Црна хроника
Судот ги чека писмените извештаи од вештачењата за злосторството кај Смилковци
Истражниот судија кој работел на случајот со петкратното убиство кај Смилковци сè уште не добил писмени наоди и мислења изготвени од вештите лица, соопштија од Основниот суд Скопје 1.
Од таму објаснуваат дека обдукцијата физички е завршена, но судот уште нема добиено писмен извештај.
„Истрагата е во тек, а за евентуално нови сознанија и детали во врска со овој настан, јавноста ќе биде благовремено известена“ се вели во соопштението на судот.
Од Институтот за судска медицина во неделата соопштија дел од првичните информации за овој случај. Според нив, жртвите не биле претходно малтретирани, не се забележани повреди пред и по настапувањето на смртта, убиените починале од огнострелните рани.
Кај сите жртви најдени се по неколку прострелни рани, во грбот, главата и градниот кош. Пронајден е само еден куршум во телата на егзекутираните, што ги потврдува сомневањата дека злосторниците употребиле оружје со голема моќност.
Во четвртокот вечерта кај езерото во атарот на скопското село Смилковци, беа убиени Александар Наќовски, Цветанчо Ацевски, Кире Тричковски и Филип Славковски на возраст од 18 до 20 години од скопската населба Радишани и 45-годишниот Борче Стефковски од село Црешово додека ловеле риба на езерото кај Смилковци. Сé уште не се познати мотивите за ова грозоморно злосторство.
Засега полицијата заплени црвен „опел“ од постаро производство увезен од странство за кои постојат докази дека бил на местото на злосторството, а е најден 10 километри подалеку од местото на убиствата.
Министерката во понеделникот соопшти дека убијците не ја промашиле целта, поради што сè погласни се информациите дека се работи за луѓе кои добро знаеле да ракуваат со оружје.
По вчерашните протести во центарот на Скопје организирани по повод петкратното убиство, денеска е мирно. Полицијата е распоредена насекаде низ градот, а од МВР велат дека засега немаат регистрирано нови инциденти. Во вчерашните протести петмина беа повредени, искршено беше полициско возило, билборди, а приведени беа 10 лица, од кои петмина малолетници. /крај/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Возило од Албанија излетало од патот во Струшко: повредени се повеќе лица
Утрово во 08.10 часот, на магистралниот пат Ќафасан – Подмолје, кај клучката за струшкото село Радожда, патничко возило „мерцедес“ со албански национални ознаки, управувано од Ѓ.А.(55) од Елбасан, Република Албанија, излетало надвор од коловозот.
Во несреќата, со тешки телесни повреди се здобил совозачот Б.Х.(31), а со телесни повреди се здобиле возачот Ѓ.А. и сопатниците М.Џ.(51), Ц.П.(34)и Д.Х.(24), сите од Република Албанија, констатирани во болницата „Св.Еразмо“ во Охрид.
Надлежните информираат дека увид извршиле полициски екипи.
Црна хроника
Во оптек пуштил лажни евра: уапсен маж од Кичевско
Вчера во 03.00 часот, во казино на булеварот „Туристичка“ во Охрид, од слобода бил лишен Р.Б.(28) од кичевското село Долно Страгомиште.
Тој се сомничи дека во оптек пуштил лажни евра кои сакал да ги прикажи како вистинити, со што сторил кривично дело „фалсификување пари“, според член 268 од Кривичниот законик.
Полицијата соопшти дека против него ќе биде поднесена соодветна пријава.
Црна хроника
Жена од Скопско тешко повредена: ја прегазил трактор
Вчера во 18.55 часот во СВР Скопје, било пријавено дека во с.Р`жаничино, скопско, трактор „ИМТ“ со скопски регистарски ознаки, управуван од Г.К.(50) од с.Р`жаничино, удрил во пешакот С.Л.(57) од истото село.
Во несреќата со тешки телесни повреди се здобила С.Л., констатирани во Комплекс клиники „Мајка Тереза“ Скопје.
Извршен бил увид од увидна екипа од СВР Скопје.