Македонија
Вештачењето покажало дека Нинџа не бил во ВМРО-ДПМНЕ во периодот за кој тврдеше дека слушал како се делеле наредби за 27 април
Сведокот Александар Василевски-Нинџа не бил во седиштето на ВМРО-ДПМНЕ во перидот за кој пред судот рече дека сведочел како се организирале протестите и упадот во Собранието на 27 април од страна на обвинетите. Ова е заклучокот од вештачењето на вештото лице Мирослав Котевски, во кое се анализираат телефонските броеви и контактите на Нинџа. Првиот мобилен број на Нинџа, според вештачењето, се најавил на микробазната станица на ВМРО, која го покрива подрачјето каде што се наоѓа седиштето на ВМРО-ДПМНЕ, дури во 22.08 минути на 27 април 2017 година. Вториот број, пак, во 22.19 минути. Со ова обвинетите го побиваат исказот на Нинџа, кој пред судот сведочеше дека во 18.03 минути бил во ВМРО-ДПМНЕ и останал до 19 часот, а од каде се давале наредби за 27 април.
„Прв и единствен пат на базната станица на ВМРО е прикачен во 22.18 минути на 27 април. Во 22.53 се регистрира бројот на базната станица на ССМ. Во согласност со воспоставениот сообраќај на бројот од Нинџа, во периодот од 16 часот до 23 часот неговата позиција е следна: првата регистрација е во 16.05 и е регистриран на зградата на ССМ. Следното е интернет-врска во 16.13 од новата базна станица на ‘Македонски телеком’, тоа значи дека се движел од кејот на Вардар кон плоштадот Македонија. Во 17.12 минути е регистриран на зградата на ‘Алмако’, а во 17.14 се пререгистрирал на новата зграда на ‘Телеком’. Во 18.57 тој се регистрира на базната станица на Домот на АРМ, а набргу се регистрира на зградата на ЕВН. Се движел северно од Собранието. Потоа бил регистриран кај Работничкиот дом. Се движел во реонот на Паркот на жената борец. Следното негово конектирање е во 22.17 минути, и тоа на базната станица на ‘Алмако’. Потоа е регистриран на базната станица на ВМРО. Она што е важно е дека тој во 22.19 часот првпат се прикачува на базната станица на ВМРО. Тој тогаш добива повик, но не одговорил. Кога престанува ѕвонењето, следната базна станица каде што бројот е регистриран е ‘Алмако’. Во зградата или надвор од зградата бил повеќе од една минута“, рече вештакот Мирослав Котевски.
Во 18.04 часот, според вештакот, имало обид за повик помеѓу двата телефонски броја за кои Обвинителството тврди дека се на Нинџа. Едниот број бил конектиран на базната станица на „Алмако“, а другиот на базната станица од новата зграда на „Македонски телеком“. Александар Василевски-Нинџа во своето сведочење посочи дека во тој период пристигнал во ВМРО-ДПМНЕ, што обвинетите го побиваат со податоците од базните станици. Вештакот посочи дека двата броја не биле користени од Нинџа бидејќи во исто време биле конектирани на две базни станици.
„Се прикачува на старата зграда на ‘Македонски телеком’, се движел по кејот. Во периодот од 18 до 22 часот е покрај Собраниетио и Паркот на жената борец. Од 22.08 до 22.13 часот е регистриран на базната станица на ВМРО за потоа движењето да биде лоцирано во овој дел“, рече вештакот за вториот број на Нинџа.
Василевски, кој е еден од 16-темина обвинети на вкупно 211 години затвор за упадот во Собранието, сведочејќи пред судот во јуни годинава, рече дека на 27 април 2017 година во седиштето на ВМРО-ДПМНЕ дошол во 18.03 часот и слушал како се издаваат наредби од страна на обвинетите за упадот во Собранието.
Вештакот пред судот посочи дека фајловите со докази од комуникациите биле незаштитени и со нив можело да се манипулира, односно да се додаваат и одземаат контактирани броеви.
„Презентирани се 168 мобилни телефонски броеви и повеќе од 200 листинзи за разни телефонски броеви. Заклучив одредена неконзинстентност во барањата кон телеком-операторите. Идентификував 18 телефонски броја за кои има листинзи, а нема барања. На 64 броја има двојни и тројни листинзи во самите наоди. Од 168 броја во доказите, бројот 075378***, воден како број на Спиро Ристовски, има остварено комуникација со шест броја. Едниот број во сопственост на Миле Јанакиески има направено комуникација со пет броја, а другиот со два броја. Бројот го кажав зашто не најдов доказ дека тој му припаѓа на Спиро Ристовски, туку на Министерството за образование и наука. Дикриптивно во еден од доказите пишува дека бројот е на Спиро Ристовски. Бројот што се води на Спиро Ристовски, а за кој не видов доказ дека е негов, од листингот на 27 април има 30 реализирани комуникации, од кои 25 се СМС-пораки и пет говорни комуникации. За тој број од ‘Телекомот’ се разменети 74 СМС-пораки, 1 ММС-порака, 11 приклучоци кон интернет и 24 говорни комуникации. Бројот што се води на Спиро Ристовски нема воспоставено комуникација со мобилните телефони на Миле Јанакиески. Двата телефона на Миле Јанакиески се користени од две лица бидејќи остварувале меѓусебна говорна комуникација“, рече вештакот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тренчевска: Од 2017 година до денес најниската исплатена пензија ја покачивме за 5.309 денари
„330% повисока социјална помош, 53% повисоки пензии, 180% повисока минимална плата, 40 000 просечна плата се нашите резултати и знам дека тоа можеби не е доволно. Затоа вечерва стојам пред вас не како жена, туку како ваша пријателка и комшивка, како жена која работеше со интегритет и бара поддршка за број 1 на 8 мај“ порача Тренчевска од говорницата на митингот во Радовиш.
Ко-носителката на изборна единица 4 од СДСМ, Јованка Тренчевска вечерва на радовишани им порача дека вистинскиот избор е јасен и дека само СДСМ е опција која ќе го води напредокот на општеството.
„Вие највозрасните кои гледам ве има тука во голем број, а со кои деновиве често се среќавав и често ме прашувавте зошто не може покачување од 5000 денари за секој од вас, Ве потсетувам дека од 2017 година до денес најниската исплатена пензија ја покачивме за 5.309 денари, и овој месец најниската исплатена пензија изнесува 13 880 денари. Стабилната исплата на вашите пензии ќе биде доведена во прашање со лажните ветувања на ВМРО, кои слушам деновиве дека започнаа да го раситнуваат лажното покачување на пензиите на месеци, на години и на нови методологии. Знаат и тие дека на лагата и се кратки нозете! Знаат дека 5000 линеарно е невозможно. Но дека е добро за да манипулираат со највозрасните“ рече Тренчевска.
Таа истакна дека во новиот мандат СДСМ се обврзува минималната пензија да ја покачи на 20.000 денари додека просечната пензија ќе ја покачи на 30.000 денари.
„Да продолжиме да градиме мостови посилни од ѕидовите и омразата кои ни ги наметнува ДПМНЕ“ истакна Тренчевска во нејзината покана за граѓаните за да излезат на гласање на 8ми мај.
Македонија
Мицкоски од Тетово: Во рамките на проектот за 250 милиони евра за инфраструктурен развој на општините, дел ќе се инвестира и во општините во западна Македонија
„Живееме под едно небо, делиме исти проблеми, исти предизвици. Маката ни е иста, и копнееме по заеднички работи. Денес Македонија е држава каде управуваат стотина души кои ги запоседнале институциите и грубо ги злоупотребуваат. Секој тендер поминува низ нивни раце, за секој бизнис процентот на добивка го определуваат истите луѓе. Тој артаноиден систем стана синоним за корупција и неказнет криминал. Систем на искривени вредности и непринципиелност која државата ја носи во пропаст“, истакна претседателот на ВМРО-ДПМНЕ, Христијан Мицкоски од митингот во Тетово.
Мицкоски додаде дека доаѓа ново време, се врти нов лист, нов почеток.
„Овде од Тетово објавувам дека веднаш по победата и формирањето на влада значаен процент од буџетот ќе оди за развој и решавање на децениските инфраструктурни проекти на Тетово, Гостивар, Кичево, Струга, Дебар и повеќе други општини од западна Македонија“, вети Мицкоски.
„Се обврзувам дека во рамките на проектот за 250 милиони евра за инфраструктурен развој на општините дел ќе се инвестира и на овие места овде. Подеднакво ќе градиме и работиме за развој на штипско Ново село, но и за тетовско Теарце, за струмички Куклиш, но и за тетовско Одри“, порача претседателот на ВМРО-ДПМНЕ.
Тој рече дека на народот му е доста од удирање во гради, зборење за права, а во реалноста сето тоа да се сведе на крадење и тендери. Реално и со дела да се менува животот на луѓето и тоа идната Влада предводена од ВМРО-ДПМНЕ ќе го направи.
„За да се случи ова што ви го зборувам, на 8-ми мај мора да се заврши започнатата работа. Цунамито е кренато. Тоа цунами треба да удри на денот на изборите и да ја оддува забрефтаната од криминал власт. Решението против сите сценарија кои ги прават од СДСМ и ДУИ е излезноста“, порача Мицкоски.
Тој ги повика граѓаните на осми мај да излезат и да гласаат, време е да започнат промените во Македонија.
Македонија
Битиќи: Бидете патриоти, изберете европска иднина на соживот и плати од 1.300 евра
„На 8-ми мај излезете на гласачките места и со заокружување на бројот еден да ги сочуваме темелите на државата, на демократските вредности, на внатрешната кохезија на етникумите и верските заедници. Бидете патриоти и изберете безбедна и европска иднина, каде ќе бидеме сплотени и ќе имаме просечна плато до 1.300 евра“, порача на денешните средби со жителите на Бутел и Чучер Сандево, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Битиќи истакна дека длабоко верува дека мнозинството од граѓаните не сакаат враќање 20 години назад во минатото, во заробена држава и поделено општество, во држава во која минималната плата изнесуваше под 10.000 денари.
„Гледате политичари кои дефилираат по митинзите со националистички пароли и пораки за изолација на државата. Но, уверен сум дека со вашиот глас за бројот 1 ќе ги замолчите, ќе им покажете дека вашата одлука е да имаме нова влада која ќе продолжи државата да ја води кон Европската унија, кон нејзините вредности, “ рече Битиќи и посочи дека СДСМ и коалицијата имаат програма која ќе ја исполни оваа мнозинска желба на граѓаните на Македонија.
Нагласи дека агендата на националистите е празна, а програмите им се полни со празни зборови, затоа нудат само несигурност и страв меѓу граѓаните.
„Знаеме дека патот до ЕУ е тежок, со многу пречки пред нас, но ЕУ е единствениот начин да ги смениме работите на подобро, во економијата, во образованието, во здравството.
Не смееме да се откажеме од европското семејство и да ги замолчиме националистите“, порача Битиќи.
Зборувајќи за мерките од предизборната програма на СДСМ, Битиќи посочи дека членството во ЕУ не само што ќе однесе посилна кохезија помеѓу различните етнички и верски заедници во Македонија, туку тоа ќе значи и подобар и поквалитетен живот за сите граѓани
„Пред вас излегуваме со конкретни верувања, за кои во минатото покажавме дека ги исполнуваме, а ќе ги исполниме и сега. Гарантирам е просечна плата од 1.100 евра и минимална плата од 600 евра, кои со влезот во ЕУ проектираме да достигнат до 1.300 евра односно 800 евра“, им порача Битиќи на жителите на Бутел и Чучер Сандево.