Македонија
Спасовски на регионалната тинк-тенк средба „Ковид-19 и демократијата на Западен Балкан“
Министерот за внатрешни работи, Оливер Спасовски, учествуваше на регионалната тинк-тенк средба „Ковид-19 и демократијата на Западен Балкан“ на сесијата со наслов „Зајакнување на демократијата на Западен Балкан“.
„Општествата соочени со ваквите закани по општите јавни интереси беа принудени да дадат соодветни одговори. Одговори што примарно беа фокусирани на заштита на луѓето, на секој поединец, но и на системите, на институционалната, вонинституционалната и социо-економската функционалност, што се јави како каузална неопходност од здравствените мерки и потреби за превенирање на пандемијата“, рече министерот Спасовски во своето обраќање.
Според Спасовски, генерално гледано, тие институционални одговори беа унисони за сите држави, а по глобалното прогласување на пандемијата од страна на СЗО, тогашната техничка влада на Република Северна Македонија, покрај примарната законска улога за подготвување фер и демократски избори, доби улога да презема мерки за заштита на јавното и индивидуалното здравје на граѓаните, за заштита и динамично кондиционо одржување на здравствениот систем како прва брана против пандемијата, но и за заштита на социо-економските капацитети и функционалноста на општеството во целина како колатерално загрозени сегменти од живеењето.
„И, веднаш, на самиот почеток, ни беше јасно дека пандемијата, следствено здравствено-медицинските сознанија, препораки и насоки на дејствување, коренито ќе го промени севкупниот дотогашен начин на живеење и функционирање на државите. Имено, заштитата на јавното здравје, особено заштитата на тогаш веќе детектираните ранливи категории граѓани, јасно нѐ спротивстави на фактот за своевидно рестриктирање на одредени универзални човекови права и слободи“, посочи Спасовски.
Како што појасни министерот Спасовски, следејќи ги сопствените согледувања и процени, но и искуствата и дејствувањето на сите други, како во регионот така и пошироко, државата беше принудена на носење ригорозни мерки, како што е, на пример, карантинот или целосното затворање што, пак, од своја страна, значеше ограничување на низа човекови права и слободи – право на движење, право на работа итн.
„Сите ние мораше крајно објективно и одговорно да извагаме што се добива, а што се губи, што е приоритетно, а што е второстепено, што може, а што не може во дадените околности, имајќи ги притоа на ум секогаш фактите од научно верификуваните сознанија за вирулетноста на Ковид-19, опасните здравствени импликации, потоа предикциите за ширењето на вирусот, што, за жал, се остварија, и врз основа на тоа – да дејствуваме“, истакна Спасовски.
Од друга страна, ограничувањето на стекнатите права и слободи, според министерот за внатрешни работи, не е лесно прифатлива реалност. Појавите на револт, страв и несигурност се очекувани фрустрирачки производи на таквите мерки во сите демократски земји, а особено за општествата што се наоѓаат во фаза на системска консолидација, како што се, на пример, во поголема или помала мера земјите од регионот на Западен Балкан.
„Секој од нас е совршено свесен дека универзалните човекови права и слободи се точки на потпирање на модерните демократски општества. И дека се есенцијални за просперитетот на секој наш граѓанин. Но, исто така мораме да бидеме свесни за исклучителноста на состојбата, која буквално нѐ притисна во клинч изнудувајќи од нас одлуки што верувам дека се со привремен карактер“, нагласи Спасовски додавајќи дека заштитата на јавното здравје, како што покажа реалноста, е приоритет пар екселанс, при што просторот за компромиси е многу мал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Костадиновска-Стојчевска од Пустец: Идеалите на Делчев за слобода и рамноправност се нашиот патоказ кон Европа
Министерката за култура Бисера Костадиновска-Стојчевска, денеска во своето обраќање на свеченоста по повод откривањето на спомен биста на македонскиот великан Гоце Делчев во Пустец, Република Албанија, изрази задоволство дека заедно со Македонците од другата страна на границата, оддава почит на еден од најсветлите ликови на нашата историја, идеолог и борец за слободна и независна македонска држава.
„Делото на Гоце Делчев ги поврзува сите Македонци, каде и да сме. Ние нема никогаш да се откажеме од големите дела и големите зборови на нашите револуционери кои биле на вистинската страна на историјата, како што сме ние денес. Ние кои сме во прогресивниот табор и кои на државата и посакуваме светла европска иднина со рамноправни граѓани и среќни млади генерации“, рече Костадиновска-Стојчевска по повод откривањето на бистата на Делчев, на годишнината од неговата смрт.
Минситерката за култура посочи дека народните херои, како Гоце Делчев, и нивните идеали за слобода и рамноправност се нашиот патоказ кон Европа. Таа нагласи дека неговата визија за светот како поле за културен натпревар помеѓу народите нема никогаш да го изгубат значењето во нашето колективно постоење и во нашето настојување да создадеме сигурна, просперитетна и заедничка иднина.
„Останавме доследни на нашето ветување дека нема да престанеме да градиме мостови на поврзување и дијалог“, додаде Костадиносвка-Стојчевска која на свеченоста присуствуваше со директорката на Завод и Музеј-Битола, Мери Сојанова која во континуитет ги продолжува проектите на „Смарт фор ју ту“, за прекугранична соработка со Албанија, со што активно придонесува за поврзаноста на населението во граничниот појас.
Бистата на Делчев е поставена на иницијатива на Македонска алијанса за европска интеграција, МАЕИ, чиј претседател Васил Стеровски дека оваа биста е симбол на нашата непоколебливост и верба во принципите на правда и слобода.
„Во овие тешки времиња, повеќе од кога било ни е потребно единство и решителност. Нека примерот на Гоце Делчев биде наш водич и инспирација“, рече Стеровски кој додаде дека како Македонска алијанса за европска интеграција продолжуваат да се борат за правата и идентитетот на македонскиот народ во Албанија.
На свеченоста по повод 121 годишнината од смртта на големиот револуционер присуствуваа претставници на Движеньето “За наша Македонија”, на Македонска ализанса за европска интеграциа од Голо Брдо, од Светскиот Македонски Конгрес, од Заедницата на Македонците од Егескиот дел на Македонија протерани ог Грција, од Соузот на здружениата на Македонците и децата бегалци од Егерскиот дел на Македониа МАКЕДОН како и од Македонскиот национален совет на Србија.
Бистата на Гоце Делчев е изработена од уменикот Зоран Тошевски, а е поставена пред цркавата „Св. Архангел Михаил“ во Пустец, на плоштадот именуван по Делчев. Како што велат од Македонската алијанса за европска интеграција, МАЕИ, со поставувањето на бистата на големиот херој, Македонците од Пустец ја потврдуваат својата верба дека вредностите за кои тој се борел остануваат живи и водилка и за денешните генерации. Поставувањето на оваа биста ќе придонесе за зачувување на македонското културно наследство и идентитет во областа Преспа.
Македонија
Османи: На идните генерации не им треба мрачното минато, туку светлата европска иднина
Бујар Османи, во својство на претставник на Европскиот Фронт, денес одржа отворена дебата на тема: “Исклучувачки национализам во мултиетничките држави”
Османи на дебатата потенцира дека баналната реторика на македонскиот опозициски блок за наводното отфрлање на настаните од 2001 година, не е ништо друго освен залуден обид да се намали вистинската сила на Албанците наредени во неспорниот победнички блок – Европскиот фронт.
“На идните генерации не им треба мрачното минато, туку светлата европска иднина, во постојан сојуз со НАТО и САД” рече Османи и повика еднаш засекогаш да се осуди мрачната и безнадежна путинистичка политика.
Воедно, Османо истакна дека: “Кампањата за претседателски и парламентарни избори на Европскиот фронт е најпозитивната и најпрогресивната кампања од сите политички опции во земјава досега”, при што додаде дека јасната програма со конкретни развојни проекти, како и конкретниот преглед на европскиот пат на Северна Македонија за полноправно членство во ЕУ до 2030 година, се главните столбови на опцијата на коалицијата предводена од ДУИ која на 24 април доби плебисцитна поддршка кај Албанците и другите заедници и која ќе се заокружи на 8 мај.
Дебатата беше поткрепена со излагањата и на проф. д-р. Арта Билали, проф. д-р. Башким Селмани и Даут Даути, писател и публицист.
Панелистите во своите излагања ги истакнаа негативните ефекти од подгревањето на национализмот и владеењето на нееднаквоста во општеството, односно ја истакнаа потрбата за вистинска еднаквост меѓу Албанците, Македонците, Турците, Ромите, Србите, Бошњаците, Власите и сите други граѓани без разлика на нивната етничка или верска припадност.
Македонија
Делегација на Левица положи цвеќе на гробот на Гоце Делчев
Денес, делегација на Левица, предводена од потпретседателот на партијата, Реџеп Исмаил-Хактан, заедно со уште двајцата соборци како членови на Централниот комитет на Левица, Александар Димитриевиќ и Мери Георгиевска, положи цвеќе на вечното почивалиште на апостолот на македонската националноослободителна борба – Гоце Делчев.
Во овој историски момент, како никогаш досега во историјата од независноста на Македонската држава, од страна на домашните квислинзи и вазали, а во спрега со странски емисари и останати империјалистички намесници, загрозени се фундаментите на националната свест на Македонскиот народ. Еден таков пример е токму т.н. Француски предлог со кој квислиншката власт, во име на некаквиси „европски вредности“, задоволувајќи ги великобугарските апетити, наметнуваат политики кои директно го сквернават ликот и делото на бастионот на македонската национална свест, Гоце Делчев.
Оттука, уште еднаш ги повикуваме сите политички чинители во Македонија да ги поддржат црвените линии утврдени во петте точки од нашата Македонска платформа, со што ќе ставиме до знаење на сите, како странски, така и на домашни поткопувачи на македонската државност, дека повеќе не се прифатливи никакви уцени и компромиси на штета на македонските национални интереси, сè со цел да се запре понатамошното разградување на Републиката, се вели во партиското соопштение.