Култура
Џез-фестивал во Прилеп
Во организација на здружението за супкултура ПП Џез-фестивал, на 27,28 и 29 август, на летната сцена од Центарот за култура „Марко Цепенков“ ќе биде одржано деветтото издание на „Прилеп џез-викенд“ фестивалот.
Поаѓајќи од мисијата на фестивалот: поддршка на домашната џез-продукција и создавање на нова џез-публика комбинирана со актуелните протоколи за Ковид-19 кои треба да се почитуваат, програмата на фестивалот е креирана со ангажирање врвни музички бендови и артисти од Република Македонија.
Фестивалот ќе започне со премиерата на филмот “JAZZMAN – The form as a verb” од Велибор Педевски, снимен на локации во Њу Јорк, Скопје, Белград и Софија.
JAZZMAN е документарна сторија за живот посветен на уметноста на џезот, која ја раскажува Велибор Педевски, човекот кој е своевиден фокус на збиднувањата на овој творечки феномен… во филмот учествуваат Wadada Leo Smith, Реџи Николсон, Реџи Воркман, Ентони Бракстон, Сесил Тејлор, Брендон Рос, Грем Хајнс, Даг Виселман, Милќо Левиев, Дуѓан Која Којиќ, Влатко Стефановски, Љупчо Поповски, Тимчо Апостолов, Марко Коловски, Оливер Белопета.
По проекцијата на филмот, на сцената ќе настапат Трајче Велков (труба), Зоран Костадиновски (гитара), Горан Гешовски (бас гитара), Виктор Филиповски (тапани) овојпат со авторски материјал обединети во бендот SkopjeJazzInc.
Втората вечер ќе биде отворена со квартетот на Оливер Јосифовски и премиерно ќе биде проследен проектот FUSSION DEFFUSION CONFFUSION. Станува збор за проект кој содржи оригинални композиции и музички стандарди од егзотичен карактер, измешани со тврд хард рок звук.
Покрај Оливер Јосифовски (контрабас), на сцената ќе настапат Гордан Спасовски (клавишни инструменти), Стефан Миладинов (гитари) и Александар Ванчовски (тапани и удиралки).
Светлост е моментално најактуелниот македонски џез-состав на домашната и на меѓународната сцена. Бендот во 2019г го издава албумот „Odron Ritual Orchestra“, кој на светските листи е сместен меѓу петнаесетте најдобри албуми, а во 2020 г. ги реализираат албумите „Jazz (to the working class)“ и „Six Years“. Карактеристика за музиката на овај состав е дека истата се менува во зависност од луѓето вклучени во конкретниот проект, а стилските правци се движат од слободен џез, електро-акустична музика и пост-рок, до минимализам и амбиентална музика.
Нинослав Спировски [кларинет / сопран саксофон / тенор саксофон]
Кристијан Новковски [тапани / удиралки]
Дени Омерагиќ [бас гитара / синтесајзер / електроника]
Третата вечер ќе стартува со новината на овогодинешниот фестивал, промоција на книгата Press&Play од Ненад Георгиевски.
Прес енд плеј (Press & Play) е составена од рецензии на албуми, на концерти и фестивалски настапи на изведувачи меѓу кои: Влатко Стефановски, „Леб и сол“, Кирил Џајковски, „Фолтин“, Џијан Емин, Ади Имери, Гоце Стефковски, Џон Аплелгрeн, Зоран Маџиров, „Анастасија“, „Чалгија саунд систем“, „Проект Жлуст“, „Скопскиот џез фестивал“, „Офф-фест“ итн.
Следни се Next to Silence, музички состав кој во својот репертоар вклучува исклучиво композиции од реномираната европска издавачка куќа ECM. Во своите настапи тие изведуваат неколку реаранжирани дела од богатиот опус на Енрико Рава, Карла Блеј, Џон Аберкромби, Дејв Холанд, Терие Рипдал, Шанкар, Јан Гарбарек, Џим Пепер, Гери Бартон, Art Ensemble of Chicago, Бил Фрисел, Џолн Балк, Томаж Станко, Нилс Питер Молваер и други. На фестивалот ќе изведат и дел од композициите на новиот албум кој е во фаза на студиско снимање.
Членови на Next to Silence се:
Александар Николовски (труба)
Филип Димишковски (клавијатури)
Драган Стојковски (бас-гитара)
Гоце Наумов (барабани)
Фестивалот ќе го затворат диско пост- панк активистите Бернајс Пропаганда. Со пет објавени албуми : „Happiness Machines“, 2009; „My Personal Holiday“, 2010; „Забрананета планета“, 2013; „Политика“, 2016 година; „Втора младост, трета светска војна“, 2019 година;, еден ЕП „Ништо нема да нè раздели“, безброј концерти на турнеите низ Европа и САД, Бернајс Пропаганда се дефинитивно еден од најуспешните и меѓународно признати андерграунд музичари.
Во Прилеп „Бернајс пропаганда“ ќе настапат со следната постава :
Кристина Горовска – Вокали, текстови, вокални хармонии, уметничка насока и дизајн
Васко Атанасоски – Музика, стихови, бас, гитари, перкусии, аранжмани, продукција, вокал и менаџмент
Дени Крстев – синтисајзер, ритам програмирање, снимање, едитирање и мастеринг
Раде Јордановски – бас и продукциски менаџер
Кристијан Лафазановски – тапани и перкусии
Ова година Prilep Jazz Weekend фестивалот може да се пофали и со квалитетна оф-програма:
На 28 август 2020 г. на локалитетот Врбјанска чука (кај село Славеј) свој перформанс ќе има Antonie AVP Project.
На 29 август 2020 г. на летната сцена од ЦК „Марко Цепенков“ ќе го проследиме перформансот на Leonard.
Влезниците по цена од 100 денари се пуштени во продажба во „Сити тобако центар“ во Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
Денес е Ден на македонскиот јазик
Петти мај е прогласен за „Ден на македонскиот јазик“. На овој ден во 1945 година, со решение на Народната влада на Федерална Македонија е усвоена азбуката на македонскиот јазик врз принципот еден глас – една буква, а набргу потоа, на 7 јуни 1945, е усвоен и Правописот на македонскиот јазик.
Кодификацијата на современиот македонски стандарден јазик се заокружува со делата на Блаже Конески – Граматиката на македонскиот литературен јазик, Речникот на македонскиот јазик и Историјата на македонскиот јазик.
Култура
Инспиративен настап на SIN PUSTINJE во Битола за Меѓународниот ден на џезот 2024
МКЦ-Битола по јубилеен 10-ти пат го одбележа Меѓународниот ден на џезот во Битола 2024. Во прекрасниот амбиент на кафе барот Порта Џез, Ахмед Буриќ, Дамир Имамовиќ, Тони Китановски и Иван Михајловиќ приредија несекојдневно музичко поетско доживување.
Во проектот станува збор за искуството и интерпретацијата на музиката и поезијата која ги сумира различните интереси и вештини на уметниците кои досега ги познававме од другите жанрови. На концертот Буриќ, Имамовиќ, Китановски и Михајловиќ изведоа дванаесеттина песни од нивниот прв албум, како и некои други делови кои на изведбата во живо му дадоа комплетна форма и магична атмосфера.
Овој концерт по десетти пат ја стави Битола на глобалната мапа на градови кои го одбележуваат Меѓународниот ден на џезот и ги слават вредностите кои тој ги промовира. Битола ја ставаме на иста линија со светските метрополи кои имаат почит кон уметноста како начин на живот и извор на енергија не само за уметниците туку и за обичните граѓани.
Концертот се организира со финансиска поддршка на Министерството за култура и Општина Битола.
Култура
Вердиевата спектакуларна опера „Трубадур“ на 11 мај на „Мајските оперски вечери“
На 11 мај со почеток во 20.00 часот ќе се изведе спектакуларната опера „Трубадур“ од Џузепе Верди, во рамките на 52. издание на меѓународниот фестивал „Мајски оперски вечери“. Билетите за премиерната изведба на „Трубадур“ на 9 мај се распродадени.
Диригент е Иван Еминовиќ, режијата е на реномираниот македонски режисер, Иван Поповски кој живее и работи во Москва повеќе од две децении и за своите врвни уметнички достигнувања е добитник на највисоки признанија во Русија и низ светот и за првпат поставува опера на македонската сцена. Сценографијата е на Миодраг Табачки од Србија, костимографијата е на Марија Пупучевска, а кореографијата на Саша Евтимова.
Во улогата на Манрико ќе настапи гостинот од Чиле, Филипе Рохас, тенор кој настапувал на повеќе светски сцени, во улогата на Гроф Луна ќе настапи нашиот баритон Ристе Велков, во улогата на Леонора ќе настапи гостинката од Канада Криста де Силва, драмски сопран препознатлива по нејзините темни мистични бои. Во улогата на Ацучена ќе настапи, Сања Анастасиа, мецосопран, првенка на операта во Народниот театар во Белград. Во улогата на Ферандо ќе настапи нашиот бас, Владимир Саздовски кој е чест гостин на светските оперски сцени. Во останатите улоги ќе настапат: Јане Дунимаглоски, Ана Ројдева, Тихомир Јакимовски и Дејан Стоев во придружба на хорот и оркестарот на Националната опера и балет.
Романтична љубов, смртна љубомора и oдмазда се движечките драмски елементи на операта „Трубадур“ од италијанскиот музички мајстор Џузепе Верди. Операта се одликува со прекрасна музика и спектакуларно предводени вокални делови кои пренесуваат силни емоции, додека исклучително сложената приказна изобилува со огнена страст.