Решение за актуелната политичка криза во земјата мора да биде изнајдено но дека тоа решение мора да биде засновано на волјата на народот, од кое Македонија ќе искочи посилна, рече премиерот и претседател на владејачката ВМРО-ДПМНЕ, Никола Груевски во интервјуто за телевизијата Сител, во коешто зборуваше уште за минатонеделната полициска операција во Куманово, а воедно му се заблагодари на челникот на опозицискиот СДСМ, Зоран Заев, за последната ткн „бомба“ којашто наводно покажувал дека власта лажно се прикажувала како патриоти а се пазарела за идентитет и името на земјата и порача дека нема да даде оставка и да прифати техничка влада.

„Решение мора да се најде, и тоа мора да биде одраз на волјата на народот и на граѓаните на Република Македонија. На нивната волја изразена на последните избори. Решение мора да се најде и тоа не смее да биде по насилен пат, како што можеби некој планирал. И решение ќе се најде. Македонија ќе излезе уште поцврста од оваа криза, со многу поуки и ќе чекори напред уште посилно отколку пред ова“, рече Груевски.

„Оваа влада веќе девет години е на власт и доколку сакала да го промени името, ќе го сторела тоа, но името не е променето. Напротив, СДСМ го смени“, истакна премиерот Никола Груевски, додавајќи дека токму актуелниот лидер на социјалдемократите Зоран Заев е познат по изјавата „дека ќе ја свитка кичмата“ во врска со речиси две ипол децении спорот со Грција за уставното име на земјата, што е главната пречка за евроинтеграциските процеси на земјата.

„СДСМ сакаа да ги променат името и го направија тоа неполни две години откако дојдоа на власт. Со манипулација, без да ги прашаат граѓаните, без референдум прифатија да се викаме Поранешна југословенска република Македонија и лажеа дека тоа ќе биде за два месеца. Тоа коренсподира и со изјавите на Зоран Заев, кој би ја свиткал кичмата и вели дека сите треба да ја свиткаме. Ова е обид за манипулација со граѓаните“, рече Груевски.

Му се заблагодари на Заев за материјалите коишто беа презентирани во саботата еден ден пред големиот протест на СДСМ, со кои, како што посочи, дека „колку и да се креирани и лепени“, го потврдиле ставот на владата дека какво решение и да има, за него ќе одлучуваат граѓаните на референдум.

„Ова е обид за манипулација. Со тоа што го објави не успеа да го постигне тоа што го сакаше, да не прикаже дека сакаме да и направиме лошо на Македонија. Колку и да сечел, лепел, се гледа дека станува збор за размена на мислења, истакна Груевски и додаде дека тоа е суштината на работата да се разговара и да се разменуваат мислења, да се најде решение“, рече премиерот и додаде дека многу луѓе се нуделе да бидат посредници во разговорите, да помогнат со цел побрзо да се дојде до решение.

„За идентитетот од снимките се гледа дека за идентитетот сме сакале да добиеме гаранции преку резолуција на Обединетите нации и многу сум му благодарен за тоа на Заев. На снимките се слуша гласот на Јолевски кој вика дека бараме да се гарантира идентитетот преку резолуција од ОН“, рече.

„Ние во неколку наврати потврдуваме дека кај нас ништо не би поминало без референдум“, рече Груевски. „Токму во тие колку и да се креирани материјали не можел да го извади тоа дека збориме за референдум“, додаде.

Премиерот Груевски во продолжение одговарајќи на прашањето за минатонеделната полициска операција во Куманово во којашто во разбивањето на поголемата терористича група во која загинаа осум македонски полицајци, рече дека со смислени лаги, дезинформации и манипулирање со јавноста некој сакаше да направи конфликт меѓу Македонците и Албанците во нашата земја.

„За потсетување, минатиот викенд и деновите по тоа, дел од медиумите објавуваа дека има настрадано жени и деца, дека терористите биле во патики и тренерки и слични работи кои веќе се докажа дека се невистинити. Кога ќе погледнете од кои медиуми доаѓаа, а тоа се медиуми кои редовно пласираат лаги и дезинформации, кога ќе погледнете дека тие не се осврнаа на тоа, да се извинеа барем да кажат дека нема цивилни жртви, нема убиено деца и жени, терористи во тренерки…, ќе речевме дека некој ги излажал па се извинија. Не, тие си продолжија приказна, како ништо да не кажаа претходно. Се работи за пропагандна војна, на денот на акцијата на безбедносните сили некој сакаше да создаде немир меѓу народот и меѓу Македонците и меѓу Албанците. Некој сакаше да ги поттикне граѓаните на Македонија да одат и да им пружат помош на терористите. Тоа е вистината. Го правеа тоа медиуми од внатре и медиуми од надвор“, рече Груевски и потенцираше дека на крајот се виде дека немаше ниту цивилна жртва.

Појасни дека Министерството за надворешни работи и надлежните служби подолг период ја следеле групата во Куманово, ги знаеле нејзините терористички намери, и реагирале кога всушност двете групи се споиле во кумановската Дива населба и се обиделе да дејствуваат во други локации предизвикувајќи големи цивилни жртви.

Премиерот Никола Груевски истакна, исто така, дека не планира да поднесе оставка, бидејќи мандатот го добил пред само една година кога народот нему му ја даде довербата. Рече и дека мандатот го добил на регуларни, фер и демократски избори и дека поддршката од народот никогаш нема да ја изневери.

„Оставка немам намера да поднесам, ниту, пак, да прифатам преодна влада. Имам обврска да се справам со ова што го прави Заев, да се справам со ова и да најдам решение Македонија да оди напред. И ќе оди напред. Заев пет пати ми кажа дека материјалите ги добил од странска разузнавачка служба, значи дека е свесен дека некој однадвор го креира ова сценарио. Јас да се повлечам би било кукавички чин, јас ќе се соочам со нападот кон нас и заедно со народот да покажеме дека Македонија не може на ваков начин да биде нападната, Македонија покажува и ќе покаже цврстина“, рече Груевски.

Потенцираше дека тројцата функционери, коишто изминатата седмица поднесоа оставки, министрите за внатрешни работи и за транспорт, Гордана Јанкулоска и Миле Јанакиески, како и шефот на Управата за јавна безбедност, Сашо Мијалков, бидејќи немаат никаква вина и сакаат тоа да го докажат без свое присуство и влијание.

„Сега се соочуваме со материјалите во кои се гледа класично барање мито од страна на Заев на најмалку тројца луѓе. Тој не се повлекува од функцијата, а тоа јавно го побаравме од него. Еве, од Владата си заминаа луѓе без никаква вина, а тој не го прави тоа кога може да влијае врз сведоците и да го повтори делото. Да беше чист ќе се повлечеше“, рече Груевски во врска со неодамна појавените снимки на коишто се гледа дека челникот на СДСМ, кој воедно е и градоначалник на Струмица, наводно бара мито за легализација на градежно земјиште.

Груевски рече и дека Заев негативно одговорил откако бил замолен во понеделник, кога е планиран голем митинг на поддржувачите на владејачката партија, да бидат дислоцирани од пред Владата учесниците на протестите на опозицијата кои започнуваат во неделата кои планираат таму да останат.

Поради тоа Груевски истакна дека ВМРО-ДПМНЕ ќе ја смени својата локација за собирот закажан за понеделник. Целта, како што посочи, е да не се створи проблем при судир на двете групи, но Заев не сакал со дислоцирање тоа да се избегне.

„По тоа гледам дека човекот сака да дојде до судир, сака да има проблеми. За во тие проблеми, во тој хаос што би се создал кога би се судриле граѓани, тој да најде начин како да се извлече од сите незаконски криминални работи што ги има направено. Тоа нема да му го дозволиме. Ние нема да однесеме таму народ за да дојде до закрвување и меѓусебни физички пресметки. Но, ќе покажеме, со целиот народ кој ќе дојде, дека оваа држава има народ со крената кичма, дека оваа држава нема да дозволи некој однадвор со еден инструменти полтрон на нечии интереси да ја руши државата и легитимно избрана власт и да спроведува туѓи сценарија“, рече Груевски.

Потенцираше дека собирот за поддршка на Македонија во понеделник ќе биде мирен и ненасилен. Истакна дека се надева дека и неделниот протест организиран од СДСМ ќе биде мирен. „Ако поддржувачите на СДСМ повторно прават насилни протести“, рече Груевски, „ќе бидат соодветно пресретнати и ќе им биде соодветно одговорено согласно демократските принципи и согласно уставот и законите“./крај/мф/сн

Извор: Макфакс