Европа
Меркел: Европа уште е далеку од решение за распределба на бегалците
Европската унија го направи „првиот чекор“ кога го постигна договорот за распределба на 120.000 бегалци, но сé уште е „уште далеку“ од конечното решение коешто го нема без трајните квоти, оцени во четвртокот германската канцеларка Ангела Меркел.
„Го видовме само првиот чекор, но сé уште сме далеку од местото на коешто треба да стигнеме“, оцени германската канцеларка Ангела Меркел во долниот дом од парламентот, ден по самитот на Европската унија, залагајќи се за „постојана процедура за распределба на бегалците по земјите членки“, пренесува AFP.
На ЕУ ѝ е потребна помошта на САД, Русија и блискоисточните земји во отстранувањето на причината за незапаметениот бран бегалци коишто сакаат да влезат во Унијата, истакна Меркел, го акцентира Reuters делот од говорот пред пратениците.
Меркел, исто така, рече дека бегалската криза може да се реши само доколку се отстранат причините за егзодусот. „Тоа може да се случи само со помош на нашите трансатлантски партнери, САД и Русија и блискоисточните земји, поради страшната ситуација во Сирија“, смета германската канцеларка.
Меркел додаде дека договорот што ноќта кон четвртокот во Брисел го донесоа челниците на членките на ЕУ за издвојување на една милијарда евра за сириските бегалци, претставува првиот чекор по кој треба да следат и други. „Сега овој сигнал на единство мораме да го искористиме за да отидеме натаму во поединечните прашања“, додаде.
Германија, инаку, в 2015 година ќе прими меѓу 800 илјади и милион лица коишто бараат азил, што претставува рекордна бројка и за оваа земја и за Европа.
Додека Унгарија е цел на критиките поради нејзиниот однос кон имигрантите кои преку нејзината територија сакаат да влезат во Австрија и од таму во Германија и поради подигнувањето огради на своите граници за да го спречи неконтролираниот прилив на бегалците, Меркел потсетува на основните принципи на Европската унија.
„Европската унија е заедница на вредности, права и обврски. Во Европа важат минималните критериуми за прифаќање и постапување со бегалците, како и процедури за барање азил, што не се случува секогаш на границите на ЕУ“, истакна Меркел.
Изрази задоволство поради најавата за отворање собирни центри (hotspots) во Грција и во Италија, каде што пристигнуваа директно бегалците од северна Африка, Блиски исток и Азија, каде што ќе бидат регистрирани и бегалците ќе бидат одвоени од економските имигранти./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Намалениот број на станови доведе до раст на кириите во Германија
Растат кириите во Германија поради немањето станови во услови на високи градежни трошоци и кредити. Сето тоа го запре градежниот сектор и побарувачката, но и ги намали цените на квадратот, се вели во извештајот на здружението на банките.
Становите во Германија поевтиниле за 4,3 отсто во првиот квартал во однос на истиот период лани, објави здружението на германските банки„Pfandbrief“.
Цените за изнајмување на нови станови се зголемени за 5,6 отсто. Трендот на поскапување на кириите нема да запре, оценуваат од здружението.
„Пазарот за изнајмување станови е под огромен притисок. Побарувачката значително ја надминува понудата“, рече извршниот директор на здружението, Јенс Толкмит.
Трошоците за изградба значително се зголемија во последните години поради повисоките каматни стапки на кредитите и значително повисоките трошоци за работна сила и цените на градежните материјали. Во вакви услови се намали бројот на одобренија за градба, а побарувачката ослабе, што резултираше со пониски цени на становите, смета министерот за финансии.
Според податоците на здружението на банките, цените на недвижностите најмногу паднале во Минхен, за 5,3 отсто.
Во исто време, падот на градежната активност го продлабочува „недостигот“ на станови, зголемувајќи го натамошниот раст на закупнината, кој би можел да продолжи уште некое време.
Здружението оценува дека цените на станбените недвижности треба да се стабилизираат во догледна иднина, за разлика од комерцијалните недвижности, како што се деловните згради и трговските центри.
Цените во тој сегмент паднаа за речиси 10 проценти на годишно ниво и се уште не се гледа „дното“, вели првиот човек на здружението.
Проценките се базираат на податоци за работењето на повеќе од 700 банки кои се активни во финансирањето на недвижен имот, а не на понуди за купување и изнајмување кои служат како основа за Заводот за статистика, забележуваат тие во здружението.
Европа
(Видео) Драма на небото над Трст: забележана несекојдневна појава
Во внатрешноста на заливот Трст, во близина на границата со Словенија, во вторникот попладне се формирал вител.
Италијанските медиуми јавија дека невремето не предизвикало материјална штета, ниту било закана за населението. Интервенцијата на пожарникарите и на пристанишните служби не била потребна.
Waterspout reported in the North Adriatic between the town of Muggia and Koper a few hours ago.
Original video shooting from meteoradar
➡️ https://t.co/SXbq5rbWaj pic.twitter.com/XxRu57Gohs— Alpine-Adriatic Meteorological Society (@aametsoc) May 7, 2024
Италијанската метеоролошка агенција објасни дека ваквите појави не се воопшто ретки и дека се резултат на екстремна нестабилност на атмосферата.
Областа на низок воздушен притисок, која владее со поголемиот дел од Италија, донесе влажни струи во Трстскиот Залив.
„Во овие временски услови, неколку пати годишно може да се појават воздушни вртлози, кои во повеќето случаи се распаѓаат на море“, објаснуваат италијанските метеоролози.
Европа
Венеција заработи огромна сума на пари со наплата на влезници во градот за само 11 дена
Новововедениот билет за туристите на еднодневно патување во Венеција на градот му донесе приход од 975 илјади евра во првите 11 дена од пробниот период.
Билетот, кој првпат беше воведен на 25 април, се наплаќа по стандардна цена од пет евра.
Градот објави дека продал вкупно повеќе од 195.000 билети, што е малку над очекувањата, пренесува Независне новине.
Влезот ќе се наплаќа во повеќето саботи и недели до средината на јули, кога градот ќе ја разгледа цената.
Како општо правило, целодневните посетители помеѓу 8:30 и 16:00 часот се обврзани да платат влезница и да добијат QR код, кој служи како доказ за плаќање. Ако не го сторат, може да платат казна од 300 евра.
Домашните жители, гостите кои преноќуваат, студентите и децата под 14 години се ослободени од плаќање.
Со околу 15 милиони посетители годишно, Венеција е една од најпосетуваните туристички дестинации во светот.
Масовниот туризам му носи многу приходи на градот, но и гужвите создаваат големи проблеми. Не е познато дали Венеција ќе ја задржи таксата по пробниот период.