Професорот на Медицинскиот факултет и хирург на Првата хируршка клиника на Универзитетскиот клинички центар на Србија, Владимир Дугалиќ, за Фонет изјави дека посетата на претседателот Александар Вучиќ на пациенти од Македонија на одделот за интензивна нега е „срамна политичка пропаганда“, пренесуваат српски медиуми.

Дугалиќ истакна дека понекогаш се кае што е дел од лекарската професија кога ќе види како некој пушта „ненадлежен човек без капа“ на интензивна нега, каде пристапот е строго забранет дури и за членовите на семејството на пациентите.

Професорот Дугалиќ нагласи дека „изгорениците се отворени рани“ и дека пациентите кои се жртви на пожарот во Македонија се „животозагрозувачка состојба“.

Тој рече дека поради ова јавно се одрекува од „колегите кои му дозволиле на Вучиќ да влезе на интензивна нега“, оценувајќи дека тоа е учество во политичка пропаганда која директно ги загрозува животите на луѓето.

Во оваа политичка пропаганда, како што наведе, учествува и министерот за здравство Златибор Лончар, на кој според Дугалиќ повеќе не може да му се верува бидејќи е подреден на власта.

На прашањето како е можно лекарите од УКЦ да му дозволиле на Вучиќ со голи раце да допира пациенти со изгореници опасни по живот, Дугалиќ одговори дека тој и неговите „нормални колеги се згрозени“ и повтори дека се одрекува од „оние колеги кои учествуваат во тој тип на политичка пропаганда“ на начин што може да ги загрози животите на пациентите.

Српскиот претседател Александар Вучиќ повтори дека неговата земја е изложена на „месеци на терор“ и ги нарече разговорите меѓу лидерите на САД и Русија голем чекор кон мирот, пренесува Анадолија.

По разговорот меѓу Владимир Путин и Доналд Трамп за Украина, српскиот претседател изјави дека мисли дека „ние сме далеку од мир“, иако најавата за прекин на нападите врз енергетската инфраструктура ја оцени како позитивна.

„Ова е исто така огромен чекор и му честитам на претседателот Трамп за тоа“, рече Вучиќ, нагласувајќи дека се надева оти разговорот меѓу претседателите на Русија и САД ќе доведе до траен мир.

„Немам извори ниту во Кремљ, ниту во Белата куќа со кои сум разговарал, само она што сум можел да го прочитам. Мислам дека сме далеку од мир, но добро е да се зборува за тоа“, рече Вучиќ додека гостуваше на Пинк.

Тој ги нарече протестите во Србија „месеци на теророт“. „Однадвор сме нападнати од обоена револуција. Ова се месеци на вонинституционален терор во Србија. Незапамтен терор во поновата историја на Србија“, рече тој.

Тој рече дека е многу важно да се разбере „што се случува во Србија“. Тој ги спореди протестите во Србија и Унгарија, наведувајќи дека тоа се протести против неколку „слободарски лидери“. Зборувајќи за наводите за употреба на звучен топ на масовните антивладини протести на 15 март во Белград, Вучиќ нагласи дека „такво нешто во Србија не постои“.

„Ако бил употребен звучен топ, јас повеќе не сум претседател“, рече тој.

Тој најави дека во Брисел ќе разговара со лидерите на НАТО и ЕУ за ситуацијата во Босна и Херцеговина со цел да се намалат тензиите. Тој смета дека апсењето на лидерот на ентитетот Република Српска, за кого Обвинителството на БиХ побара приведување, би било „вистинска катастрофа“.

„Мораме да се занимаваме со зачувување на мирот и стабилноста“, заклучи тој.

Како што истакнуваат од српскиот Завод за трансфузија на крв во Белград, резервите на крв во моментот се стабилни и доколку има потреба од трансфузија кај пациентите што беа повредени во пожарот во дискотеката во Кочани, а кои беа пренесени во Белград и моменно се на Ургентниот центар на КЦС, ќе бидат згрижени.

„Кога станува збор за повредените во пожарот во Кочани, што се однесува до крвта, тие се згрижени. Би сакала да забележам дека за такви повреди крвта не е од суштинско значење за лекување. Се разбира, никогаш не се знае како ќе се одвива текот на лекувањето и важно е да се напомене дека резервите на крв во овој момент се стабилни“, изјави Мирјана Кнежевиќ од Институтот за трансфузија на крв.

Како што наведе таа, Заводот за трансфузија на крв во моментот има резерви од четири дена, што е добра состојба, но дарувањето крв не треба да престане бидејќи секојдневно се потребни крводарителите.

„Вчера, во просторијата на Заводот за трансфузија на крв имаше уште неколку доброволни крводарители, но бидејќи тоа не е пресудно за повредените пациенти од Кочани, нема потреба од паника затоа што, доколку има потреба, ќе бидат згрижени во однос на трансфузијата и воопшто не смееме да се опуштиме бидејќи мора да бидеме свесно и одговорно општество и секогаш да имаме стабилни резерви“, нагласи Кнежевиќ.