Македонија
Претседателката на Меѓународниот сојуз: Сѐ се криеше од мене, не знаев што потпишувам
Агапи Дика, претседатеката на Собранието на Меѓународниот сојуз на Бојан Јовановски, на сведочењето во судот рече дека потпишувала договори за проекти на здружението, но само формално. Таа рече дека одела во просториите на Меѓународниот сојуз на повик и не присуствувала на состаноците помеѓу компаниите „Дрим билдинг“ и „Пелистер“, а за сумите на договорите дознала откога биле потпишани. Таа посочи повеќе функционери и претставници на инсистуции, кои присуствувале на состаноците што ги одржувал Меѓународниот сојуз.
„Доаѓаа луѓе да нудат проекти. Не сум била присутна кога нуделе. Фросина доаѓаше во Меѓународниот сојуз неколкупати. Колку што јас сум ја видела. Сум ги видела и сопствениците на ‘Пелистер’ и на ‘Дрим билдинг’. Имаше многу добри презентации од двете фирми. Дојде до склучување договори. Се имам потпишувано на тие договори бидејќи верувам во тие проекти. Ги видов проектите, со архитетки од ‘Пелистер’ и Меѓународниот сојуз. Требаше да се почне со реализација, но не се почна. Меѓународниот сојуз беше тука за менаџирање во странство. Не знам од кои причини, не можам да се сетам. Доаѓаше Лилјана Тодоровска. Вториот пат Бојан ми рече да ѝ кажам да си оди, без да ми ја каже причината. Ми беше непријатно, но ѝ кажав. Се реализираа проекти, носевме храна на социјално ранливи категории. Не ми било кажано од каде пари за овие проекти, не сум учествувала во преговарање. Износите за ‘Пелистер’ и за ‘Дрим билдинг’ не ги знаев, подоцна ги дознав. Викнете ги сопствениците и прашјте ги. Можам да избројам колку пати сум била во Меѓународниот сојуз. Два пати кај Чифлиганец и тука сум присуствувала. Имаше плац во населбата Илинден и сакаше тука да прави старски домови. Отиде делегација да види, но земјиштето нешто не чинеше“, изјави Дика.
Дика објасни дека потпишала договор за стратешко партнерство и деловна соработка, но не знаела за сумата во договорот.
„Овие договори ги видов на телевизија и Зоран Божиновски ги имаше објавено. Двата договора беа потпишани во ист ден. Сум потпишала, но не сум знаела што потшишувам. Од мене сѐ се криеше“, рече Дика.
Таа објасни дека побарала да биде изземена од функцијата претседател на Собранието бидејќи таа била само формално напишана, но не учествувала во одлучувањето, ниту во работата.
„Со Бојан Јовановски бевме фамилијарно поврзани, а го знам од бебе, можам слободно да кажам дека израсна со нас. Бојан во Македонија беше познат во естрадата, правеше забавни емисии, шоуа, па отиде во Белград. Бојан се врати од Белград, бевме на гости кај Јасмина и Миле, дојде Бојан и рече дека сака да формира меѓународен сојуз за помош на социјални категории граѓани во Македонија. Набргу ми кажа дека онлајн е избран да го основа Меѓународниот сојуз во Македонија. За да се основа, требаше здружение. Асистентката Кристина ми донесе документ да потпишам за основач и го потпишав на улица на автомобил. На основачкото собрание на Меѓународниот сојуз беа присутни Стефан Богоев, Жерновски, Костадин Костадинов, мислам дека беше и Петре Шилегов, тогашниот англиски амбасадор, претставници на институции. Меѓународниот сојуз требаше да се занимава со помош на социјално ранливи категории. Мојата функција беше претседстел на Собранието. Првото Собрание го водев јас, но фактички како да не го водев. Кирил Ефремов беше како претседател на Бојан и тој ги правеше тие записници и други документи. Ме прекинуваше постојано, како тој да го водеше. Мислам дека Бојан ми кажа дека просториите треба да се околу Кривичниот суд. Но, беа кај ИЗИС. Јас бев на повик“, додаде Дика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Оставка на директорот на основното училиште во Ѓорче Петров каде деца се обидоа да силуваат соученик
Градоначалникот на општината Ѓорче Петров, Александар Стојкоски, соопшти дека од лични и морални причини оставка поднел директорот на општинското основно училиште во кое се случи обид за силување на ученик. На негово место, веќе е именуван нов ВД директор.
Стојкоски информираше и дека е формирана комисија која ќе поведува дисциплинска постапка против четворица вработени, а суспендиран е одговорниот наставник за одделението. По утврдувањето на одговорноста на секој од нив, зависно од дејствијата кои ги презеле или пропуштиле, соодветно ќе бидат санкционирани.
„Изразувам жалење и најсилна осуда за немилиот настан во едно од нашите ООУ, во која се инволвирани ученици од најмалите одделенија. Информираме дека сме во постојана комуникација од моментот на пријавување на настанот со сите инволвирани институции, МВР, МОН, социјални служби и обвинителство“, рече Стојкоски додавајќи дека општината и училиштето соодветно ги презеле сите мерки согласно Законот за основно образование и Законот за наставници и стручни соработници, како и согласно Упатството за постапката за пријавување и заштита на ученици жртви на насилство, злоупотреба и занемарување.
МВР претходно објави дека завчера во период од 11 до 15 часот, во двор на основно училиште на подрачјето на Ѓорче Петров, ученикот бил физички нападнат од двајца негови соученици, кои се обиделе да извршат полово дејствие врз него.
Случајот во полицијата го пријавил таткото на ученикот.
Македонија
(Видео) Огромни гужви за излез од Скопје, на патарината „Миладиновци“ колони од два километри
Огромни гужви има попладнево на наплатната станица „Миладиновци“ на излез од Скопје.
„Тука е полошо од грчка граница. Сите свират, се обидуваат да ги престигнат автомобилите. Ужас! “, коментираат за „Макфакс“ патници кои останале заглавени на патарината.
И оние кои поседуваат М-таг картички не можат да се доближат до наплатната рампа, а заглавени се и автобусите на редовните линии кон Куманово, Кратово, Крива Паланка, Штип, Берово, Кочани.
Голем број граѓани го напуштија градот поради претстојниот продолжен празничен викенд.
Македонија
Македонците во Бугарија се обесхрабруваат да се идентификуваат, не постои свест за правата на малцинствата, нотира Советот на Европа
Советодавниот комитет на Советот на Европа во својот најнов извештај посочува дека во Бугарија постои значителен недостаток на свест за малцинските права.
Се нотира дека во земјата не може да се забележи значителен напредок во спроведувањето на препораките за да се обезбеди ефективен пристап до правата на малцинствата.
„Додека Бугарија играше сè поактивна улога во промовирањето на правата на лицата кои им припаѓаат на бугарските малцинства во странство, вакви напори не биле забележани и во рамките на Бугарија. Како и во претходните циклуси, лицата кои се идентификуваат како Македонци ја повторија својата долгогодишна желба да бидат заштитени според Рамковната конвенција, но бидејќи властите не го прифаќаат постоењето на објективни критериуми за нив, овие лица не можат да уживаат пристап до индивидуалните малцински права. Нивните долгорочни обиди да регистрираат здруженија кои ја промовираат македонската заедница не беа успешни. Власите не гледаат објективни критериуми ниту за лицата кои се идентификуваат како Помаци односно етничките Македонци со исламска вероисповед кои во земјата и натаму се нарекуваат бугарски муслимани“, стои во извештајот на Советодавниот комитет.
Во документот се упатуваат препораки до бугарските власти да ги усогласат своите активности со Рамковната конвенција за заштита на националните малцинства. Притоа се нотира дека се потребни повеќе активности од властите во голем број сфери поврзани со правата на потребни се лица кои припаѓаат на националните малцинства.
Лица кои се самоидентификуваат како Македонци, кои продолжиле да бараат заштита според Рамковната конвенција, пријавиле до Советодавниот комитет дека некои постапки на властите ги сфатиле како активно обесхрабрување да се самоидентификуваат како етнички Македонци. Се додава дека се пријавени и напади за време на јавни настани, како и пречки во организирање протести и различни настани. Соговорниците на Советодавниот комитет напоменаа дека во бугарското општество нема свест за значењето на малцинските права и дека нема разбирање, националните малцинства да бидат составен и ценет дел од Бугарија.
Во извештајот, во неколку точки, се напоменува и дека Европскиот суд за човекови права, во 12 случаи против Бугарија, утврдил, непочитување на правото на слобода на собирање и здружување, поднесени од здруженијата на Македонците, кои пак властите упорно одбиваат да ги регистрираат.