Свет
Саудискиот принц обвинет дека испратил платени убијци во Канада

Престолонаследникот на Саудиска Арабија испратил платени убијци во Канада за убиство на поранешен саудиски разузнавачки агент, се вели во тужба поднесена во еден американски окружен суд, пренесува „Анадолија“.
Во тужбата на 106 страници, Саад Алџабри (39) посочува дека принцот Мохамед бин Салман сакал да го убие затоа што тој знаел премногу за наводно корумпираните деловни активности на принцот, како и за формирање група платеници наречена одредот Тигар. Алџабри е постојан жител на Канада.
Алџабри, ветеран од саудиската разузнавачка служба, вели дека одредот Тигар го убил саудискиот новинар Џамал Кашоги во саудиската амбасада во Турција во 2018 година. Во тужбата тој додава дека има близок работен однос со американските разузнавачи и дека преку откритијата може да ѝ наштети на репутацијата на Бин Салман во Вашингтон.
„Малку места чуваат толку чувствителни, понижувачки и осудувачки информации за обвинетиот Бин Салман од умот и сеќавањето на д-р Саад – освен можеби снимките што д-р Саад ги направил очекувајќи го своето убиство“, се наведува во судскиот документ. „Затоа обвинетиот Бин Салман го сакал мртов и работел на постигнување на таа цел во последните три години“.
Канадската влада одби да коментира за тужбата, но министерот за јавна безбедност, Бил Блер, рече дека владата знае за ситуации кога странските субјекти им се заканувале на Канаѓани, како и на луѓе што живеат во земјата.
„Сосема е неприфатливо и ние никогаш нема да толерираме странски актери што ѝ се закануваат на националната безбедност на Канада или на безбедноста на нашите граѓани и жители“, се вели во изјавата на Блер.
Алџабри избегал од Саудиска Арабија во 2017 година пребегувајќи во Турција, а потоа и во Торонто, каде што престојува.
Ова не е прв случај Бин Салман да биде обвинет дека сакал да убие жител на Канада . На 22 јуни, Омар Абдулазиз, истакнат критичар на Саудиска Арабија, кој сега е во егзил во Канада, го предизвика гневот на саудискиот принц, а канадските власти го предупредија дека може да биде обележан за атентат или киднапирање од Саудијците.
И Абдулазиз побегнал во Канада и сега има сатирична емисија на „Јутјуб“ позната поради критиките кон Саудиска Арабија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Малку лево, па десно – коментари за начинот на кој Трамп чекореше на црвениот килим

Средбата меѓу Доналд Трамп и Владимир Путин во Алјаска привлече големо внимание. Покрај фактот дека речиси сите очекуваа одлука во врска со Украина, светската јавност не пропушти ниту еден момент на црвениот тепих, кога Трамп ја изгуби насоката при одење.
Трамп се сретна со Путин во петокот во Алјаска, а главна тема беше војната во Украина.
Нивната средба се одржа во формат три на три и траеше речиси три часа, но сепак, и покрај големите очекувања, не е постигнат конкретен договор.
Can any doctors tell me. Why is Trump struggling to walk in a straight line? pic.twitter.com/hAYgGI8AAz
— Maine (@TheMaineWonk) August 15, 2025
Потоа корисниците на социјалните мрежи се фокусираа на деталите, како што е прошетката на Трамп по црвениот тепих.
Американскиот претседател излезе од авионот и отиде да се сретне со рускиот лидер. Тој одеше по црвениот тепих до точката означена за нивниот состанок, но во еден момент почна да оди лево-десно, како да го изгубил правецот.
Многумина коментираа дека изгледал како да „се мачи да оди“, од причини што сè уште не се познати.
На Трамп претходно му беше дијагностицирана хронична венска инсуфициенција, нарушување на циркулацијата на крвта, во јули откако забележа „благ оток во долните екстремитети“, изјави портпаролката на Белата куќа Каролин Левит.
Свет
И Макрон оди во Вашингтон со Зеленски, потврдено и пристигнувањето на шефот на НАТО и Мерц

Францускиот претседател Емануел Макрон и финскиот претседател Александар Стаб потврдија дека утре ќе бидат во Вашингтон на состанок меѓу украинскиот претседател Володимир Зеленски и американскиот претседател Доналд Трамп.
Потврдено е дека ќе им се придружи и генералниот секретар на НАТО, Марк Руте.
Претходно беше објавено дека на состанокот ќе се приклучат германскиот канцелар Фридрих Мерц, италијанската премиерка Џорџа Мелони и претседателката на Европската комисија, Урсула фон дер Лајен.
Свет
Русите: Уништивме 300 дронови и погодивме складишта со моќни ракети

Руските сили собориле 300 украински дронови и погодиле складишта со ракети „Сапсан“, додека во регионот Донецк се водат жестоки борби во кои украинските сили се обидуваат да го запрат руското напредување, тврди руското министерство за одбрана, а известуваат и воени блогери, пренесува „Ројтерс“.
Руското министерство за одбрана навело дека руските сили зазеле поволни позиции во близина на населеното место Золотиј Колодјаз во регионот Донецк, иако проукраинските карти покажале дека украинските сили успеале да го сопрат рускиот продор.
Според соопштението на министерството, воените авиони, дронови и ракети биле користени за напади врз украинските складишта со ракети Сапсан низ целата земја.
„Четири воздушни бомби и 300 беспилотни летала биле соборени од системите за противвоздушна одбрана“, стои во соопштението на министерството.
Украина неодамна воведе во употреба сопствен балистички систем „Сапсан“ (познат и како „Хрим-2“), развиен за да ги замени советските ракети и да ја зајакне домашната одбрана. Станува збор за проектили со дострел до околу 300 километри, со боева глава тешка речиси половина тон, кои можат да летаат со брзина поголема од 5 Мах.
Таквите карактеристики го ставаат во ранг на рускиот „Искандер“ и го прават исклучително тежок за пресретнување со постоечките системи за противвоздушна одбрана.
Според украинските и западните извори, „Сапсан“ првпат бил употребен во борба во мај оваа година, а по успешното тестирање започнала и сериската продукција. Ракетата е наменета за прецизни удари по стратешки цели како командни центри, складишта за муниција, логистички јазли и воздушни бази, а домашното производство ѝ дава на Украина дополнителна стратешка автономија и го намалува ослонувањето на сојузничките испораки.