Љупчо Андоновски, советник на министерот Наќе Чулев, кој го придружуваше лидерот на ВМРО-ДПМНЕ, Христијан Мицкоски, во кафеаната на Боемска улица, даде исказ во полициска станица.

Андоновски пред медиумите го правдаше Мицкоски, велејќи дека тој договорил со газдите на кафеаната да седнат во затворениот дел на објектот, иако тоа беше забрането со уредба донесена од Владата. Според Андоновски, ваквото прекршување на мерките не е значајно како други работи кои се случувале во државата.

„Па ништо не се случи, дадов исказ пред колегите, им објаснив како беше настанот. Мене ми е жал што овој настан  предизвика толкаво медиумско внимание. Има многу позначајни работи кои се случуваат во државава, но, за жал, интересно им беше дека сум бил на ручек со претседателот Мицкоски. Им објаснив како беше и сакам сега на сите вас да ви кажам. Винарницата не работеше, но го замолив еден од газдите на винарницата да отвори за да седнеме со еден пријател, тој не знаеше кој е. Откако отидовме таму, кога виде дека е дојден Христијан Мицкоски, сопственикот нè послужи со пијалак, седнавме и поразговаравме околу час, час и пол. Потоа, тој ја напушти винарницата, по него јас“, рече Андоновски, советник на Чулев и придружник на Мицкоски во кафеаната.

Тој пред медиумите додаде дека не ги попречувале инспекторите да влезат во затворениот дел од објектот, што е спротивно на тврдењето од Пазарниот инспекторат. Инспекторите дента кога се случи настанот кажаа дека откако биле попречени да направат увид во затворениот дел со образложение дека просторијата е заклучена, виделе како од внатре излегуваат неколку лица, меѓу кои Мицкоски и Андоновски.

„По нас газдата ја напушти винарницата и си замина, за од средствата за масовна комуникација, од медиумите, да разберам дека сме биле во винарницата, дека сме попречувале да влезат инспекторите на трудова инспекција, дека директорот Сашо Тасевски повикал и ЕБР, тука се нашол и началникот на Интервентна полиција, Примислав Димовски, па наводно сме криеле камери, ресивери, што апсолутно го отфрлам. Јавниот обвинител побарал известување преку МВР да го расчистат овој случај. Ја користам оваа пригода да им кажам да го погледнат членот 3 од КЗ на Македонија кој гласи дека на секој сторител на кривично дело ќе му се суди според кривичното дело кое е пропишано во тој момент. Во меѓувреме, доколку се измени еднаш или двапати тој закон, тогаш ќе се примени законот кој е поповолен за сторителот“, додаде Андоновски.