
Германска полиција во мало место крај Дрезден го пронајде телото на исчезната девојка, откако таа беше грабната и за неа беше барана откупнина од 1,2 милиони евра, соопшти во вторникот портпаролот на полицијата.
Според портпаролот, полицијата го пронашла телото на грабнатата девојка во понеделникот ноќта во градина во местото Ламперздорф. После тоа, биле уапсени двајца мажи, на 39 и 61 година, во Дрезден и во Баварија.
Жртвата, на која ѝ е објавено само името – Анели, девојка на 17-годишна возраст, исчезнала минатиот четврток откако излегла од домот на родителите во мало место во близина на Дрезден. Била на прошетка со песот, кој во меѓувреме е пронајден.
Полицијата во понеделникот ја зајакна потрагата по Анели, откако таблоидот Bild објави дека од нејзините родители е побарана откупнина.
Полицијата и родителите на девојката во понеделникот преку медиумите ги повикаа грабнувачите да ја ослободат. Родителите порачаа дека се подготвени „да ги исполнат барањата за да можеме повторно да го прегрнеме нашето дете“./крај/мф/сн
Извор: DPA
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Орбан: Во Брисел во тек се подготовки за влез на Европа во војна
Унгарскиот премиер Виктор Орбан денеска изјави дека во Брисел се водат подготовки за влез на Европа во војната и додаде дека е неопходно зајакнување на одбранбените капацитети на Унгарија.
Орбан изјави за „Радио Кошут“ дека „постојат некои алармантни сличности меѓу сегашното време и времето кога се подготвувале за Првата и Втората светска војна“, пренесува агенцијата „МТИ“.
„Она што денес се случува во Брисел и Вашингтон, или во моментов повеќе во Брисел отколку во Вашингтон, создава атмосфера за можен воен конфликт, што би можеле да го опишеме како подготовка за влез на Европа во војната“, рече унгарскиот премиер.
Орбан изјави и дека поради тоа има потреба од зајакнување на армијата, бидејќи тоа само по себе може да ја одврати војната.
„Слабоста е најчеста причина за војни, затоа е неопходно да се има војска и војници, да се направат подготовки и да се зајакнат капацитетите за самоодбрана“, рече унгарскиот премиер.
Европа
Пукање во Истанбул: расправија во кафуле прераснала во вооружен судир, има убиени и повредени
ТРИ лица загинаа, а пет се повредени, од кои две потешко, во пукотница што се случи синоќа во кафуле во областа Ускудар во Истанбул, соопштија турските власти.
Инцидентот се случил на улицата Ајазма во областа Уналан кога расправијата меѓу две групи прераснала во вооружен конфликт, пишува турски „Хуриет“. Според првите извештаи, веднаш по тепачката на местото биле испратени полициски и медицински екипи.
„Кавга помеѓу две групи околу 20 часот и 10 минути во кафуле на улицата Ајазма во областа Ускудар Уналан прерасна во вооружен конфликт. Три лица го загубија животот, а пет лица се повредени, од кои 2 потешко. Повредените се згрижени во близина. Во болниците продолжува истрагата“, соопшти гувернерот на Истанбул.
Европа
Децата од Британија прават најмалку физички вежби во Европа
Истражувањето објавено од Светската здравствена организација (СЗО) покажало дека децата на возраст од 11, 13 и 15 години од Велика Британија прават најмалку физички вежби на дневна основа во споредба со децата од другите земји во Европа, централна Азија и Канада.
Околу 11 отсто од девојчињата и 16 отсто од момчињата во Англија го прават препорачаниот час физички тренинг дневно, пишува британски „Тајмс“.
Физичката активност, од умерена до енергична, вклучува работи како брзо одење, возење велосипед и возење ролери.
„Имаме голем јаз меѓу половите и големи социо-економски разлики. Две третини од 15-годишните момчиња во Велика Британија учествуваат во енергична физичка активност четири или повеќепати неделно, но само една третина од девојчињата“, рече координаторот на оваа меѓународна студија, Џо Инчли, од Универзитетот во Глазгов.
Таа изјавила дека посилните вежби, во кои срцето чука малку побргу, исчезнуваат од животот на младите.
„Порано, кога младите поминуваа многу време надвор, тој број ќе беше многу поголем. Сега гледаме дека многу опаѓа и мислам дека тоа е многу загрижувачки бидејќи може да има големо влијание врз здравјето и благосостојбата на младите“, рече Инчли.
Регионалниот директор на СЗО за Европа, Ханс Клуге, истакна дека редовната физичка активност, здравите навики во исхраната и одржувањето здрава телесна тежина се клучни делови од здравиот живот.
„Наодите од истражувањето укажуваат на потребата од насочени интервенции за да им се овозможи на адолесцентите да усвојат поздрави навики и да избегнуваат навики што влијаат не само на нивното сегашно здравје и благосостојба туку и на нивните идни траектории“, рече Клуге.