Македонија
(Видео) Стефковски: Со новиот ДУП во Автокоманда градоначалникот Георгиевски предвидува бетонизација

И во последната година од мандатот како градоначалник, Борис Георгиевски ги погазува интересите на Општина Гази Баба. Овојпат на удар се жителите од урбаната заедница Автокоманда. Поводот за нашата реакција преку оваа прес конференција е новиот предлог- Детален урбанистички план кој се однесува на населба Автокоманда, рече Бобан Стефковски од ОК ВМРО-ДПМНЕ Гази Баба.
„ Од досега презентираното, овој детален урбанистички план е само одговор на потребите на одредени бизнис и партиски моќници но никако не ги задоволува потребите на жителите на оваа населба.
Политиката на СДСМ за бетонизација на Град Скопје е само пресликана со наведениот ДУП. Со него се предвидува многу висококатници и бетонски градби со кои ќе се намали протокот на воздух и дополнително ќе се отежне сообраќајот во оваа населба. Борис Георгиевски ги лишува децата од детски катчиња, пензионерите и сите жители од нови паркови и зелени простори. За да односот на градоначалникот да биде уште повеќе попонижувачки кон граѓаните, тој не се појавил на јавната расправа за носење на овој предлог ДУП туку испратил лица од општинската администрација кои немале одговор на поставените прашања од засегнатите жители. Нивниот револт е оправдан и тие секојдневно ни се обраќаат на нас и на советниците од советничката група на ВМРО-ДПМНЕ и коалицијата. Токму поради таквиот игнорантски однос, партијата на Георгиевски последователно ги губи изборите во Општина Гази Баба и во оваа урбана заедница. Ги повикуваме жителите на Автокоманда да го разгледаат новиот ДУП кој е објавен во просториите на урбаната заедница и да ги достават своите забелешки најдоцна до 14 октомври 2020 година. ВМРО-ДПМНЕ ќе направи се за да ги заштити интересите на граѓаните на Општина Гази Баба и на Автокоманда.
Оттука уште еднаш потенцираме дека програмата на Георгиевски како кандидат за градоначалник ќе остане пример за една колосална лага. За една година нашата нова локална власт, која ќе направи ревизија на скандалозното работење на Борис Георгиевски и ќе има одговорност“ порача Стефковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мисајловски и генералот Лафчиски со вработените во Министерството и припадниците на Генералштабот по повод 18. Август – Денот на Армијата

Денеска (15 август) пред платото на Министерството за одбрана и Генералштабот, министерот за одбрана Владо Мисајловски и началникот на Генералштабот, генерал-мајор Сашко Лафчиски по повод Денот на Армијата се обратија пред вработените при што ја истакнаа нивната професионалност и посветеност на службата.
Министерот Мисајловски изрази почит и благодарност до сите жени и мажи во Министерството за одбрана и Армијата кои, како што рече, посветено работат за државата, нејзината безбедност и сигурност.
„Пожртвуваноста на припадниците на Армијата при справувањето со секојдневните предизвици за заштита на македонските граѓани е јасна и препознаена од македонските граѓани. Тие имаат силна доверба во вас и ви оддаваат почит и признание – за вашата храброст и посветеност. Вредностите кои секој припадник на Армијата ги покажува секојдневно, се вредности кои ги негувате и вие – офицерите и подофицерите во Генералштабот и вработените во Министерството за одбрана кои со посветеноста, професионалноста и интегритетот кој го имате го градите имиџот и на Министерството и на Армијата“, рече тој.
Министерот истакна дека „изминатиов период се започнати многу проекти, голем број проекти завршивме, како инфраструктурни, така и проекти за опремување и модернизација на македонската Армија“ и додаде дека следниот период особено внимание ќе се посвети на подобрување на условите на работа за секој вработен, затоа што „одбраната на државата зависи од секој еден од вас.“
Генералот Лафчиски порача дека „18. Август е денот кој ги обединува сите денови на командите и единиците кои ги славиме во Армијата, тоа е празникот кој го празнуваат сите сегашни и сите поранешни припадници кои што во изминатите 33 години придонесоа во изградбата на модерната Македонска Армија.“
За време на свеченоста, делегација од Министерството и Генералштабот предводена од министерот Мисајловски и делегација од семејствата на загинатите бранители, положија свежо цвеќе пред спомен-обележјето на загинатите бранители пред зградата на Министерството, оддавајќи им почит и благодарност за нивната пожртвуваност и храброст.
Претходно, делегации од Министерството за одбрана и Генералштабот, како и претставници од кабинетот на Претседателката, Собранието, Владата и Организацијата на резервни воени старешини положија венци со свежо цвеќе на Партизанските гробишта, на гробот на загинатиот претседател Борис Трајковски, на гробот на поранешниот претседател Киро Глигоров и на гробот на генерал Михаило Апостолски.
На свечениот собир на вработените Министерството за одбрана и Генералштабот присуствуваа и заменикот на началникот на Генералштабот, генерал-мајор Азим Нуредин, државниот секретар Елизабета Чуповска Ристова, директорот на Генералштабот, бригаден генерал Орце Јордев, вработени во Министерството и Генералштабот и останати гости.
Централната свеченост по повод Денот на Армијата ќе се реализира на 18 август во касарната „Јане Сандански“ во Штип.
Македонија
МВР: Не се води никаква постапка против Билјана Ивановска

Во врска со случајот со Билјана Ивановска поранешна претседателка на Антикорупциската комисија, Министерството за внатрешни работи известува дека против неа МВР не води никаква постапка.
„За сите пријави и постапки кои што ги води Обвинителството, тоа е единствено надлежно за одговори во врска со истите“, велат од МВР.
„11 часа по објавувањето на мојата кандидатура за градоначалничка на општина Центар, полицајци затропаа на мојата врата“, објави поранешната претседателка на Државната комисија за спречување на корупцијата (ДКСК) и актуелна независна кандидатка за градоначалник на општина Центар.
Во врска со пријавата против Ивановска, Обвинителството соопшти:
„Јавен обвинител од Основното јавно обвинителство Скопје постапува по приватна кривична пријава поднесена на 18.2.2025 година и презема дејства за да ги провери наводите. Како едно од дејствата е испитување на наведеното лице, кое во периодот на кој се однесува пријавата била претседателка на ДКСК. Поканата за испитување од Обвинителството е испратена на 25.7.2025 година и на ниеден начин не може да се доведе во релација со политичките активности на поканетата“.
Македонија
Поради пожар целосно прекинат сообраќајот кон ГП Јажинце и преминот на границата во двата правци

Министерството за внатрешни работи известува дека поради пожар во близина на Јажинце, прекинат е сообраќајот на патниот правец Тетово – ГП Јажинце кај село Рогачево, во двата правци, а затворен е и граничниот премин Јажинце.
Министерството за внатрешни работи во координација со другите надлежни институции презема мерки за гасење на пожарот.
„Апелираме до граѓаните да не тргнуваат кон ГП Јажинце до гасењето на пожарот и нормализирање на сообраќајот, за што соодветно ќе ја информираме јавноста“, велат од МВР.