Лидерот на најголемата опозициска партија, Христијан Мицкоски, на денешната прес-конференција рече дека лично ќе се заложи за да се направи анализа во кој дел е разочаран народот од оваа партија и најави дека доколку имало пропусти ќе се заложи партијата да ги коригира своите грешки.

„Во право сте кога велите дека народот е разочаран од страна на политичарите, тоа веќе го зборуваав во кампањата. Треба сите да извлечеме поука да не го разочаруваме народот. ВМРО-ДПМНЕ и јас лично ќе направиме сериозна и детална анализа во кои делови лично, но и како ВМРО-ДПМНЕ сме го разочарале народот. Ќе се коригираме и ќе видиме како понатаму ќе се одвиваат настаните. Партиските тела ќе заседаваат во периодот што следи, јавноста ќе биде информирана за одлуките на партиските тела“, рече Мицкоски.

Додаде дека сепак е задоволен од изборниот резултат во услови, како што кажа, на валкана кампања при што власта се служела со манипулации и поткуп на гласачи. Тој порача дека на овие избори ВМРО-ДПМНЕ е победник, но не ги откри можностите и плановите со кои оваа партија би можела да ја состави новата влада.

„Оваа беа избори во кои брутално се злоупотреби власта. Се делеа картички, се потрошија милиони за поткуп, преку државните институции. Да не зборуваме за она што се одвиваше на терен, се вршеше агитација и притисоци врз граѓаните. Имаме 50 пријави за поткуп, имаме вмешани градоначалници, но, и покрај тоа што го направија, ако ги земеме овие 4 пратеници на Беса се покажа дека власта има 2 пратеника помалку од колаицијата што ја предводи ВМРО-ДПМНЕ. Покажавме и докажавме дека сме најголемата партија до сега, а што ќе се случува понатаму, ќе видиме. Има многу математики, многу можности, да почекаме времето да покаже, кое некогаш  само дава одговор на овие прашања. Но она што е важно е дека најголемиот кредибилитет за нова влада го има ВМРО-ДПМНЕ“, додаде Мицкоски.

Во однос на коалицирањето со ДУИ и дали ќе се почитува принципот победник со победник, тој рече дека овој принцип бил прекршен уште во 2017 година кога ВМРО-ДПМНЕ победила на изборите, но не кажа каков е неговиот став во однос на избор на коалицискиот партнер.