Македонија
Царовска: Полагањето на матурата ќе се одржи во предвидениот законски рок
Подготовките за државната матура во учебната 2020/2021 година се во тек, а полагањето на завршните испити ќе се одржи во предвидениот законски рок, во јуни в година, рече министерката за образование и наука, Мила Царовска, при денешната работна посета на гимназијата „Таки Даскало“ во Битола.
„Би сакала да ги поттикнам учениците до крајот на ноември да изберат проектна задача во делот на матурата за оваа година и исто така до крајот на наредниот месец да изберат предмети што ќе сакаат да ги полагаат за матура. Не сакаме пандемијата да предизвика застој во развојот на нашите ученици, кои се нашата иднина. Токму затоа, во согласност со законските рокови, матурата ќе се извршува во текот на наредната година“, нагласи министерката Царовска.
Матура има во сите земји во регионот и во сите европски земји и овие завршни испити и покрај панедемијата, се одржаа и минатата година.
„Оваа година ќе треба да се одржи и во нашата држава заради тоа што не сакаме да бидеме исклучок по одредени негативни пракси. Токму затоа матурата е навистина значајна за утврдување на знаењата, но исто така и за понатамошниот развој на нашите млади граѓани, од кои очекуваме понатаму да ја водат државата и да го водат економскиот развој“, изјави министерката Царовска.
Таа дополни дека МОН во соработка со средношколците, со училиштата, со наставниците и со здравствените власти, ќе обезбеди успешно и безбедно полагање на матурските испити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.