Црна хроника
Сопствениците на кафе барот ќе одговараат за смртта на тројцата стружани
Полицијата синоќа ги приведе тројцата косопственици на кафе – барот „Пливалиште“, каде во саботата од струен удар починаа тројца стружани
Против триесетгодишниот Ц.В., триесет и едногодишниот К.М. и дваесет и деветгодишниот Г.Ј., тројцата од Струга ќе биде поднесена кривична пријава за тешки дела против општата сигурност.Стручната екипа која направила увид на шанкот и на платформата, констатирала нестручно и непрописно изведување на електроинсталацијата на објектот, односно на електричниот кабел кој од контролното броило водел до светилката – фенер на централниот дел од платформата.Поради тоа, дошло до електричен спој кој струјата ја пренел до металната конструкција на платформата и држачите на скалите што е причина за смртта на трите лица.Еден од сопствениците, триесетгодишниот Ц.В. признал дека тој лично ја поставил електричната инсталација, односно го поврзал електричниот кабел од контролното броило до светилката каде всушност се случил електричниот спој.„Шанкот во комплексот Пливалиште, работел без никаква документација односно бил нелегален угостителски објект“ соопштува МВР.Во саботата попладне во кафебарот „Пливалиште“ во центарот на Струга починаа Јосиф Докоски, Кире Ѓоргоноски и Јонче Кувенџиески-Шишко.Според полицијата, околу 14 часот, еден од сега починатите, се упатил кон езерото во близина на шанкот и платформата.Откако тој не се вратил, кон истото место се упатиле и другите двајца.Обдукцискиот наод покажал дека смртта настанала од електричен удар.Тројцата пријатели вчера беа погребани во Струга, а денеска во нивниот град е прогласен Ден на жалост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.