Безбедносните камери кои пред две години беа поставени на најфреквентните улици, мостови и булевари низ Скопје не беа во функција кога се случи масакрот кај Смилковци, кога беа убиени петмина недолжни граѓани.

„За жал, камерите кога се случи грозоморното убиство не беа во функција и не можевме да сметаме на една ваква технолошки моќна алатка за разоткривањето на најтешкото кривично дело со кое сме се соочиле. Меѓутоа со несебично залагање на сите припадници на министерството за внатрешни работи кои буквално деноноќно работеа на терен од моментот кога се случи убиството до моментот на откривањето на лицата кои ги сомничиме за сторено кривично дело ’тероризам’ успеавме да го разрешиме овој комплициран случај“, рече министерката за внатрешни работи, Гордана Јанкулоска.

Целиот полициски врв денеска беше во СВР Скопје и го промовираше проектот „Безбеден град“. Камерите кои одамна беа само поставени низ скопските улици, од понеделникот почнаа да снимаат по 24 часа.

Ќе ги „ловат“ сообраќајните прекршоци, но и ќе и’ помогнат на полицијата и во разоктивање на тешки кривични дела и во потрагата по криминалци. Некои од камерите ќе бидат статични, а некои ќе ротирааат. Несовесните возачи казната ќе ја добијат на домашна адреса.

Во оваа фаза на проектот, камерите функционираат во Скопје и Куманово, а се очекува да почнат да функционираат и во Тетово.

„Инсталиравме повеќе од 300 километри оптичка мрежа и во моментот кога проектот ќе биде целосно завршен, ќе бидат во функција над 600 камери кои ќе вршат мониторинг на просторите  каде најчесто имаме јавни собирања, на најфреквентните и стратешки сообраќјници, влезовите и излезите на градовите. Со овој проект докажуваме дека МВР постојано инвестира во јакнење на капацитетот. Овојпат промовираме еден високо технолошки проект за кој со задоволство можам да кажам дека малку земји од поширокото опкружување може да се споредат со технолошките решенија кои во моментов ги има Македонија“, рече Јанкулоска и додаде дека ќе продолжат да вложуваат во човечки ресурси кои ќе управуваат со оваа опрема.

Првата фаза на проектот започна во 2009 година, но МВР го одложуваше поради економска криза. Проектот беше промовиран денеска симболично на „Денот на македонската полиција“./крај/мвр/фф