Штип е на врвот на листата според бројот на активно заразени со Ковид-19 во однос на бројот на жители и потребни се итни мерки за спречување на заразата. Владата итно треба да наложи 30-дневен колективен одмор за конфекциите затоа што тие и понатаму остануваат најголемата опасност заразата да пламне не само во Штип, туку во цела источна Македонија. Причините се што не постојат услови да се реорганизира производството, како и поради условите за транспорт на вработените, потенцире претседателот на Граѓанско-демократската унија, Петар Колев, на гостувањето во емисијата „168 – анализи и коментари“ на штипската телевизија „Стар“.

„Во конфекциите не работат само луѓе од Штип, туку и од цела источна Македонија. Повеќе од два месеца апелираме да се обрне особено внимание на конфекциите, како и претпријатијата од кожарската индустрија. Во овие капацитети нема услови производството да се реорганизира во согласност со мерките за заштита од Ковид-19, како и поради непочитување на мерките за транспорт на вработените. Затоа, нашиот предлог останува ист – наместо во август, сега да им се даде колективен одмор на вработените во секој производствен капацитет во кој нема услови да се почитуваат постојните мерки за заштита. Всушност, и првиот државен празник што досега конфекциите го искористиле како неработен е Духовден поради мерката што им ја наложи градоначалникот Бочварски и таа е за поздравување. Но, тоа не треба тука да застане, потребни се итни мерки“, рече Колев и потенцира дека апелот не е со цел да се саботира власта или ГДУ да собира политички поени, туку од безбедносни причини.

Според Колев предлозите на ГДУ се во насока да се изгради заеднички став на сите партии независно дали се на власт или во опозиција за справување со заразата, која не дискриминира според партиска припадност. Опасноста за здравјето на граѓаните постои за сите еднакво и не треба партиите да се обидуваат да ќарат симпатии преку политички популизам.

„Ако бројките во Штип продолжат да растат, ќе има огромни реперкусии и врз економијата во овој регион. Мерката треба да ја наложи Владата за подоцна и овие компании да добијат помош од државата“, рече Колев и дополни: „Разбирам дека трпат загуби и ќе трпат, но на сопствениците треба да им се објасни дека мерката е за нивна безбедност. А зошто досега тоа не го сторија? Одговорот е едноставен, голем број од конфекциите се спонзори на СДСМ и ВМРО-ДПМНЕ. И ние сега бегаме од вистината зашто затаија контролата и мониторингот. Каде беа трудовата инспекција, УЈП, санитарно-здравствената инспекција? Каде беше локалниот штаб за да провери дали се почитуваат тие мерки? Дали си зедоа нови кошулчиња и костимчиња и заборавија дека треба да одат во контрола во конфекциите. Или треба да има избори и чекаме нови донации од нив. Што е поважно – капиталот и бизнис-интересот на стотина луѓе во овој регион или здравјето на десетици илјади работници во тие компании?“

За очекувањата од претстојните парламентарни избори и најавите на ДУИ дека на изборите одат за да го дадат првиот албански премиер, Колев одговори дека тоа е одлука на граѓаните на Македонија. Позицијата на ГДУ е јасна и категорична дека нема да поддржат влада во коалиција со ДУИ.

„ГДУ има десетина приоритети пред себе. Прво е намалување на бројот на пратеници на 60 и да запре исплатата на патни трошоци, намалување на бројот на министри на 15, како и намалување на бројот на советници и слични редукции во администрацијата. Промена на изборен модел, односно Македонија да биде една изборна единица. И влада без ДУИ затоа што ДУИ се покажа како неконструктивен партнер вовлечен во многу криминални зделки во последните 20 години. Ако зависи од ГДУ, а верувам дека така ќе биде, ГДУ нема да поддржи влада во чиј состав ќе биде ДУИ. Се надевам дека и нашите сограѓани Албанци разбираат што сака да предизвика Ахмети. На секои избори некој ја пали етничката карта. Од едната страна е ВМРО-ДПМНЕ, а од другата е ДУИ. Истата комбинација која 11 години направи пепел во државата. Камен врз камен не остана, освен стиропор, што го однесе ветрот. Милиони евра, а можеби и милијарди, исчезнаа и на крајот ниту еден висок функционер на ДУИ или на ВМРО-ДПМНЕ не заврши во затвор“, рече Колев и потенцира: „Граѓаните што сакаат ДУИ да биде во власта нека гласаат за СДСМ или ВМРО-ДПМНЕ, ако гласаат за нас, ДУИ нема да биде во власта“.

Колев зборуваше и за проблемите со кои се соочуваат земјоделците во Источниот Регион, особено во однос на водоснабдување, како и за потребите за чистењето на каналите за водоснабдување.

(ПР-текст)