Неколку европски министри за одбрана од земјите членки на НАТО во четвртокот се изјаснија против испраќањето оружје за украинската армија, укажувајќи на потенцијален прекуатлантски раздор доколку САД се решат да испорачаат смртоносно оружје за Киев, предупредува Rеuters.

По разгорувањето на судирите на рускојазичниот исток на Украина при што украинската армија загуби неколку позиции, а се зголеми и бројот на цивилните жртви, Вашингтон преку повеќе извори најави оти размислува на Украина да ѝ испорача смртоносно оружје. Законот кој го донесе Конгресот на САД едногласно кон средината на декември одобрува нови санкции против Русија и испорака на смртоносно оружје за Украина. Испораката на такво оружје од САД во Украина беше можна веднаш, но е во надлежноста на американскиот претседател кој засега се противи и одобри само помош во радари, возила, опрема за деминирање, ноќни визири, панцирни елеци и противминофрлачки радари.

Претходно седмицава украинскиот претседател Петро Порошенко ги повика државите членки на НАТО да испратат оружје за вооружените сили на неговата земја. Меѓутоа, и претходно изминатите денови највисоките политички челници на Франција и на Германија соопштија дека не се расположени на Киев да му испорачаат такво оружје, стравувајќи дека тоа само би го разгорело и онака ескалираниот судир на украинскиот исток. Таквиот став го повториле во четвртокот неколку министри за одбрана присутни на состанокот на НАТО во Брисел, спротиставувајќи се на испраќањето оружје на Украина.

„Повеќе оружје во регионот нема да не доведе поблиску до решението и нема да стави крај на патењето на народот. Мораме да извршиме силен притисок врз сепаратистите и врз Русија во рамките на економскиот и политичкиот начин, за решението да се пронајде на преговарачката маса, а не на бојното поле, бидејќи поттикнувањето на ескалацијата не е добро. Во овој регион ние потребно трајно политичко решение“, рекла германската министерка за одбрана Урсула фон де Лејен.

Нејзината холандска колешка Жанин Хенис-Пасшарт река дека верува оти повеќето сојузници „особено Холанѓаните, ќе инсистираат на тоа да не ѝ се испраќа оружје на Украина. Политичкиот дијалог е единствениот излез од кризата“, додала.

Данскиот министер за одбрана Николај Вамен рекол дека неговата земја не планира да им испрати оружје на Украинците, а британскиот министер за одбрана Мајкл Фалон изјавил дека Британците „ќе видат што уште може да се стори кога станува збор за тренирањето и испраќањето опрема, а не станува збор за оружје и би можело да им помогне на Украинците подобро да се заштитат од жестоките напади на коишто се изложени“.

Командантот на силите на НАТО во Европа, американскиот генерал Филип Бридлав рекол дека руското испраќање тешко вооружување и помош на бунтовниците во источна Украина, веќе предизвикало голема загриженост, како и дека украинскиот народ има право да се брани. Истовремено предупредил дека за ситуацијата во Украина нема воено решение, како и дека крајна цел на акцијата која има намера да ја преземе Западот мора да биде создавање услови коишто ќе овозможат сите страни да бидат доведени на преговарачката маса за да се реши проблемот.

„Оружјето тоа нема да го измени“, рекол Бридлав пред новинарите, одбегнувајќи го директниот одговор за тоа дали го поддржува испраќањето оружје на Украина, пренесуваат агенциите. „Упатив сопствено мислење и совет на двете адреси, на американскиот команден синџир и на НАТО-виот команден синџир. Мојот предлог се разгледува“, додал американскиот генерал./крај/мф/сн

Извор: Макфакс