Челниците на Украина, Русија, Германија и Франција постигнаа по 16 часовни преговори во белоруската престолнина Минск општ договор за прекин на огнот и општ договор за политичко решение на кризата во источна Украина, потврди по завршувањето на преговорите францускиот претседател Франсоа Оланд, додека претставниците на рускојазичните одметнати региони Донец и Луганск, одбиле да го потпишат договорот усогласен преку „нормандската четврток“, пренесуваат  агенциите, а германската канцеларка Ангела Меркел, сепак, тврди дека рускиот претседател Владимир Путин ги убедил бунтовниците да се согласат со примирјето.

Претходно рускиот претседател Владимир Путин изјави дека челниците усогласиле договор за запирање на судирите во источна Украина. Зборувајќи пред новинарите во Минск, Путин рече дека четворицата челници „успеале да се усогласат околу главните прашања„, и додаде дека прекинот на огнот ќе стапи на сила од полноч на 15-ти февруари.

Според соопштението на Креммљ, четворицата челници ги потврдиле своите почитувања на украинскиот територијален суверенитет и интегритет, како што беше најавено во средата.

Претседателите на Украина, Русија и Франција, Петро Порошенко, Владимир Путин и Франсоа Оланд, и германската канцеларка Ангела Меркел, ги започнаа преговорите, според многумина решавачки за надминување на длабоката украинска криза, во средата попладне во белоруската престолнина Минск.

Паралелно со средбата на челниците во ткн „нормандски формат“, во Минск се одржуваа и преговорите на Контактната група за Украина, односно претставници на Украина, Русија и Организацијата за безбедност и соработка во Европа (ОБСЕ) како олеснувачи во преговорите меѓу претставниците на властите во Киев и на одметнатите самопрогласени ткн „народни републики“ во Донецк и Луганск.

Меѓутоа, челниците на рускојазичните бунтовници во Донецк и Луганск, Александр Захарченко и Игор Плотницки на состанокот на Контактната група одбиле да го потпишат документот усогласен меѓу четворицата челници, изјавил извор близок на преговорите за ТАСС.

„Четворката подготви документ, и се усогласи по него. Кога го разгледуваше контактната група во состав Медведчук, Кучма, Захарченки и Плотницки, последните двајца откажаа да го потпишат’, рекол соговорникот на агенцијата.„Претседателот на Русија, Владимир Путин ги убеди бунтовнциите од Донбас да со согласат со примирјето“, изјави подоцна германската канцеларка Меркел, пренесе агенцијата РИА Новости.

Во преговорите на Контактната група, од украинска страна учествуваа специјалниот претставник за хуманитарни прашања, челникот на граѓанската организација Украински избор, Виктор Медведчук и поранешниот украински претседател Леонид Кучма. Побунетиот рускојазичен украински југоисток го претставува челниците на самопрогласените Народни републики во Донецк и во Луганск, етничкиот Украинец, Александар Захарченко и Игор Плотницки. На преговорите учествува и специјалниот претставник на ОБСЕ, Хајди Таљивиани, и рускиот амбасадор во Киев, Михаил Зурабов, кои беа посредници во преговорите./крај/мф/сн

Извор: Макфакс