Свет
Норвешка и Финска подготвени да и` помогнат на Шведска
Шведска се соочува со голем скок на бројот на заболени со коронавирус. Поради недостиг на медицински капацитети, помош понудија соседните држави – Финска и Норвешка.
Стокхолм уште треба официјално да побара помош, за да можат фински и норвешки лекари да се вклучат во борбата против заразата. Здравствените власти во шведскиот главен град досега ги ангажираа сите расположливи лекари, но и воени сили, за да се изборат со епидемијата, пренесе „Фајненшл тајмс“.
„Сè уште не добивме официјално барање за помош, но гледаме каква е состојбата во шведските болници, па затоа сме подготвени да ‘скокнеме’“, рече главниот секретар на финското Министерство за социјална заштита и здравје, Кирси Варила.
Нејзината норвешка колешка Марија Јарман Бјерке, пак, им изјави на новинарите дека нордиските земји имаат договор за заемна медицинска помош.
„Ако Шведска побара помош, ние ќе го исполниме тоа барање“, рече таа.
За време на првиот и вториот бран на коронавирус, Шведска имаше значително поголем број заразени лица од соседните Норвешка и Финска.
Некои го припишуваат ова на „прелибералниот“ модел на контрола на пандемијата, кој не вклучуваше речиси никакви значителни рестриктивни епидемиолошки мерки во споредба со блокадите во остатокот од Европа. Само во декември Шведска досега има забележано околу 1.400 смртни случаи од Ковид-19. Во Норвешка, 100 лица починаа во истиот период, а во Финска, 80 лица.
Стокхолмскиот Регион извести дека тамошните болници се соочуваат со многу големи проблеми, бидејќи 99 проценти од креветите на одделите за интензивна нега се полни, а здравствените синдикати предупредуваат дека голем број здравствени работници ги откажуваат договорите за вработување поради зголемени инфекции, хоспитализации и смртни случаи.
Така, само во областа на метрополата, околу 3.600 здравствени работници поднеле оставки од почетокот на пандемијата. Флуктуациите на вработените се чести, но шведските медиуми предупредуваат дека ова е за 900 повеќе отпуштања отколку во истиот период минатата година.
Сепак, се чини дека Шведска сè уште нема намера да бара помош од соседите. Според директорката за подготвеност на шведскиот Национален комитет за здравје и благосостојба, Јохана Сандвал, состојбата во здравствената заштита е тешка, но земјата сепак може да се справи сама.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Сирија го призна Косово
Претседателката на Косово, Вјоса Османи, објави дека Сирија ја признала независноста на Република Косово, пренесува Анадолу.
Османи, која е во официјална посета на Ријад, изјави дека со поддршка на саудискиот престолонаследник Мохамед бин Салман, е постигнат договор со кој Сириската Арапска Република ја признава Република Косово.
Османи му се заблагодари на сирискиот претседател Ахмед ал-Шарија за одлуката за признавање на Косово, како и за неговата поддршка за Косово.
„Народот на Косово и Сирија многу страдаше и жртвуваше за да постигне слобода. Затоа, ова меѓусебно признавање денес не е само признавање на државниот суверенитет, туку и признание на жртвите на многу генерации за слободен живот“, рече Османи.
Таа, исто така, му се заблагодари на саудискиот престолонаследник „што го овозможи овој историски чин меѓу двете земји“. Со признавањето од Сирија, сега 120 земји ширум светот го признаа Косово.
Свет
Боинг ја одложува испораката на авиони, се соочува со казна од 5 милијарди долари
Авиокомпанијата Боинг објави дека производството на долгоочекуваниот авион 777X се одложува до 2027 година, што ќе ја чини дури 5 милијарди долари казни за доцнење на испораките. Причината се сè построгите регулаторни пречки што мора да ги надмине, пишува Би-Би-Си.
Одложувањето доаѓа во време на растечка побарувачка за меѓународни патувања, додека Боинг се обидува да го промовира својот најнов модел како наследник на легендарните 747 и 777. И покрај проблемите со довербата на компанијата по низа инциденти, вклучувајќи го и оној во кој вратата на авионот паднала од лет, Боинг соопшти дека приходите во трите месеци што завршија во септември се зголемиле за 30 проценти на 23,27 милијарди долари во споредба со истиот период минатата година.
Главниот извршен директор Кели Ортберг изјави дека компанијата работи на „враќање на довербата кај сите наши засегнати страни“.
Тој изрази разочарување поради доцнењето на 777X, но додаде дека авионот „се покажал добро на тестирањето во летот“. Тој нагласи дека Боинг работи на „стабилизирање на нашите операции за да можат перформансите на нашата компанија целосно да се опорават“.
Свет
Протекоа американски разузнавачки проценки: Путин е порешителен од кога било да ја продолжи војната во Украина
Според најновата проценка на американските разузнавачки служби, рускиот претседател Владимир Путин е порешителен од кога било да ја продолжи војната во Украина и да постигне победа на бојното поле.
Анализата, која беше презентирана пред членовите на Конгресот овој месец, наведува дека разузнавачките агенции не гледаат знаци дека Русија е подготвена за компромис, и покрај напорите на американскиот претседател Доналд Трамп да посредува во мировните преговори, објавува NBC News.
Оваа проценка е во согласност со ставовите на американските и западните разузнавачки служби од почетокот на руската инвазија во февруари 2022 година.
Сепак, високи американски претставници сега веруваат дека Путин е потврдоглав во своите ставови од кога било. Соочен со масовни загуби на војници и економски проблеми дома, Путин, според проценките на разузнавачките служби, е посветен на освојување на украинска територија со цел да ги оправда огромните човечки и финансиски жртви на војната.
Во јасен знак на растечка фрустрација, претседателот Трамп минатата недела го откажа планираниот состанок со Путин во Будимпешта и воведе казнени мерки против Москва првпат откако ја презеде функцијата во јануари. Новите санкции се насочени кон две големи руски нафтени компании.
„Само почувствував дека е време“, им рече Трамп на новинарите, опишувајќи ги новите санкции како „огромни“. Тој додаде дека „чекал долго време“ да ги воведе, но се надева дека „нема да потрае долго“. „Се надеваме дека војната ќе се реши“, рече тој.
Белата куќа одби да коментира за проценката на разузнавањето, осврнувајќи се на јавните изјави на Трамп. „Како што изјави претседателот, ова се огромни санкции против нивните две големи нафтени компании за кои се надева дека ќе помогнат во завршувањето на војната“, рече еден функционер.
„Тој јасно стави до знаење дека е време да се запре убивањето и да се постигне договор за завршување на војната. Соединетите Држави ќе продолжат да се залагаат за мирно решавање на војната, а трајниот мир зависи од подготвеноста на Русија да преговара со добра волја.“
Трамп долго време ветуваше дека ќе посредува за крај на војната и за време на кампањата тврдеше дека ќе обезбеди мир во рок од 24 часа по враќањето во Белата куќа. Сепак, неговите претходни напори да ја убеди Русија да прекине со огнот и да седне на преговарачка маса не вродија со плод.
Неговата реторика се промени во последните месеци, а фрустрацијата и нетрпението кон Путин стануваат сè поочигледни.
„Секој пат кога разговарам со Владимир, водиме добри разговори, а потоа тие не водат никаде. Тие едноставно не водат никаде“, рече Трамп минатата недела.

