Државната комисија за спречување на корупцијата (ДКСК) информира дека во периодот од распишувањето на Локалните избори во 2025 година до конституирањето на советите на општините и градот Скопје важат специфични забрани и мерки.

Нови инвестиции и вонредни исплати од буџетот не смеат да започнат или се извршат, освен ако претходно се обезбедени средства согласно закон.

Забрането е започнување постапки за нови вработувања или престанок на работен однос во државните и јавните институции, освен во итни случаи.

Политичките партии и кандидати не смеат да користат противправни или анонимни извори на финансирање.

Државниот имот и буџетските средства не смеат да се користат за изборна кампања или финансирање на политички активности.

Поткупот на избирачи и давањето или ветувањето на подарок за гласање е строго забрането.

Во периодот од 20 дена пред изборната кампања до нејзиното завршување, не смеат да се одржуваат јавни настани поврзани со изградба или пуштање во употреба на објекти со државни средства.

Министерството за финансии е задолжено да објавува сите буџетски исплати во изборниот период, освен редовни плати, пензии и комунални трошоци.

Јавните фондови, претпријатија и други субјекти со државен капитал треба да достават податоци за моторните возила до ДКСК во рок од десет дена од распишувањето на изборите.

Користењето службени простории, опрема и возила за изборни активности е забрането.

Забрането е притисокот и заплашувањето на гласачи и нивните блиски лица.

ДКСК ќе ја следи законитоста на изборниот процес и ќе презема мерки при сомневање за прекршување на законите.

Во изборниот период, Комисијата нема надлежност да дава мислења по барања поврзани со постапките на државните и локалните органи.

ДКСК ги повикува медиумите, здруженијата на граѓани и јавноста да пријавуваат прекршувања на забраните предвидени во законот.

Претседателот на Стоматолошката комора, Маријан Денковски, на прес-конференција изјави дека повеќекратните контролни надзори не откриле неправилности во работењето на Комората.

Тој ги демантираше тврдењата дека Комората не постапила по насоките од министерот и најави консултации со поранешни претседатели за да го слушнат и нивното мислење.

„Од она што го знаеме досега, се работи за некои ‘незаконски’ постапки на Комората од 2016 година, па дури и порано, односно од 2006 година. Ќе се направи средба со Лекарската комора зошто ако кај нас, во стоматологија, „незаконска“ едукација вршеле околу 15, како што беа наречени, нерегистрирани здруженија, во Лекарската комора, во системот на Континуирана медицинска едукација учествуваат или учествувале над 80 такви здруженија – меѓу кои доминираат членки на Македонско лекарско друштво“ додаде Денковски.

Најави дека ќе се бара јавно извинување доколку се докаже отсуство на финансиски или други криминали.

Министерството за здравство одговори дека одлуката за преземање на лиценцирањето е донесена врз основа на подолготрајна анализа и извештаи од две формирани комисии кои утврдиле неправилности и недостатоци во работењето на Комората.

„Потенцираме дека по извршениот надзор на првата комисија, формирана во 2024 година воопшто не е постапено по препораките, односно во целост се неточни тврдењата дека комисиите ‘немаат утврдени неправилности во кој било сегмент од работењето во Комората’, додека втората комисија веќе дава јасни насоки до МЗ за утврдените неправилности, недостатоци и предлог за дејствија што треба да се преземат“, велат од Министерството.

Министерството нагласи по одлука на Уставниот суд и на основа на фактичките наоди, министерот донел одлука да ги преземе надлежностите за лиценцирање сè додека не се воспостави законит, транспарентен и професионален систем.

Министерството за здравство одлуката ја соопшти во саботата. Тогаш, министерот Алиу информираше дека  надзорот на документите на Стоматолошката комора покажале сериозни пропусти, односно едукации преку нерегистрирани здруженија и сертификати кои неправилно се користеле за продолжување на лиценците. Информираше дека има и сомнеж за финансиска злоупотреба.

Денеска директорот на Бирото за јавна безбедност Александар Јанев, во СВР Тетово оствари средба со раководството, на која детално беа разгледани сите околности и преземените мерки по вчерашниот вооружен инцидент, во кој беше одземен еден живот, а повредени беа четири лица.

„Сакам граѓаните на Тетово и регионот да знаат дека полицијата е целосно мобилизирана и посветена. Се преземаат активности за да се гарантира и испорача безбедноста. Нема да дозволиме стравот и насилството на поединци да ја нарушат секојдневната сигурност и мирот во заедницата. Истовремено, на сторителите и сите кои мислат дека со оружје можат да решаваат спорови и несогласувања им порачувам дека ќе бидат пронајдени, изведени пред лицето на правдата и санкционирани. Полицијата ги стави во функција сите потребни служби со цел да бидат фатени сите инволвирани во овој инцидент“, дециден беше директорот на БЈБ Јанев, додавајќи дека безбедноста е наша заедничка вредност.

„Ги повикувам сите граѓани на Тетово и насекаде низ државата да соработуваат со полицијата, да пријавуваат информации и заедно да изградиме средина во која нема место за криминал и насилство. Само заедно можеме да се спротивставиме на поединците и групите кои не споделуваат исти вредности со нас чесните“, истакна Јанев заклучувајќи дека Македонија и сите граѓани заслужуваат мир и спокој, а полицијата е тука за да го испорача.