Свет
Сопругата на Асанж: Ако биде екстрадиран во САД, тој жив ќе биде погребан
Британскиот суд денес одлучува дали ќе го испорача основачот на „Викиликс“, Џулијан Асанж, во Америка.
САД сакаат да го гонат за шпионажа по објавувањето стотици илјади доверливи документи.
За своите приврзаници, 49-годишниот Асанж стана симбол на борбата за слобода на информации.
За неговата судбина ќе одлучува судијката Ванеса Берицер пред судот во Олд Бејли во Лондон. Без оглед каква одлука ќе биде донесена за тоа, ќе може да се поднесе жалба, така што судската битка во Велика Британија сигурно нема да заврши тука.
Останува да се види каков ќе биде односот на идниот американски претседател Џо Бајден кон основачот на „Викиликс“. Поведена е постапка против Асанж под претседателство на Доналд Трамп. За време на претходникот на Трамп, Барак Обама, чиј потпретседател беше Бајден, американските судови се откажаа од гонење на Асанж.
Сепак, пред 10 години Бајден го спореди Асанж со високотехнолошки терорист.
Адвокатката Стела Морис, со која Асанж има две деца, во интервју за германскиот весник „Шпигел“ изјави дека од март ниеден од неговите адвокати не се појавил во затворот „Белмарш“ во Лондон, каде што тој се наоѓа.
Таа рече дека одбраната на Асанж е сериозно хендикепирана.
„Но, ситуацијата во затворот ‘Белмарш’ не е ништо во споредба со условите во затворот на кој тој ќе биде подложен во САД доколку биде екстрадиран“, рече таа оценувајќи дека Асанж тогаш ќе биде жив закопан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Русија: Резолуцијата за Сребреница е опасна за мировниот процес во Босна и Херцеговина
Високиот претставник за Босна и Херцеговина Кристијан Шмит го поздрави усвојувањето на резолуцијата со која Генералното собрание на ОН го прогласи 11 јули за Меѓународен ден на сеќавање на геноцидот извршен во Сребреница, додека руската амбасада во Сараево рече дека тоа е „пораз за Босна и Херцеговина“, бидејќи тоа би го комплицирало процесот на помирување.
„Од најголема важност е општеството да ги отфрли сите обиди за минимизирање на сериозноста на геноцидот во Сребреница. Резолуцијата мора да послужи како катализатор за лекување и разбирање, наместо да биде искористена за тесни политички цели. Тоа не е чин насочен против српскиот народ или Република Српска. Секој обид оваа резолуција да се стави во таков контекст е погрешен и злонамерен“, рече Шмит.
Амбасадата на Русија во Сараево со коментар во кој тврдат дека е опасно за мировниот процес во БиХ, но и за стабилноста на регионот, пренесуваат регионалните медиуми.
Тие го обвинуваат Западот дека ја „турка“ резолуцијата на ист начин на кој, според нив, Шмит е незаконски назначен за висок претставник во Босна и Херцеговина, што, како што тврдат, дополнително ги продлабочило поделбите во меѓународната заедница.
Свет
Судот во Хаг му нареди на Израел да ја прекине офанзивата на Рафах
Меѓународниот кривичен суд во Хаг денеска одлучи дека Израел мора веднаш да ја прекине воената офанзива и другите дејствија во Рафах во Појасот Газа, наведувајќи го „непосредниот ризик“ за палестинскиот народ, јавува Би-Би-Си.
Барањето на Јужна Африка да му нареди на Израел да ја запре офанзивата во Рафах и да се повлече од Газа, дел од поширокиот случај во кој Израел се обвинува за геноцид, беше потврдено од Хашкиот трибунал.
Судијата Салам ја образложи одлуката со фактот дека моменталната ситуација во Газа повлекува значителни ризици од непоправлива штета на човековите права. Тој рече дека ситуацијата е променета откако судот ги издал претходните наредби и дека се исполнети условите за нови итни мерки за овој случај.
Судот му нареди на Израел да сведочи пред судот во рок од еден месец.
Медиумот потсетува, иако пресудите на МСП се правно обврзувачки, во пракса судот не може да ги спроведе.
Свет
Ројтерс: Путин е подготвен да ја запре војната во Украина, но под еден услов
Рускиот претседател Владимир Путин е подготвен да ја заврши војната во Украина со договорен прекин на огнот кој ги признава сегашните линии на фронтот, изјавиле четири руски извори за Ројтерс, додавајќи дека тој е подготвен да ги продолжи борбите доколку Киев или Западот не одговорат.
Тројца извори блиски до внатрешниот круг на Путин за Ројтерс изјавиле дека рускиот лидер изразил фрустрација пред мала група советници поради, како што смета, обидите поддржани од Западот да ги блокираат разговорите и одлуката на украинскиот претседател Володимир Зеленски да ги исклучи разговорите.
„Путин може да се бори онолку долго колку што треба, но Путин е подготвен и за примирје – да ја паузира војната“, рекол еден од четирите извори, висок руски функционер кој соработувал со Путин и има познавање за разговорите на највисоко ниво во Кремљ.
Два извори на Ројтерс кажале дека Путин верува дека досегашните придобивки во војната се доволни за да му ги продаде на рускиот народ како победа.
Други извори истакнале дека Путин разбрал дека за секој драматичен нов напредок ќе биде потребна уште една национална мобилизација, што тој не ја сака, а еден извор, кој го познавал рускиот претседател, рекол дека неговата популарност опаднала од првата мобилизација во септември 2022 година.
Сепаљк според Ројтерс, изгледите за прекин на огнот, па дури и за мировни преговори, во моментов изгледаат далечни.
Зеленски изјави дека мирот под услови на Путин не е почеток на крајот на војната. Тој вети дека ќе ја врати изгубената територија, вклучувајќи го и Крим, кој Русија го анектираше во 2014 година.
Според написите, портпаролот на Путин, Дмитриј Песков, како одговор на барањето за коментар, рекол дека првиот човек на Кремљ повеќепати јасно кажал дека Русија е отворена за дијалог, наведувајќи дека Москва не сака „вечна војна“.