Во големиот пожар којшто избувна во вторникот во Поштата во центарот на Скопје изгореле 15.206 денари или 247 евра, а делумно изгореле 3.000 евра, соопштуваат од Македонски пошти.

Комисијата за попис на паричните средства од благајната констатирала кусок од 15.206 денари или 247 евра.

Од менувачницата, пак, делумно изгореле 3.000 евра кои биле подготвени да се достават како дотација во поштата во Пробиштип.

Пописната комисија овие пари ги нашла делумно изгорени, серискиот број на банкнотите е неоштетен.

Во меѓувреме градоначалникот на Град Скопје, Коце Трајановски во петок соопшти дека 40-те пожарникари кои во вторникот учествуваа во гасењето на пожарот ќе бидат наградени со 30 отсто од платата или со околу 100 евра, со оглед на тоа што платата на пожарникарите е од 18.000 до 20.000 денари.

Пожарот во зградата на Македонски пошти во центарот на Скопје, избувна во вторникот попладне, по што изгореа шалтер салата, покривот и неколку канцеларии на вториот кат.

Сè уште е се знае кој ќе ја плати штетата бидејќи Поштата не потпишала договор со ниедна осигурителна компанија за оваа година.

Во тек бил тендер, а според директорот на Македонски пошти, Рафиз Алити, компанијата која ќе го добиела тендерот ќе ја надоместела штетата бидејќи во тендерот имало клаузула според која осигурувањето важело ретроградно од почетокот на годинава./крај/фф