Регион
Тешко вооружени џихадисти отворија оган врз турската војска
Група до десетина џихадисти на Исламската држава користеле тешко вооружување во напад врз воен граничен премин во турската покраина Килис, при што е убиен еден турски војник а други двајца се ранети.
Како што пренесува агенцијата Anadolu, припадниците на Исламската држава до граничниот премин дошле возејќи се со теренски возила. Претставник на Генералштабот на турските вооружени сили го потврдил нападот прецизирајќи дека огнот бил отворен од сириската страна на границата од територијата што ја контролираат џихадистите. Турција и Сирија имаат граница долга 900 километри од кои речиси половината се под контрола на Исламската држава или на другите сунитски екстремистички групации коко Џебхат ан-Нусра.
„Еден војник загина, а двајца се повредени. Телото на убиен терорист со запленет фрлач на гранати, автомат и муниција е донесено на турска територија. Три возила на борците на Исламската држава се тешко оштетени“, соопштиле од турската армија.
Во меѓувреме во турската престолнина Анкара премиерот Ахмет Давутоглу свика итен состанок на министерскиот кабинет посветен на безбедносните прашања, во врска со овој напад, а особено со терористичкиот напад од понеделникот кога во пограничниот град Суруч во напад на бомбаш самоубиец беа убиени 32 активисти на претежно курдски здруженија кои за кои е осомничен млади Турчин кој пред неколку месеци ѝ се приклучил на Исламската држава. На состанокот присуствуваа и шефовите на воените и националните разузнавачки агенции.
Во пограничните региони на Турција со Сирија, во врска со неодамнешните неколку терористички напади, меѓу кои и убиството на двајцата полицајци во средата во југоисточниот град Чејланпинар, и растечката закана од Исламската држава, Генералштабот започна со распоредување на дополнителни оклопни единици и на армиските специјалци ткн „бордо беретки“. Во покраината Килис, која граничи со Сирија, повеќе погранични области се прогласен за „посебни безбедносни зони“ во коишто војниците имаат право да пукаат без предупредување.
Турската армија започна со бомбардирање на позициите на Исламската држава на територијата на Сирија. Операцијата започна веднаш по џихадистичкиот напад во Килис, и прекуграничниот артилериски и тенковски оган траел неколку часа. Има и медиумски извештаи дека во покраината Дијарбакир биле подигнати ловците „F-16“ кои полетале во насока на турско-сириската граница.
Во вторникот дневниот весник Hurriyet повикувајќи се на извори во турското разузнавање дека Националната разузнавачка агенцијa (MIT) ги предупредила безбедносните сили дека се можни напади од припадници на Исламската дражва во периодот од 22-ри јуни до 3-ти јули.
Меѓу овие имиња на листата можни џихадистички атентатори фигурирале и имиња на три жени. Весникот Habertürk, пак, ги идентификуваше нив како Фадиме Курт, Озлем Јилмаз и Нурај Демирел, како можни извршителки на бомбашки напади во Турција.
Tурската полиција, најверојатно по известувањето добиено од разузнавањето, неодамна изврши операции против лица осомничени за врски или за припадност на Исламската држава, во повеќе градови. Во рациите во Истанбул, Анкара, Измир, Коња и во Шанлиурфа биле уапсени 97 лица.
Уште во септември 2014 година турските медиуми пишуваа дека ново појавени исламски здруженија вршат регрутација на борци за Исламската држава меѓу Турција. Досега се проценува дека повеќе стотици турски државјани им се приклучиле на џихадистите во Сирија, поради што турските власти ја зголемија контролата над граничниот појас каде што веќе беа изведувани бомбашки напади, и спроведуваа масовни приведувања на осомничени за поврзаност со сунитските радикали./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.