Топ
(Видео) Приведени татко и син во Кичевско, во домот криеле арсенал оружје

Полициски службеници од Одделот за криминалистичка полиција – Сектор за недозволена трговија со дрога, оружје и опасни материи во координација со Одделот за сузбивање организиран и сериозен криминал, ОВР Кичево и ОВР Гостивар приведоа две лица од кичевското село Србица и запленија поголема количина оружје.
Врз основа на претходна обезбедена наредба за претрес на дом, од судија на претходна постапка од Основниот суд Кичево се извршени претреси во домот и помошните простории на синот и таткото – Х. И. (27) и А. И. (52) во с. Србица.
При претресите пронајдени и одземени се четири автоматски пушки „калашников“, две полуавтоматски пушки, две пушки, седум рамки за автоматска пушка со куршуми, 12 пиштолски рамки со куршуми, пушкомитролез со добош за муниција, два митралеза – од кои еден митралез „М 53“, а другиот е протиавионски DSK 12,7 mm со постамент – цевка од тежок митролез, нож бајонет, седум пиштоли, револвер, над 3.500 куршуми, 11 рачни бомби со запалка, три рачни бомби без запалка, прибор за чистење оружје, футроли, маскирни ранци, маскирни елеци, двогледи и други предмети. Мерките и активностите за расчистување на овој случај продолжуваат и во текот на денешниот ден, а против лицата ќе бидат поднесени соодветни кривични пријави и ќе бидат предадени на Јавното обвинителство, соопшти полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нерешено кај уставните судии за измените со кои на независните кандидати ќе им биде потешко да влезат во изборна трка

Уставниот суд не донесе одлука за предметот за оспорените членови на Изборниот законик (ИЗ) со кои се штитат од конкуренција големите партии, на штета на независните граѓански организации и групи избирачи. Согласно спротивставените размислувања на судиите, кои беа изнесени и во текот на седницата, но и при гласањето дојде до изедначување на гласовите, имајќи во предвид дека денеска на седница беа присутни 8 од вкупно 9 судии, информираа од Уставен.
Ова значи дека дискусијата е исцрпена за овој предмет, но, постапката и понатаму останува отворена, по што Судот во полн состав од 9 судии ќе гласа за предметот наредната седница.
Подносители на иницијативата се Лилјана Поповска, Ѓорѓи Танушев, Костадин Ристоманов, Стојанчо Велков, Невена Георгиевска, Татјана Стојановска, Дејан Димитровски, Драгана Велковска, Горјан Јовановски, Јана Белчева-Андреевска, Јане Димески преку полномошник адвокатска канцеларија Петрушева.
Подносителите сметаат дека со оспорените членови се прави измена на членовите 61 и 62 од Изборниот законик , кои се однесуваат на условите за поднесување листи на независни кандидати за пратеници, како и за членови на совети и градоначалници. Се тврди дека е драстично подигнат прагот за поднесување на независни граѓански листи на изобри на 1 % од гласачкото тело, што според нив предизвикува нееднаква положба на граѓаните при здружување во иницијативни групи за поднесување на независни листи за учество на изборите. Се наведува дека овие измени создале нееднаквост на граѓаните и дискриминација во корист на партиите, имајќи предвид дека секоја партија која исто така претставува група граѓани, може да поднесе листи со кандидати, а е регистрирана со 1000 гласачи. Дополнително, според подносителите спорно е што измените се донесени во нетранспарентна и скратена постапка, без претходни консултации и јавна расправа.
Свет
Прва реакција на Путин по преговорите со САД: Го направивме првиот чекор, сакам да се сретнам со Трамп

Рускиот претседател Владимир Путин првпат реагираше на вчерашната прва рунда преговори со Американците за Украина.
Тој позитивно го оцени исходот од преговорите меѓу руската и американската делегација во Ријад, истакнувајќи дека средбата е првиот чекор за обновување на соработката во различни области, вклучително и Блискиот Исток, енергетиката и вселенското истражување. Според него, целта на разговорите била да се врати довербата меѓу двете земји, без која, како што тврди, не е можно да се реши ниту едно клучно прашање, вклучително и конфликтот во Украина, пренесуваат медиумите во регионот.
Путин нагласи дека Русија никогаш не ја отфрлила можноста за преговори за Украина и дека не ги прекинала контактите ниту со Европејците, ниту со Киев. Според него, европските и украинските власти ги прекинале или забраниле овие контакти. Тој исто така додаде дека Москва не се меша во внатрешните работи на САД и Европа, за разлика од европските лидери кои, според него, отворено влијаеле на американските избори и користеле навредлив тон кон политичките актери во САД.
Коментирајќи ја можноста за средба со Доналд Трамп, Путин рече дека волјата за одржување на средбата е обострана, но дека поради состојбата на односите меѓу двете земји, таквата средба е понапорна од обичен разговор „на шолја кафе“. Тој исто така истакна дека Трамп сега почнува да добива „објективни информации“ за ситуацијата.
Заклучувајќи за односите меѓу Москва и Вашингтон, Путин рече дека двете страни се согласиле за потребата од враќање на работата на дипломатските претставништва во нормален режим, што може да се смета за еден од првите конкретни чекори кон намалување на тензиите.
Свет
Зеленски: Не можам да ја продадам Украина

Претседателот на Украина, Володимир Зеленски, денеска ги отфрли барањата на САД за 500 милијарди долари минерали од Украина со цел Вашингтон да продолжи да обезбедува воена помош за Киев, велејќи дека САД досега не доставиле ни приближно до таа сума и не понудиле конкретни безбедносни гаранции во договорот, пишува Ројтерс.
Украинскиот лидер, кој е под силен притисок од Белата куќа на Трамп, според медиумот, рече дека Вашингтон и доставил на неговата земја 67 милијарди долари (64,22 милијарди евра) оружје и 31,5 милијарди долари (30,19 милијарди евра) директна буџетска поддршка за време на речиси тригодишната војна со Русија.
„Не можете да ги наречете овие 500 милијарди и да барате да вратиме 500 милијарди минерали или нешто друго. Ова не е сериозен разговор“, рече Зеленски.
Според него, предложениот договор не содржи безбедносни одредби што итно и треба на Украина за да се заштити од руска агресија. Тој рече дека нацрт-договорот предвидува САД да преземат сопственост на 50 отсто од клучните минерали во Украина.
„Јас ја бранам Украина, не можам да ја продадам нашата земја. Реков во ред, дајте ни некаква позитива. Напишете некакви гаранции, а ние ќе напишеме меморандум, некакви проценти“, рече тој.
„Ми рекоа: само 50 (проценти). Реков: Добро, не. Нека работат адвокатите уште малку, не ја завршија целата потребна работа. Јас сум само носител на одлуки, не работам на деталите од овој документ. Нека поработат на тоа“.
Прашањето за тоа колкава помош и дадоа САД на Украина станува од големо дипломатско значење додека Киев се обидува да ја задржи поддршката од својот најважен сојузник. Во своите коментари вчера, Трамп се запраша каде отидоа парите донирани за Украина.
Зеленски, одговарајќи на тие коментари, рече дека вкупната помош од САД и Европската унија изнесува 200 милијарди долари (191,69 милијарди евра) од вкупно 320 милијарди долари (306,71 милијарди евра) потрошени за вооружување за воените напори.
Украинците го поднесоа остатокот од трошоците од околу 120 милијарди долари (115,02 милијарди евра), додаде тој.